Header Ads

ຜົນການດໍາເນີນງານ ແລະ ຈັດຕັ້ງປະຕິບັດຂອງ ໜ່ວຍກູ້ໄພມູນນິທິຊວຍເຫຼືອຄົນທຸກຍາກສາຂາແຂວງຈໍາປາສັກໃນໄລຍະ 6 ເດືອນຜ່ານມາ




ທ່ານ ສີທົນ ແກ້ວພູວົງ ກຳມະການໃນຄະນະປະຈຳພັກແຂວງ, ປະທານແນວລາວສ້າງຊາດແຂວງ ແລະ ຜູ້ຊີ້ນຳມູນນິທິຊວຍເຫຼືອຄົນທຸກຍາກສາຂາແຂວງຈໍາປາສັກ ໄດ້ໃຫ້ຮູ້ວ່າ: ໜ່ວຍກູ້ໄພມູນນິທິຊວຍເຫຼືອຄົນທຸກຍາກສາຂາແຂວງຈໍາປາສັກ ແມ່ນຂຶ້ນກັບ ມູນນິທິຊ່ວຍເຫຼືອຄົນທຸກຍາກ ແຫ່ງ ສປປ.ລາວ ໂດຍໄດ້ຮັບການຊ່ວຍເຫຼືອທາງດ້ານພາຫະນະ ແລະ ອຸປະກອນຕ່າງໆ ຈາກຫຼາຍພາກສ່ວນທັງພາຍໃນແລະ ຕ່າງປະເທດ. ມາຮອດປັດຈຸບັນ, ໜ່ວຍກູ້ໄພ ມີລົດຮັບໃຊ້ 6 ຄັນ, ມີອຸປະກອນການແພດ ເພື່ອປະຖົມພະຍາບານ ແລະ ມີອາສາສະໝັກ 40 ກວ່າຄົນ ທີ່ໄດ້ຮັບການເຝິກອົບຮົມດ້ານການຊ່ວຍເຫຼືອຄົນເຈັບໃຫ້ຖືກວິທີ. ໜ່ວຍກູ້ໄພ ມີສູນປະຈຳການຢູ່ 1 ແຫ່ງຄື ທີ່ສະໝາມແດງ ແຂວງຈໍາປາສັກ ແລະ ມີ 3 ທີມງານ ໃນການຊ່ວຍເຫຼືອຜູ້ປະສົບອຸປະຕິເຫດຄື: ຊ່ວຍມອດໄຟ, ປະຖົມພະຍາບານ ແລະ ຕັດງັດ. 




ນັບແຕ່ມື້ທີ່ໄດ້ຮັບການສ້າງຕັ້ງ ໃນໄລຍະ 6 ເດືອນຜ່ານມາ, ຫນ່ວຍກູ້ໄພດັ່ງກ່າວ ໄດ້ຮັບແຈ້ງຂໍຄວາມຊ່ວຍເຫຼືອຜ່ານໝາຍເລກໂທລະສັບ 1623 ຢ່າງຫລວງຫລາຍ, ໂດຍໃນນັ້ນຫຼາຍກ່ວາ ໝູ່ແມ່ນ ບັນຫາອຸປະຕິເຫດຕາມທ້ອງຖະໜົນ ແລະ ສ່ວນໃຫຍ່ແມ່ນໃນໂມງຮີບດ່ວນ ແລະ ເວລາກາງຄືນ ເຊິ່ງມີຈຳນວນສາຍໂທຂໍຄວາມ ຊ່ວຍເຫຼືອ 359 ຄັ້ງ. ນອກຈາກອຸປະຕິເຫດແລ້ວ, ຫນ່ວຍກູ້ໄພດັ່ງກ່າວ ຍັງໄດ້ຮັບແຈ້ງເຫດການຕ່າງໆ ສະເລ່ຍເດືອນຫນຶ່ງປະມານ 1.000 ຄັ້ງ, ບໍ່ວ່າຈະເປັນ ກໍລະນີໄຟໄໝ້, ງູເຂົ້າເຮືອນ, ຕົກຕົ້ນໄມ້, ວັດຖູເຄື່ອງຂອງເປ້ເພ ແລະ ອື່ນໆ. ໃນການຊ່ວຍເຫຼືອແຕ່ລະຄັ້ງ ແມ່ນບໍ່ໄດ້ຮຽກຮ້ອງຄ່າຕອບແທນໃດໆທັງສິ້ນ, ສ່ວນພາຫະນະທີ່ຮັບໃຊ້ວຽກໃນແຕ່ລະມື້ນັ້ນ ແມ່ນໄດ້ຮັບການຊ່ວຍເຫຼືອດ້ານນໍ້າມັນຈາກ ບໍລິສັດເຊື້ອໄຟຫຼັກ 2. ນອກຈາກນີ້ ພວກເຮົາຍັງໄດ້ຈາກການຊ່ວຍເຫຼືອຂອງສັງຄົມ ໂດຍຜ່ານຕູ້ຮັບບໍລິຈາກຮ່ວມນໍ້າໃຈ ທີ່ຕັ້ງຢູ່ສະຖານທີ່ຕ່າງໆ. 



