Header Ads

ເຈົ້າໜ້າທີ່ຈັບຜູ້ລັກລອບຊື້-ຂາຍຢາເສບຕິດ ພ້ອມຂອງກາງຢາບ້າໄດ້ 86.000 ເມັດ ທີ່ເມືອງ ເມືອງສິງ ແຂວງຫຼວງນໍ້າທາ




ອີງຕາມການລາຍງານຂ່າວຂອງ ຫນັງສືພິມຄວາມສະຫງົບ ວ່າ: ພະແນກຕຳຫຼວດ ສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງນໍ້າທາ ໄດ້ນໍາກໍາລັງເຂົ້າຈັບຕົວຜູ້ລັກລອບຊື້-ຂາຍຢາເສບຕິດ ໃນຂະນະທີນັດສົ່ງຢາບ້າໃຫ້ກັນ ຢູ່ສວນຫຼັກເມືອງ ເມືອງສິງ ແຂວງຫຼວງນໍ້າທາ ຢຶດຢາບ້າໄດ້ 86.000 ເມັດ ໃນວັນທີ 4 ກັນຍາ 2017 ພ້ອມທັງກັກຕົວຜູ້ຖືກຫາໄດ້ 2 ຄົນ ໄປສອບສວນຂະຫຍາຍພຜົນຫາຜູ້ຮ່ວມຂະບວນການນໍາກັນ.

ເຈົ້າໜ້າທີວິຊາສະເພາະ ປກສ ແຂວງຫຼວງນໍ້າທາ ເປີດເຜີຍວ່າ: ພາຍຫຼັງໄດ້ຮັບລາຍງານຈາກພົນລະເມືອງດີ ວ່າ: ໃນວັນທີ 4 ກັນຍາ 2017 ຈະມີກຸ່ມຄົນບໍ່ດີຈຳນວນໜຶ່ງ ລັກລອບເຄື່ອນໄຫວຄ້າຂາຍ ແລະ ຂົນສົ່ງຢາເສບຕິດ ປະເພດຢາບ້າ ຢູ່ຂອບເຂດສວນຫຼັກເມືອງ ເມືອງສິງ ແຂວງຫຼວງນໍ້າທາ. ຈາກນັ້ນ, ຈຶ່ງໄດ້ຈັດກຳລັງ ວິຊາສະເພາະ ຕິດຕາມເກັບກຳຂໍ້ມູນຈາກແຫຼ່ງຂ່າວ. ຜ່ານການຕິດຕາມຕົວຈິງ ເຫັນວ່າມີມູນຄວາມຈິງ ຈຶ່ງວາງແຜນມ້າງຄະດີດັ່ງກ່າວ ຈົນມາຮອດເວລາ 12 ໂມງ ວັນດຽວກັນ ຈຶ່ງເຫັນເປົ້າໝາຍ 2 ຄົນ ຂີ່ລົດຈັກໄປຈອດຢູ່ສ່ວນຫຼັກເມືອງ ຈາກນັ້ນ ເຈົ້າໜ້າທີ່ຕໍາຫຼວດ ຈຶ່ງເຂົ້າຈັບຕົວໄດ້ 2 ຄົນ ຊື່ ທ້າວ ສອນຄຳ ອາຍຸ 24 ປີ ຢູ່ບ້ານຈອມໝອກ ແລະ ທ້າວ ອາລີ ອາຍຸ 22 ປີ ຢູ່ບ້ານພະຍາຫຼວງ ທັງສອງຄົນ ຢູ່ເມືອງລອງ ແຂວງຫຼວງນໍ້າທາ ພ້ອມທັງກວດຄົ້ນພົບເຫັນຢາບ້າ 43 ມັດ ເທົ່າກັບ 86.000 ເມັດ ຊຸກເຊື່ອງໄວ້ໃນເປົາ, ໂທລະສັບມືຖື 3 ໜ່ວຍ ແລະ ລົດຈັກ 2 ຄັນ.

ຜ່ານການສືບສວນ-ສອບສວນ ຜູ້ຖືກຫາທັງສອງຮັບສາລະພາບ ວ່າ: ຢາບ້າຈຳນວນດັ່ງກ່າວ ແມ່ນຂອງພວກຕົນແທ້ ເຊິ່ງໄດ້ສັ່ງຊື້ມາຈາກຄົນປະເທດເພື່ອນບ້ານ (ພະມ້າ) ຈຳນວນ 43 ມັດ ເທົ່າກັບ 86.000 ເມັດ ແລ້ວຈະໄປຂາຍໃຫ້ຜູ້ສັ່ງຊື້ ຢູ່ເມືອງສິງ ໂດຍນັດສົ່ງໃຫ້ກັນຢູ່ສວນຫຼັກເມືອງ ແຕ່ບໍ່ທັນໄດ້ຂາຍ ຈຶ່ງຖືກເຈົ້າໜ້າທີ່ ຈັບຕົວໄດ້ພ້ອມຂອງກາງຈໍານວນດັ່ງກ່າວ. ປັດຈຸບັນເຈົ້າໜ້າທີ່ ກໍາລັງເລັ່ງດຳເນີນການສືບສວນ-ສອບສວນ ເພື່ອຫາກຸ່ມແກ້ງຜູ້ຮ່ວມຂະບວນການ ມາດຳເນີນຄະດີຕາມລະບຽບກົດໝາຍ.

ພາບ ແລະ ຂ່າວ: ຫນັງສືພິມຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.