Header Ads

“ຄູສອນ” ລົ້ນຕະຫຼາດແຮງງານ ແລ້ວພວກເຂົາຈະໄປເຮັດຫຍັງບາດນິ?



ນີ້ແມ່ນປະເດັນທີ່ ໜັງສືພິມເສດຖະກິດການຄ້າ ຍົກຂື້ນມາເປັນກະທຸສໍາລັບຄົ້ນຄິດ ແລະ ຊອກຫາຄໍາຕອບ ແລະ ເປັນຂອດທີ່ສໍາຄັນໃນການພັດທະນາໃນອະນາຄົດ  ຫຼື ນີ້ອາດແມ່ນ " ປະກົດການເຫຼືອບໍ່ພໍ " ເຊິ່ງເຂດໃນເມືອງອາດລົ້ນ ແຕ່ເຂດໂຮງຮຽນນອກຕົວເມືອງ ຫຼື ຫ່າງໄກສອກຫຼິ້ກກັບຍັງບໍ່ພໍ.​

ໜັງສືພິມເສດຖະກິດການຄ້າ ກ່າວວ່າ : ຄູເປັນແມ່ພິມຂອງຊາດ ທີ່ເປັນຜູ້ສິດສອນລູກຫຼານຂອງພວກເຮົານັບແຕ່ນ້ອຍຈົນໃຫຍ່ ເຮັດໃຫ້ເຂົາເຈົ້າມີຄວາມຮູ້, ຄວາມສາມາດ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົນໃນທຸກຍຸກສະໄໝນັບຕັ້ງແຕ່ອະດີຈົນເຖິງປັດຈຸບັນ, ແຕ່ມາເຖິງໄລຍະນີ້ ນັກສຶກສາທີ່ຮຽນຈົບສາຍສາຍຄູຕ່າງໆພັດມີຫຼາຍ. ຫຼ້າສຸດ, ວິທະຍາໄລຄູສະຫວັນນະເຂດ ກໍ່ໄດ້ປະກາດເມື່ອວັນທີ 18 ກັນຍາ ຜ່ານມານີ້ວ່າ: ໃນ 4 ສາຂາວິຊາຄື: (ວິທະຍາສາດ​ທຳ​ມະ​ຊາດ, ວິທະຍາສາດ​ສັງຄົມ, ​ພາສາ​ຕ່າງປະ​ເທດ ​ແລະ​ ​ອະນຸບານ​ປະຖົມ) ໄດ້ສ້າງພະນັກງານຄູອອກຮັບໃຊ້ສັງຄົມ ຈຳນວນ 1,251 ຄົນແລ້ວ.

ກອງ​ປະຊຸມ​ ການຈັດ​ຕັ້ງ​ປະຕິບັດແຜນ​ພັດທະນາ​ວິທະຍາ​ໄລ​ຄູ​ ສະຫວັນ​ນະ​ເຂດ ປະຈຳ​ສົກ​ຮຽນ 2016-2017 ​ໄດ້​ຈັດ​ຂຶ້ນ​ໃນ​ວັນ​ທີ 18 ກັນຍາ 2017. ໂດຍ​ການ​ເປັນ​ປະທານ​ຂອງ​ ທ່ານ ລັດສະໝີ ພະ​ໄຊ​ສີ ອຳນວຍ​ການ​ວິທະຍາໄລ ສະຫວັນນະເຂດ, ມີ​ບັນດາ​ຄະນະ​ອຳນວຍ​ການ, ຄູ​ອາຈານ, ພະນັກງານ​ວິຊາ​ການ​ເຂົ້າ​ຮ່ວມ.

ໂອກາດດຽວກັນ, ທ່ານ ລັດ​ສະໝີ ພະ​ໄຊ​ສີ ໄດ້ກ່າວວ່າ: ການຈັດ​ຕັ້ງ​ປະຕິບັດ​ໜ້າ​ທີ່​ວຽກ​ງານ ​ສົກ​ປີຜ່ານມານີ້ ເຫັນວ່າທາງ​ພະນັກງານ, ຄູ–ອາຈານ ​ໄດ້​ເອົາ​ໃຈ​ໃສ່​ປະຕິບັດ​ໜ້າ​ທີ່​ວິຊາ​ສະ​ເພາະ​ຢ່າງ​ຕັ້ງໜ້າ, ​ເປັນ​ຕົ້ນ: ​ເອົາ​ໃຈ​ໃສ່​ໃນ​ການ​ປັບປຸງ​ການ​ຮຽນ–ການ​ສອນ, ຝຶກ​ອົບຮົມ​ຄູ ​ແລະ ​ການ​ຍົກ​ລະດັບ​ຄູ​ສອນ ​ໂດຍ​ການ​ຮ່ວມ​ໂມງ​ສອນ, ຖອດ​ຖອນ​ບົດຮຽນ, ​ເຂົ້າ​ຮ່ວມ​ປະຊຸມ, ສຳ​ມະ​ນາ​ໂຄງການ​ຕ່າງໆ, ນອກຈາກ​ນັ້ນ ບັນດາ​ພະນັກງານ​ຄູ–ອາຈານ​ຈຳນວນ​ໜຶ່ງຍັງ​ໄດ້​ໄປ​ຝຶກ​ອັບ​ຮົມ​ໄລຍະ​ສັ້ນ, ​ໄລຍະ​ຍາວ​ທັງ​ພາຍ​ໃນ ​ແລະ ​ຕ່າງປະ​ເທດ, ຖອດຖອນ​ບົດຮຽນ​ນຳ​ສະ​ຖາ​ບັນ​ສ້າງ​ຄູ​ດ້ວຍ​ກັນ. ອັນ​ທີ່​ພົ້ນ​ເດັ່ນ​ແມ່ນ​ໄດ້​ສຳ​ເລັດ​ການ​ສ້າງ​ພະນັກງານ​ຄູ ຈຳນວນ 1.251 ຄົນ ​ເພື່ອ​ອອກ​ຮັບ​ໃຊ້​ສັງຄົມ.

