Header Ads

ຂົວຂ້າມນໍ້າເຊກອງສຳເລັດການກໍ່ສ້າງແລ້ວກວ່າ 90% ດ້ວຍມູນຄ່າກໍ່ສ້າງ 115 ຕື້ກີບ



ໂຄງການກໍ່ສ້າງຂົວຂ້າມນໍ້າເຊກອງຕັ້ງຢູ່ເມືອງລະມາມແຂວງເຊກອງ ເປັນໂຄງການຂະໜາດໃຫຍ່ຂອງແຂວງໄດ້ຮັບທຶນຊ່ວຍເຫຼືອລ້າຈາກລັດຖະບານຍີປຸ່ນ, ໃນມູນຄ່າທັງໝົດ 1,6 ຕື້ເຢນ (ສະກຸນເງິນຍີປຸ່ນ) ຫຼື ປະມານ 115 ຕື້ກີບ ໂດຍໄດ້ເລີ່ມລົງມືກໍ່ສ້າງມາແຕ່ຕົ້ນເດືອນພະຈິກ 2014 ປັດຈຸບັນຄວາມຄືບໜ້າ ໂດຍລວມຂອງໂຄງການແມ່ນສໍາເລັດໄປແລ້ວ 91,3% ແລະ ຄາດວ່າຈະທັນເປີດນຳໃຊ້ໃນວັນທີ 2 ທັນວາທີ່ຈະມາເຖິງ.

ເມື່ອວັນທີ 22 ກັນຍາ 2017 ນີ້ ທ່ານ ນີສອນ ວືອິນຢາວ ຮອງປະທານສະພາປະຊາຊົນແຂວງເຊກອງ ແລະ ທ່ານ ແກດ ດາລາແພງ ປະທານຄະນະກຳມາທິການເສດຖະກິດ, ແຜນການ ແລະ ການເງິນສະພາປະຊາຊົນແຂວງເຊກອງ ພ້ອມຄະນະ ແລະ ຂະແໜງການກ່ຽວຂ້ອງໄດ້ລົງເຂື່ອນໄຫວກວດກາຕິດຕາມຄວາມຄືບໜ້າຂອງໂຄງການກໍ່ສ້າງຂົວຂ້າມນໍ້າເຊກອງ, ໃນໂອກາດດັ່ງກ່າວ ທ່ານກໍ່ໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານຂອງໂຄງການໃນໄລຍະຜ່ານມາ ຈາກທ່ານ ຄຳເກັ່ງ ແກ້ວສຸວັນ ຮອງຫົວໜ້າໂຄງການດັ່ງກ່າວ.

ໂຄງການກໍ່ສ້າງຂົວຂ້າມນໍ້າເຊກອງ ແມ່ນໂຄງການໜຶ່ງທີ່ເປັນບູລິມະສິດຂອງພັກ ແລະ ລັດຖະບານ ກໍ່ຄືແຂວງເຊກອງໃນການພັດທະນາພື້ນຖານໂຄງລ່າງ ແລະ ເປັນໂຄງການຂະໜາດໃຫຍ່ຂອງແຂວງໄດ້ເລີ່ມລົງມືກໍ່ສ້າງມາແຕ່ວັນທີ 4 ພະຈິກ 2014 ເປັນຕົ້ນມາ ຊຶ່ງຂົວດັ່ງກ່າວ ມີຄວາມຍາວທັງໝົດ 300 ແມັດ ແລະ ກວ້າງ 11 ແມັດ ໂດຍແມ່ນບໍລິສັດໄທເຊ (ປະເທດຍີປຸ່ນ) ເປັນຜູ້ຮັບເໝົາກໍ່ສ້າງ, ຕາມແຜນແລ້ວແມ່ນຈະໃຫ້ສໍາເລັດ ແລະ ທັນເປີດນໍາໃຊ້ໃນຕົ້ນເດືອນມັງກອນປີ 2018. ແຕ່ຜ່ານການປະຕິບັດຕົວຈິງມາຮອດປັດຈຸບັນ ເຫັນວ່າໜ້າວຽກ ໂດຍລວມຂອງໂຄງການແມ່ນສາມາດປະຕິບັດໄດ້ 91,3% ສ່ວນທີ່ເຫຼືອແມ່ນເລັ່ງໃຫ້ບໍລິສັດສຸມໃສ່ປະຕິບັດ ເພື່ອໃຫ້ທັນເປີດນຳໃຊ້ໃນວັນທີ 2 ທັນ ວາ ທີ່ຈະມາເຖິງນີ້.


ທ່ານຮອງຫົວໜ້າໂຄງການກໍ່ສ້າງຂົວເຊກອງ ກ່າວອີກວ່າ: ພາຍຫຼັງເປີດການນຳໃຊ້ແລ້ວ ຈະມີຜົນດີໂດຍທາງກົງ ແລະ ທາງອ້ອມຕໍ່ການພັດທະນາເສດຖະກິດ-ສັງຄົມຂອງປະເທດຊາດ ກໍ່ຄືແຂວງເຊກອງ ໂດຍສະເພາະລັດຖະບານໄດ້ກຳນົດເອົາທາງດັ່ງກ່າວ ເປັນເສັ້ນທາງ AEC ເພື່ອເຊື່ອມຕໍ່ຜ່ານບັນດາແຂວງພາກໃຕ້ຂອງ ສປປ ລາວ ອອກສູ່ທະເລ ສສ ຫວຽດນາມ ແລະ ເຊື່ອໝັ້ນວ່າ ໃນອະນາຄົດຈະມີການຂົນສົ່ງສິນຄ້າຕ່າງໆຈຳນວນຫຼາຍມາຈາກປະເທດໄທຜ່ານແຂວງເຊກອງ ໄປສູ່ທ່າເຮືອແຂວງດາໜັງ ສສ ຫວຽດນາມ, ພ້ອມທັງອຳນວຍຄວາມສະດວກການໄປມາຫາສູ່, ການຂົນງສົ່ງແລກປ່ຽນຊື້-ຂາຍສິນຄ້າທັງພາຍໃນ ແລະ ຕ່າງປະເທດ.


ຂ່າວ : ສັນຍາ ແກ້ວໄຊຍະວົງ, ພາບ : ສພຂ ເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.