Header Ads

ກະຊວງສຶກສາທິການ ແລະ ກິລາປະກາດ ຮັບຮອງເມືອງວຽງຄຳ ເປັນເມືອງຈົບຊັ້ນມັດທະຍົມຕອນຕັ້ນບຳລຸງ



ພິທີປະກາດຈົບຊັ້ນມັດທະຍົມຕອນຕົ້ນບຳລຸງທົ່ວເມືອງວຽງຄຳ ໄດ້ຈັດຂຶ້ນໃນວັນທີ 25 ກັນຍາ 2017 ນີ້ ທີ່ສະໂມສອນໃຫຍ່ຂອງເມືອງ ໂດຍການເປັນປະທານຂອງທ່ານ ຮອງສາດສະດາຈານ ປະລີນຍາເອກ ຄຳຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງຫຼວງພະບາງ, ທ່ານ ອ່ອນຕາ ວັນນະຈັກ ເຈົ້າເມືອງວຽງຄຳ, ມີຜູ້ຕາງໜ້າຈາກົມ, ພະແນກການກົມກອງ, ສະຖາບັນການສືກສາ ຂອງແຂວງ, ຫ້ອງການຂອງເມືອງ, ຕະຫຼອດຮອດພະນັກງານ, ທະຫານ, ຕຳຫຼວດ, ອົງການຈັດຕັ້ງບ້ານ, ຜູ້ບໍລິຫານການສຶກສາ ແລະ ປະຊາຊົນບັນດາເຜົ່າພາຍໃນເມືອງວຽງຄຳເຂົ້າຮ່ວມ. ທ່ານ ທະລາກອນ ບໍລະວົງ ຫົວໜ້າຫ້ອງການສຶກສາທິການ ແລະ ກິລາເມືອງວຽງຄຳ ໄດ້ຂຶ້ນຜ່ານບົດສະຫຼຸບການຈັດຕັ້ງການຮຽນ-ການສອນ ແລະ ແຜນບໍາລຸງຍົກລະດັບການສຶກສາ ຊັ້ນມັດທະຍົມຕອນຕົ້ນ ໃຫ້ປະຊາຊົນໃນທົ່ວເມືອງ ທ່ານໃຫ້ຮູ້ວ່າ: ເມືອງວຽງຄຳ ມີ 71 ບ້ານ 4.983 ຄອບຄົວ ພົນລະເມືອງ 29.470 ຄົນ, ຍິງ 14.556 ຄົນ ປະກອບມີ 4 ຊົນເຜົ່າຢູ່ຮ່ວມກັນ. 



ຜ່ານມາອົງການປົກຄອງເມືອງ ໄດ້ຖືສຳຄັນການພັດທະນາການສຶກສາ ໃຫ້ໄປຕາມແນວ ທາງຂອງພັກ ແລະ ລັດຖະບານ ກໍ່ຄືຍຸທະສາດການສຶກສາທີກະຊວງສຶກສາທິການ ແລະ ກິລາວາງອອກ. ຕົ້ນຕໍ ແມ່ນການລົບລ້າງຄວາມບໍ່ຮູ້ໜັງສື, ການບຳລຸງຍົກລະດັບການສຶກສາຊັ້ນປະຖົມ ແລະ ຊັ້ນມັດທະຍົມຕົ້ນ ແນໃສ່ໃຫ້ປະຊາຊົນບັນດາເຜົ່າ ໃຫ້ມີຄວາມຮູ້ຄວາມສາມາດ ຕາມເນື້ອໃນຈິດໃຈ 4 ບຸກທະລຸ ທີ່ພັກປະຊາຊົນປະຕິວັດລາວກຳນົດໄວ້. ການບຳລຸງຍົກລະດັບການສືກສາ ຊັ້ນມັດທະຍົມຕົ້ນ ໃຫ້ປະຊາຊົນບັນດາເຜົ່າ ກຸ່ມເປົ້າໝາຍ ໃນເກນອາຍຸ 15-30 ໄດ້ເລີ້ມປະຕິບັດນັບແຕ່ສຳເລັດການບຳລຸງຊັ້ນປະຖົມ. ຜ່ານການປະເມີນຜົນ ສາມາດບັນລຸ 98,16%, ຈາກການຮຽນ-ການສອນ ໃຫ້ປະຊາຊົນບັນດາເຜົ່າ ໄດ້ເຮັດໃຫ້ຫຼາຍຄົນ, ຫຼາຍຄອບຄົວ ແລະ ຫຼາຍບ້ານ ໄດ້ກາຍເປັນບ້ານພັດທະນາ ກາຍເປັນກຳລັງແຮງ ປະກອບສ່ວນອັນສຳຄັນໃນການພັດທະນາເສດຖະກິດ-ສັງຄົມຂອງເມືອງໃຫ້ນັບມື້ດີຂຶ້ນເປັນກ້າວໆ.