ທ່ານ ນາງ ​ໃສ​ຊົມ​ຊື່ນ ​ໂພທິ​ສານ, ຮອງ​ອຳນວຍ​ການ ໄດ້​ລາຍ​ງານ​ໃຫ້​ຮູ້​ວ່າ: ວິທະຍາ​ໄລ​ຄູ​ ສະຫວັນ​ນະ​ເຂດ ມີໜ້າ​ທີ່​ຫລັກ​ໃນ​ການ​ສ້າງ​ຄູໃນ​ລະດັບ​ອະນຸບານ​ສຶກສາ, ປະຖົມ​ສຶກສາ, ມັດທະຍົມ​ສຶກສາ, ຍົກ​ລະດັບ​ຄູທີ່​ມີ​ວຸດ​ທິຊັ້ນ​ຕົ້ນເປັນ​ຊັ້ນ​ກາງ, ຈາກ​ຊັ້ນ​ກາງເປັນ​ຊັ້ນ​ສູງ ​ໃຫ້​ຄູ​ຈາກ​ສອງ​ແຂວງ​ຄື: ສະຫວັນ​ນະ​ເຂດ, ຄຳ​ມ່ວນ.
ປະຈຸ​ບັນ​ ພະນັກງານ​ຄູ–ອາຈານ ພາຍ​ໃນ​ວິທະຍາ​ໄລ​ຄູ​ ສະຫວັນ​ນະ​ເຂດ ມີ​ທັງ​ໝົດ 214 ຄົນ, ຍິງ 111 ຄົນ, ມີ​ນັກ​ສຶກສາ​ທັງ​ໝົດ 2.636 ຄົນ ແລະ 4 ສາຍ​ຮຽນ​ຄື: ​ວິທະຍາສາດ​ທຳ​ມະ​ຊາດ, ​ວິທະຍາສາດ​ສັງຄົມ, ພາສາ​ຕ່າງປະ​ເທດ ​ແລະ ​ ອະນຸບານ​ປະຖົມ ເຊິ່ງພວມໄດ້ຮັບຄວາມນິຍົມສູງ.

ແລ້ວຄຳຖາມທີ່ຕາມມາຂອງຜູ້ປົກຄອງ ກໍ່ຄືນັກສຶກສາຜູ້ຮຽນຈົບຄູມາຈະໄດ້ເຂົ້າເຮັດວຽກຢູ່ໃນໂຮງຮຽນໃດນັ້ນ? ກໍ່ຍັງເປັນຄຳຖາມທີ່ຕ້ອງການຄຳຕອບດ່ວນທີ່ສຸດ, ເນື່ອງຈາກລັດຖະບານມີໂກຕ້າຮັບພະນັກງານຄູໃນແຕ່ລະປີກໍ່່ມີຈຳກັດ ເຊິ່ງບໍ່ພຽງແຕ່ໃນຂະແໜງສຶກສາເທົ່ານັ້ນ, ຂະແໜງການອື່ນກໍ່ເຊັ່ນກັນ; ເຖິງວ່າຜູ້ທີ່ຮຽນຈົບມາຈະປະກອບສ່ວນເຂົ້າໃນການເປັນອາສາສະໝັກ ຫຼື ສອນຢູ່ໂຮງຮຽນເອກກະຊົນຕ່່າງໆກໍ່ຕາມ ແຕ່ກໍ່ຖືວ່າອາຊີບນີ້ຍັງວ່າງວຽກເປັນຈຳນວນຫຼາຍ ເພາະນັກສຶກສາທີ່ຈົບຄູມາໃນແຕ່ລະປີມີຫຼາຍເກີນກວ່າຕະຫຼາດແຮງງານຕ້ອງການໃນເວລານີ້ ຈຶ່ງເຮັດໃຫ້ຄວາມຝັນຂອງຫຼາຍຄົນທີ່ຢາກເປັນຄູເລີ່ມຖົດຖອຍ ເນື່ອງຈາກຈົບມາແລ້ວພັດບໍ່ໄດ້ເຮັດວຽກໃນວິຊາທີ່ຕົນຮຽນມາ.

ທີ່ມາ : ເສດຖະກິດການຄ້າ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.