Header Ads

ນະຄອນຫຼວງ ກຽມປິດຮ້ານບັນເທີງດາວຄຳ ຕາມຄຳສັ່ງຂອງເຈົ້າຄອງນະຄອນຫຼວງວຽງຈັນ



ອີງຕາມການລາຍງານຂ່າວຂອງ ຫນັງສືພິມລາວພັດທະນາ ລົງວັນວັນທີ 6 ກັນຍາ 2017 ວ່າ: ພະແນກຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ກຽມສັ່ງປິດຮ້ານບັນເທີງດາວຄຳ, ຢູ່ບ້ານນາຄຳ ເມືອງສີໂຄດຕະບອງ ນະຄອນຫຼວງວຽງຈັນ ຕາມຄຳສັ່ງຂອງເຈົ້າຄອງນະຄອນຫຼວງວຽງຈັນ.


ການສັ່ງປິດ ແມ່ນມີຂຶ້ນພາຍຫຼັງມີສະພາບຄວາມບໍ່ສະຫງົບເກີດຂື້ນຫຼາຍຄັ້ງ ແລະ ບໍ່ປະຕິບັດຕາມລະບຽບຄຳສັ່ງຂອງຂັ້ນເທິງ ຄື: ໄລຍະຜ່ານມາ, ການເຄື່ອນໄຫວດຳເນີນທຸລະກິດຂອງຮ້ານບັນເທີງດາວຄຳແມ່ນມີເຫດການກໍ່ຄວາມບໍ່ສະຫງົບອາລະວາດຕີກັນ.

ດັ່ງນັ້ນ, ພະແນກຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວນະຄອນຫຼວງວຽງຈັນ ກໍໄດ້ເຕືອນຫຼາຍຄັ້ງຄື: ຄັ້ງທີ 1 ໄດ້ອອກແຈ້ງການສະບັບເລກທີ 0878/ຖວທ.ນວ ລົງວັນທີ 30/4/2015 ໃຫ້ຢຸດຕິກິດຈະການຫ້ອງບັນເທີງ-ຄາລາໂອເກະຊົ່ວຄາວ
- ຄັ້ງທີ 2 ໄດ້ມີແຈ້ງການສະບັບເລກທີ 1043/ຖວທ.ນວ ລົງວັນທີ 12/6/2016 ວ່າດ້ວຍການຖອນໃບອະນຸຍາດດຳເນີນທຸລະກິດຫ້ອງບັນເທີງ-ຄາລາໂອເກະ.
- ຄັ້ງທີ 3 ໄດ້ມີແຈ້ງການສະບັບເລກທີ 0435/ຖວທ.ນວ ລົງວັນທີ 6/1/2016 ໃຫ້ຢຸດຕິການຕໍ່ອະນຸຍາດດຳເນີນທຸລະກິດຫ້ອງບັນເທີງດາວຄຳປະຈຳປີ 2016

- ມາໃນວັນທີ 14/2/2017 ເວລາປະມານ 12:15 ໂມງຢູ່ຫ້ອງບັນເທີງດາວຄຳໄດ້ເກີດເຫດການກໍ່ຄວາມບໍ່ສະຫງົບອີກຄັ້ງ, ໂດຍມີການໃຊ້ອາວຸດປືນຍິງກັນເຮັດໃຫ້ມີຜູ້ເສຍຊີວິດ 1 ຄົນ ແລະ ບາດເຈັບ 3 ຄົນ,

 
 - ມາຮອດວັນທີ 17/4/2017 ຈຶ່ງໄດ້ມີຄຳສັ່ງເຈົ້າຄອງນະຄອນຫຼວງວຽງຈັນ ສະບັບເລກທີ 03/ຈນວ ວ່າດ້ວຍການຢຸດຕິດຳເນີນກິດຈະການຫ້ອງບັນເທີງດາວຄຳ ແລະ ຜ່ານການຕິດຕາມກວດກາຂອງຄະນະກຳມະການສະເພາະກິດແກ້ໄຂປາກົດການຫຍໍ້ທໍ້ທາງດ້ານວັດທະນະທຳ-ສັງຄົມເຫັນວ່າ ກິດຈະການດັ່ງກ່າວຍັງຄົງສືບຕໍ່ດຳເນີນທຸລະກິດປົກກະຕິ ໂດຍບໍ່ປະຕິບັດຕາມການຊີ້ນຳ ແລະ ຄຳສັ່ງຂອງຂັ້ນເທີງໃນການໃຫ້ຢຸດຕິດຳເນີນທຸລະກິດດັ່ງກ່າວ ແລະ ເມື່ອບໍ່ດົນມານີ້, ພະແນກຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວນະຄອນຫຼວງ ກໍໄດ້ຈັດກອງປະຊຸມປຶກສາຫາລືການປະຕິບັດຄຳສັ່ງຂອງເຈົ້າຄອງນະຄອນຫຼວງວຽງຈັນໃນບັນຫາດັ່ງກ່າວໃຫ້ເຂັ້ມງວດ.

 
 

ທີ່ມາ: ຫນັງສືພິມລາວພັດທະນາ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.