Header Ads

ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຈຳປາສັກ ພົບປະແລກປ່ຽນຖອດຖອນບົດຮຽນຮ່ວມກັບຄະນະຜູ້ແທນ ແຂວງ ບິດິ້ງ ສ.ສ.ຫວຽດນາມ



ໃນວັນທີ 7/9/2017, ທີ່ ໂຮງແຮມຈຳປາສັກ ແກຣນ ເມືອງປາກເຊ ແຂວງຈຳປາສັກ ພະແນກຖະແຫຼງຂ່າວ, ວັດທະນະທໍາແລະ ທ່ອງທ່ຽວ ແຂວງຈຳປາສັກ ( ສປປ ລາວ )ນໍາໂດຍທ່ານ ບົວທອງ ສຸວັນນະສານ, ກໍາມະການພັກແຂວງ, ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງພ້ອມຄະນະ ໄດ້ຕ້ອນຮັບ ແລະ ເຮັດວຽກຮ່ວມກັບຄະນະຜູ້ແທນ ພະແນກ ຖະແຫຼງຂ່າວ ແລະ ການສື່ສານ ແຂວງບິ່ງດິ໋ງ ( ສສ ຫວຽດນາມ )ນຳໂດຍທ່ານ ເຈີນ ກີມ ຄາ ກຳມະການພັກແຂວງ, ຫົວໜ້າພະແນກ ຖະແຫຼງຂ່າວ ແລະ ການສື່ສານ ແຂວງບິ່ງດິ໋ງພ້ອມຄະນະ.



ໃນການເຮັດວຽກໃນຄັ້ງນີ້, ທັງສອງຝ່າຍໄດ້ແລກປ່ຽນຄວາມຄິດເຫັນສານກ່ຽວກັບການພົວພັນຮ່ວມມືໃນບັນດາຂົງເຂດທີ່ກ່ຽວຂ້ອງເຊີ່ງເປັນທ່າແຮງບົ່ມຊ້ອນຂອງສອງຝ່າຍ, ຜ່ານການປຶກສາຫາລື, ທັງສອງຝ່າຍໄດ້ເຫັນດີເປັນເອກະພາບກັນວ່າ: ໃນໄລຍະແຕ່ປີ 2017 – 2021, ພະແນກຖະແຫຼງຂ່າວ ແລະ ການສື່ສານແຂວງບິ່ງດິ໋ງ( ສສ ຫວຽດນາມ ) ແລະ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງຈຳປາສັກ (ສປປ ລາວ ) ຈະເພີ່ມທະວີການຮ່ວມມືໃນຂົງເຂດວຽກງານຖະແຫຼງຂ່າວ ແລະ ການສື່ສານ ເປັນຂົວຕໍ່ໃນການຮ່ວມມືເພື່ອສ້າງເງື່ອນໄຂໃຫ້ນັກທຸລະກິດທີ່ນອນໃນພື້ນທີ່ຂອງແຕ່ລະແຂວງໃຫ້ມີການເຂົ້າຮ່ວມຈັດຕັ້ງປະຕິບັດລາຍການຮ່ວມມືການພັດທະນາດ້ານຖະແຫຼງຂ່າວ-ສື່ມວນຊົນ, ດ້ວຍແບບການຮ່ວມມືເໝາະສົມກັບຄວາມອາດສາມາດ,ຄວາມຮຽກຮ້ອງຕ້ອງການຕົວຈິງຂອງແຕ່ລະຝ່າຍດ້ວຍຄວາມສະໝັກໃຈ, ຕ່າງຝ່າຍຕ່າງມີຜົນປະໂຫຍດແລະມີປະສິດທິຜົນ, ເຊິ່ງມີລາຍລະອຽດດັ່ງຕໍ່ໄປນີ້:












1. ສອງຝ່າຍຍິນດີໃນການແລກປ່ຽນຂໍ້ມູນຂ່າວສານປະສົບການກ່ຽວກັບວຽກງານຄຸ້ມຄອງລັດໃນຂົງເຂດ
ຖະແຫຼງຂ່າວແລະສື່ມວນຊົນຢ່າງເປັນປົກກະຕິ (ໂດຍເນັ້ນໃສ່ບັນດາເນື້ອໃນທີ່ສຳຄັນເຊັ່ນ: ການຄຸ້ມຄອງຖະ
ຖະແຫຼງຂ່າວ - ສື່ມວນຊົນຕ່າງປະເທດ, ການໂຄສະນາເຜີຍແຜ່ຂ່າວຜ່ານສື່ມວນຊົນ, ການພິມຈໍາໜ່າຍຜະລິດຕະພັນສື່ມວນຊົນ) ປະສົບການໃນການສ້າງ, ຈັດຕັ້ງປະຕິບັດ ແລະ ຄຸ້ມຄອງບັນດາແຜນການລວມ, ແຜນການວິຊາສະເພາະຂະແໜງການ, ປະສົບການໃນການສ້າງຕັ້ງ ແລະ ການເຄື່ອນໄຫວຂອງບັນດາສະມາຄົມວິຊາຊີບສື່ທີ່ນອນໃນຂົງເຂດຖະແຫຼງຂ່າວ ແລະ ສື່ມວນຊົນຂອງສອງແຂວງ.

