Header Ads

ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ນໍາຕົວຜູ້ຖືກຫາ 02 ລາຍ ພ້ອມດ້ວຍຂອງກາງຈໍານວນ 480 ມັດ ເທົ່າກັບ 960.000 ເມັດ (6 ເປົາ) ມາທໍາການສືບສວນ-ສອບສວນ




ໃນວັນທີ 24 ກັນຍາ ນີ້ ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ໄດ້ນໍາຕົວຜູ້ຖືກຫາ 02 ລາຍ ຊື່ທ້າວ ເຢະປໍວ່າ ອາຍຸ 42 ປີ ແລະ ນາງ ໄມວາງວື ອາຍຸ 20 ປີ ທັງສອງ ເປັນຜົວເມຍກັນ ມີອາຊີບເຮັດນາ ສາດສະໜາຜີ ອາໃສຢູ່ບ້ານຈອມຈຸກ ເມືອງຫ້ວຍຊາຍ ແຂວງບໍ່ແກ້ວ ພ້ອມດ້ວຍຂອງກາງຢາເສບຕິດ (ປະເພດຢາບ້າ) ຈໍານວນ 480 ມັດ ເທົ່າກັບ 960.000 ເມັດ ມາທໍາການສືບສວນ-ສອບສວນ ຢູ່ທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ.






ໃນຄັ້ງວັນທີ 23 ກັນຍາ 2017 ນີ້ ທາງເຈົ້າໜ້າທີ່ ປກສ ເມືອງປາກທາ ໄດ້ຮັບແຫຼ່ງຂາວຈາກພົນລະເມືອງດີວ່າ: ຈະມີການເຄື່ອນໄຫວຂົນສົ່ງຢາເສບຕິດ ຈາກເມືອງຄອບ ແຂວງໄຊຍະບູລີໄປເມືອງຫ້ວຍຊາຍ. ດັ່ງນັ້ນ, ທາງກອງບັນຊາການ ປກສ ເມືອງປາກທາ ຈຶ່ງໄດ້ແຕ່ງຕັ້ງເຈົ້າໜ້າທີ່ໜ່ວຍສະເພາະກິດລົງກວດກາ-ຕິດຕາມເປົ້າໝາຍ ແລະ ໄດ້ພົບເຫັນລົດວີໂກສີຂາວ ປ້າຍທະບຽນ ກໍາແພງນະຄອນ ມດ 9992 ຂັບຂີ່ໂດຍທ້າວ ເຢະປໍວ່າ ອາຍຸ 42 ປີ ແລະ ນາງ ໄມວາງວື ອາຍຸ 20 ປີ. ດັ່ງນັ້ນເຈົ້າໜ້າທີ່ຈຶ່ງໄດ້ທຳການກວດຄົ້ນ ແລະ ໄດ້ພົບເຫັນຢາເສບຕິດ (ປະເພດຢາບ້າ) ຈໍານວນ 06 ເປົາ ລວມມີ 480 ມັດ ເທົ່າກັບ 960.000 ເມັດ ຊຸກເຊື່ອງໄວ້ເບາະນັ່ງດ້ານຫຼັງ. 





ສະນັ້ນ, ທາງເຈົ້າໜ້າທີ່ຂອງພວກເຮົາຈຶ່ງໄດ້ກັກຕົວພວກກ່ຽວມາທຳການສືບສວນ-ສອບສວນ. ຜ່ານການສືບສວນ-ສອບສວນໃນເບື້ອງຕົ້ນພວກກ່ຽວໄດ້ຮັບສາລະພາບວ່າ: ຢາບ້າຈໍານວນດັ່ງກ່າວແມ່ນຢູ່ໃນການຄອບຄອງຂອງພວກກ່ຽວແທ້ ເຊິ່ງໄດ້ມີບຸກຄົນບໍ່ຮູ້ຊື່ມາຕິດຕໍ່ໃຫ້ຂົນຢາຈາກເມືອງຄອບ ແຂວງໄຊຍະບູລີ ມາເມືອງຫ້ວຍຊາຍ ແຂວງບໍ່ແກ້ວ ໂດຍຕົກລົງຮັບຄ່າຈ້າງມັດລະ 2000 ບາດ ເມືອໄປຮອດຈຸດນັດສົ່ງ ຈຶ່ງໄດ້ຮັບເງິນຄ່າຈ້າງ. ຈາກນັ້ນ, ໃນວັນທີ 23 ກັນຍາ 2017 ທ້າວ ເຢະປໍວ່າ ພ້ອມກັບເມຍ ນາງໄມວາງວື ຈຶ່ງໄດ້ເດີນທາງອອກຈາກບ້ານ ເວລາ 05 ໂມງເຊົ້າ ມຸ້ງໜ້າໄປຈຸດນັດໝາຍ ເມືອງຄອບ ແຂວງໄຊຍະບູລີ ເມື່ອໄປຮອດຈຸດນັດໝາຍ ເວລາ ປະມານ 12:30 ນາທີ ກໍ່ມີຄົນຂົນຢາບ້າຈໍານວນດັ່ງກ່າວມາໃສ່ລົດໃຫ້. ພາຍຫຼັງສໍາເລັດແລ້ວ ພວກກ່ຽວກໍ່ໄດ້ຂັບລົດອອກຈາກທຈຸດນັດໝາຍມຸ້ງໜ້າເຂົ້າມາເມືອງປາກທາ ເພື່ອຈະເຂົ້າສູ່ເມືອງຫ້ວຍຊາຍ ພໍມາຮອດສົ້ນຂວາ ບ້ານໂພນທອງ ເມືອງປາກທາ ກໍ່ຖືກເຈົ້າໜ້າທີ່ກັກຕົວ.








ປັດຈຸບັນທາງເຈົ້າໜ້າທີ່ ປກສ ແຂວງບໍ່ແກ້ວຈຶ່ງໄດ້ກັກຕົວພວກກ່ຽວໄວ້ເພື່ອທຳການສືບສວນ-ສອບສວນຂະຫຍາຍຜົນຫາກຸ່ມແກ້ງຄ້າຂາຍຢາເສບຕິດລາຍນີ້ມາດໍາເນີນຄະດີຕາມລະບຽບກົດໝາຍຕໍ່ໄປ.


ຂ່າວ: ຮຕ ນາຊູ ອິນທະບັນດິດ/ປກສ ແຂວງບໍ່ແກ້ວ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




loading...

No comments

Powered by Blogger.