Header Ads

ມອບ-ຮັບ ໜ້າທີ່ຜູ້ບໍລິຫານລະດັບສູງ ພາຍໃນກະຊວງສຶກສາ



ໜັງສືພິມເສດຖະກິດ-ການຄ້າ : ການມອບ-ຮັບໜ້າທີ່ຜູ້ບໍລິຫານລະດັບສູງພາຍໃນກະຊວງສຶກສາທິການ ແລະ ກິລາຄັ້ງນີ້, ປະກອບມີ: ຫົວໜ້າຫ້ອງການກະຊວງ, ຫົວໜ້າກົມຈັດຕັ້ງ-ພະນັກງານ, ກົມພົວພັນຕ່າງປະເທດ, ກົມກວດກາ, ກົມການເງິນ ແລະ ຜູ້ອໍານວຍການສະຖາບັນ.

ໃນນີ້, ທ່ານ ຮສ.ປອ ສີສະໝອນ ສິດທິຣາດວົງສາ ຫົວໜ້າຫ້ອງການກະຊວງ ໄດ້ມອບໜ້າທີ່ວຽກງານຕ່າງໆຂອງຫ້ອງການໃຫ້ແກ່ທ່ານ ນາງ ຂັນທະລີ ສີຣິພົງພັນ ຮັບຜິດຊອບເປັນຫົວໜ້າ ຫ້ອງການກະຊວງ; ທ່ານ ຈັນສະໝຸດ ແກ້ວສຸດທາ ຫົວໜ້າກົມຈັດຕັ້ງ-ພະນັກງານ ມອບໜ້າທີ່ວຽກງານຂອງກົມຈັດຕັ້ງໃຫ້ແກ່ທ່ານນາງ ວຽງແກ້ວ ພົມມະວົງ ເປັນຜູ້ວ່າການຫົວໜ້າກົມຈັດຕັ້ງ-ພະນັກງານ; ທ່ານ ປອ. ຈັນທະວອນ ພັນດໍານອງ ຫົວໜ້າກົມພົວພັນຕ່າງປະເທດ ມອບໜ້າທີ່ວຽກງານ ຂອງກົມພົວພັນຕ່າງປະເທດໃຫ້ແກ່ ທ່ານ ຮສ.ປອ ສີສະໝອນ ສິດທິຣາດວົງສາ ເປັນຫົວໜ້າກົມພົວພັນຕ່າງປະເທດ; ທ່ານ ນາງ ຂັນທະລີ ສີຣິພົງພັນ ຫົວໜ້າກົມກວດກາ ມອບໜ້າທີ່ວຽກງານຂອງກົມກວດກາໃຫ້ແກ່ທ່ານ ສີຊະນະ ບຸບຜາ ເປັນຫົວໜ້າກົມກວດກາ; ທ່ານ ສີຊະນະ ບຸບຜາ ຫົວໜ້າກົມການເງິນ ມອບໜ້າທີ່ວຽກງານຂອງກົມການເງິນໃຫ້ແກ່ທ່ານ ນາງ ດາລາ ພະກອນຄໍາ ເປັນຜູ້ວ່າການຫົວໜ້າກົມການເງິນ; ທ່ານ ສຸລິຄໍາກອນ ສີສຸລາດ ຜູ້ວ່າການອໍານວຍການ ສະຖາບັນພັດທະນາການບໍລິຫານການສຶກສາ ມອບໜ້າທີ່ວຽກງານຂອງສະຖາບັນພັດທະນາການບໍລິຫານການສຶກສາໃຫ້ແກ່ ທ່ານ ຈັນສະໝຸດ ແກ້ວສຸດທາ ເປັນຜູ້ອໍານວຍການສະຖາບັນການພັດທະນາ ການບໍລິຫານການສຶກສາກະຊວງສຶກສາທິການ ແລະ ກີລາ.

ສ່ວນລາຍລະອຽດຂອງວຽກງານຕ່າງໆທີ່ຫົວໜ້າຫ້ອງການ, ຫົວໜ້າກົມຈັດຕັ້ງ-ພະນັກງານ, ກົມພົວພັນຕ່າງປະເທດ, ກົມກວດກາ, ກົມການເງິນ ແລະ ຜູ້ອໍານວຍການສະຖາບັນທີ່ຈະສືບຕໍ່ນັ້ນໃຫ້ປະຕິບັດຕາມພາລະບົດບາດ ຂອງພາກສ່ວນດັ່ງກ່າວທີ່ໄດ້ກໍານົດໄວ້ ແລະ ປະຕິບັດຕາມເອກະສານ ຕ່າງໆທີ່ສະຫຼຸບສັງລວມໄວ້.


ໂອກາດນີ້, ທ່ານ ຮສ.ປອ ກອງສີ ແສງມະນີ, ຮອງລັດຖະມົນຕີກະຊວງສຶກສາທິການ ແລະ ກີລາ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ຄະນະນຳດັ່ງກ່າວ ທີ່ໄດ້ຮັບການແຕ່ງຕັ້ງ, ຍົກຍ້າຍໃຫ້ເຮັດໜ້າທີ່ໃໝ່ ພ້ອມທັງເນັ້ນໃຫ້ຜູ້ທີ່ເປັນຫົວໜ້າຕ້ອງສະແດງຄວາມເປັນແບບຢ່າງ ແຕ່ບໍ່ແມ່ນຜະເດັດການ ຫຼື ອາດຍາສິດ, ຕ້ອງຫ້າວຫັນ, ມີຫົວຄິດປະດິດສ້າງ, ກ້າຕັດສິນໃຈໃນຂອບເຂດທີ່ຕົນຮັບຜິດຊອບ, ຜິດຕ້ອງຍອມຮັບ, ຖືກຕ້ອງຍ້ອງຍໍຊົມເຊີຍ ແລະ ບັນດາສະຫາຍທີ່ໄດ້ຖືກຍົກຍ້າຍ ແລະ ຜູ້ຮັບໜ້າທີ່ໃໝ່ ຂໍໃຫ້ມີຄວາມຕັດສິນໃຈຢ່າງເດັດດ່ຽວ ເພື່ອເຮັດໃຫ້ວຽກງານການສຶກສາ ແລະ ກິລາ ມີການພັດທະນາດີຂຶ້ນເລື້ອຍໆ.


ຂ່າວ: ໜັງສືພິມເສດຖະກິດ-ການຄ້າ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.