ສຳລັບຂໍ້ຫຍຸ້ງຍາກ ຫຼື ອຸປະສັກຂອງການເຮັດວຽກໃນແຕ່ລະຄັ້ງນັ້ນ ແມ່ນຜູ້ໃຊ້ລົດ ໃຊ້ຖະໜົນຈຳນວນຫນຶ່ງ ຍັງ ບໍ່ທັນໃຫ້ການຮ່ວມມືທີ່ດີ ບໍ່ຫຼີກທາງໃຫ້ລົດກູ້ໄພ ທີ່ພວມຈະໄປຊ່ວຍຄົນເຈັບ; ອີກປະການຫນຶ່ງ ໄລຍະທາງ ລະຫວ່າງສູນປະຈຳການຂອງໜ່ວຍກູ້ໄພ ຫາ ບ່ອນເກີດເຫດ ບາງຄັ້ງແມ່ນຫ່າງໄກກັນຫຼາຍ ເຮັດໃຫ້ການໄປຊ່ວຍເຫຼືອມີຄວາມຊັກຊ້າ ເຊິ່ງຂອບເຂດຂອງການຊ່ວຍເຫຼືອແມ່ນຢູ່ພາຍໃນ 10 ເມືອງ ຂອງແຂວງ ແລະ ຕ່າງແຂວງນຳອີກ; ດັ່ງນັ້ນ ເພື່ອໃຫ້ມີຄວາມວ່ອງໄວຫຼາຍຂຶ້ນ ໃນປີ 2017-2018 ນີ້ ພວກເຮົາຈຶ່ງໄດ້ມີແຜນທີ່ຈະເພີ່ມສູນປະຈຳການ ແລະ ປະກອບເຄືອງອຸປະກອນກູ້ໄພທີ່ທັນສະໄຫມຂື້ນກົ່ວເກົ່າ. ໃນໂອກາດນີ້, ທ່ານ ສີທົນ ແກ້ວພູວົງ ໄດ້ຮຽກຮ້ອງມາຍັງພໍ່ແມ່ປະຊາຊົນ ຜູ້ທີ່ໃຊ້ລົດໃຊ້ຖະໜົນທັງຫລາຍ ຈົ່ງໃຫ້ການຮ່ວມມືໃນເວລາລົດກູ້ໄພແລ່ນຜ່ານ, ດັ່ງນັ້ນ ຖ້າຫາກທ່ານໃດຕ້ອງການຄວາມຊ່ວຍເຫຼືອໃນກໍລະນີເກີດອຸປະຕິດເຫດຕ່າງໆ ແມ່ນສາມາດໂທຫາໜ່ວຍກູ້ໄພ ໄດ້ ຫມາຍເລກໂທລະສັບ 1623 ໂດຍບໍ່ເສຍຄ່າໂທ ຍິນດີເຕັມໃຈບໍລິການຊ່ວຍເຫຼືອທຸກໆທ່ານຕະຫຼອດເວລາ 24 ຊົ່ວໂມງ. 



ໂດຍ : ພິລາວັນ ທອງວິໄລຝ/ວິທະຍຸກະຈາຍສຽງ ແຂວງຈໍາປາສັກ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.