2. ສອງຝ່າຍຍິນດີປະສານສົມທົບກັນສະໜອງຂໍ້ມູນຂ່າວສານ,ເພື່ອໂຄສະນາເຜີຍແຜ່ກ່ຽວກັບການພົວພັນຮ່ວມມືລະຫວ່າງ ສສ ຫວຽດນາມ - ສ.ປ.ປ ລາວ , ໂຄສະນາຮູບພາບ, ປະຫວັດສາດ, ວັດທະນະທຳ, ການທ່ອງທ່ຽວ, ສະພາບແວດລ້ອມ ແລະ ໂອກາດໃນການລົງທຶນເຮັດທຸລະກິດທີ່ແຂວງບິ່ງດິ໋ງ ( ສ.ສ. ຫວຽດນາມ ) ແລະ ແຂວງຈຳປາສັກ ( ສ.ປ.ປ ລາວ ), ໂດຍຜ່ານສື່ມວນຊົນສອງແຂວງ.

3. ສອງຝ່າຍເຫັນດີຈັດຕັ້ງຄະນະຜູ້ແທນ ເພື່ອແລກປ່ຽນຖອດຖອນບົດຮຽນກ່ຽວກັບຂົງເຂດຖະແຫຼງຂ່າວ-ສື່ມວນຊົນ ແລກປ່ຽນປະສົບການກ່ຽວກັບວຽກງານສື່ມວນຊົນ, ປະສານງານຊ່ວຍເຫຼືອອົງການສື່ມວນຊົນ ໃນສອງແຂວງເພື່ອຍົກລະດັບການໂຄສະນາ ພາບລັກ, ເອກະລັກສະເພາະຂອງສອງແຂວງ: ແຂວງບິງດິ້ງ ສ.ສ.ຫວຽດນາມ ແລະ ແຂວງ ຈຳປາສັກ ສ.ປ.ປ.ລາວ ຜ່ານທັງສື່ມວນຊົນ ວິທະຍຸ, ໂທລະພາບຂອງທັງສອງແຂວງໃຫ້ມີປະສິດທິຜົນ ແລະ ແຂງແຮງຂຶ້ນກ່ວາເກົ່າ.

4. ປະສານສົມທົບກັນ ໃນການພິມຈຳໜ່າຍຜະລິດຕະພັນສື່, ເອກະສານຕ່າງໆດ້ວຍສອງພາສາ:ພາສາຫວຽດ - ພາສາລາວເພື່ອເປັນການໂຄສະນາເຜີຍແຜ່ກ່ຽວກັບທ່າແຮງຄວາມສາມາດບົ່ມຊ້ອນ, ພາບລັກທີ່ເປັນເອກະລັກສະເພາະຂອງສອງແຂວງບິ່ງດິ໋ງ ( ສສ ຫວຽດນາມ ) ແລະ ແຂວງຈຳປາສັກ ( ສປປ ລາວ ) ຈຳໜ່າຍຢູ່ທັງສອງແຂວງ.

5. ປະສານສົມທົບກັນໃນການຈັດຕັ້ງຝຶກອົບຮົມການບໍາລຸງສ້າງພະນັກງານວິຊາການ, ວິຊາສະເພາະດ້ານການຂ່າວ, ບັນນາທິການ, ນາຍຊ່າງເຕັກນິກ, IT ແລະ ການຄຸ້ມຄອງວຽກງານຖະແຫຼງຂ່າວ ແລະ ສື່ມວນຊົນ.

6. ສອງຝ່າຍເຫັນດີສະໜອງຂໍ້ມູນຂ່າວສານເຊິ່ງກັນແລະກັນກ່ຽວກັບທ່າແຮງ, ຄວາມສາມາດບົ່ມຊ້ອນ ແລະ ໂອກາດການລົງທຶນ, ເຮັດທຸລະກິດ, ນະໂຍບາຍ ແລະ ກົນໄກການສະໜັບສະໜູນ ເພື່ອດຶງດູດການລົງທຶນຂອງສອງແຂວງໃຫ້ແກ່ນັກທຸລະກິດສອງຝ່າຍໃນບັນດາຂົງເຂດເຊັ່ນ: ສະໜອງຂໍ້ມູນຂ່າວສານ, ສື່ມວນຊົນ, ການພິມຈຳໜ່າຍຜະລິດຕະພັນສື່ມວນຊົນ.


ພາບ ແລະ ຂ່າວ: ວິທະຍຸກະຈາຍສຽງຈໍາປາສັກ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.