ໂອກາດນີ້ ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ເປັນກຽດຂຶ້ນມອບໃບຢັ້ງຢືນເມືອງຈົບຊັ້ນມັດທະຍົມຕອນຕົ້ນບຳລຸງ ໃຫ້ແກ່ອົງການປົກຄອງເມືອງວຽງຄຳຢ່າງສົມກຽດ, ພ້ອມທັງ ມີຄຳເຫັນສະແດງຄວາມຍ້ອງຍໍຊົມຕໍ່ຜົນງານ ທີອົງການປົກຄອງເມືອງວຽງຄຳຍາດມາໄດ້ ພ້ອມຮຽກຮ້ອງຄະນະພັກ, ອົງການປົກຄອງເມືອງແຕ່ລະຂັ້ນ ສືບຕໍ່ເປັນເຈົ້າການຈັດຕັ້ງປະຕິບັດຕາມແນວທາງນະໂຍບາຍຂອງພັກ-ລັດ, ຕົ້ນຕໍແມ່ນ ການຍົກສູງດ້ານຄຸນທາດການເມືອງມີຄວາມໜັກແໜ້ນເຂັ້ມແຂງ, ມີຄວາມສາມັກຄີໃຫ້ເປັນປຶກແຜ່ນ, ເຮັດວຽກລວມສູນປະຊາທິປະໄຕ ເອົາໃຈໃສ່ສືບຕໍ່ບຳລຸງ, ຍົກລະດັບຄຸນນະພາບການສຶກສາຊັ້ນມັດທະຍົມປາຍ ໃຫ້ແກ່ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ກຸ່ມເປົ້າທົ່ວເມືອງໃຫ້ໄດ້ຮັບການສຶກສາຢ່າງທົ່ວເຖິງ ແລະ ມີຄຸນນະພາບ. ສືບຕໍ່ພັດທະນາການສຶກສາໃຫ້ມີລັກສະ ນະຮອບດ້ານ ໄປຕາມ 3 ທິດນຳ ແລະ 5 ຫຼັກມູນ ຂອງກະຊວງສຶກສາທິການ ແລະ ກິວາງວາງອອກໃຫ້ມີຜົນສຳເລັດ. ໂອກາດນີ້ຄະນະປະທານ, ການນຳທຸກຂັ້ນ ພ້ອມດ້ວຍຜູ້ແທນເຂົ້າຮ່ວມໄດ້ຮ່ວມກັນຕັດແຖບ ເປີດປ້າຍ ແລະ ລັນຄອງ 9 ບາດເພື່ອເປັນສິລິມຸງຄຸນ ໃຫ້ແກ່ການປະກາດຈົບຊັ້ນມັດທະຍົມຕອນຕົ້ນບຳລຸງທົ່ວເມືອງວຽງຄຳ ຕື່ມອີກ.


ໂດຍ: ແຫຼ້ ສຸລິນພອນ ນັກຂ່າວວິທະຍຸແຂວງ/ວິທະຍຸກະຈາຍສຽງແຫ່ງຊາດ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.