Header Ads

ລາວເຂົ້າຮ່ວມກອງປະຊຸມຄະນະຮັບຜິດຊອບຈັດການແຂ່ງຂັນສີມືແຮງງານ ອາຊຽນ ຄັ້ງທີ12



ຄະນະຜູ້ແທນຂອງ ສ ປປ ລາວ ນຳໂດຍ ທ່ານ ຄອນສີ ມະຫາວົງ, ຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມ, ເດີນທາງເຂົ້າຮ່ວມກອງປະຊຸມຄັ້ງທີ1 ຂອງຄະນະຮັບຜິດຊອບຈັດການແຂ່ງຂັນສີມືແຮງງານອາຊຽນຄັ້ງທີ 12ຫຼື the 1st Organizing Committee Meeting(OCM) for the 12th ASEAN Skills Competition(ASC) ປີ 2018, ເຊິ່ງຈັດຂຶ້ນ ລະຫວ່າງວັນທີ 11-12 ກັນຍາ 2017ທີ່ ໂຮງແຮມ ດຸສິດທານີຫົວຫີນ, ເພັດຊະບູລີ, ປະທດໄທ, ໂດຍການເປັນປະທານຂອງທ່ານ ສິຣິໄຊ ດິດສະກຸນ, ລັດຖະມົນຕີກະຊວງແຮງງານ ແຫ່ງ ປະເທດໄທ.ຈຸດປະສົງເພື່ອກຳນົດເນື້ອໃນ, ຫຼັກການ ແລະ ແຜນການ ຂອງການແຂ່ງຂັນ ນຳມາເຊິ່ງ ແນວທາງ ແລະ ບ່ອນອີງໃຫ້ແກ່ບັນດາປະເທດສະມາຊິກອາຊຽນນຳໄປສືບຕໍ່ກະກຽມຄວາມພ້ອມຂອງຕົນ.



ການແຂ່ງຂັນສີມືແຮງງານອາຊຽນມີຂຶ້ນ ທຸກໆ 2 ປີ ເຊິ່ງ ຄັ້ງທີ1 ແມ່ນຈັດຂຶ້ນທີ່ປະເທດມາເລເຊຍໃນປີ1996ໂດຍມີ4ປະເທດເຂົ້າຮວ່ມການແຂ່ງຂັນຄື : ອິນໂດເນເຊຍ, ມາເລເຊຍ, ຟິລິບປິນ ແລະ ໄທ; ຄັ້ງທີ 11, ໄດ້ຈັດຂຶ້ນໃນປີ 2016, ທີ ປະເທດມາເລເຊຍ, ແລະ ຄັ້ງທີ 13, ທີປະເທດສິງກະໂປ ໃນປີ 2020. ສຳລັບສປປລາວ, ໄດ້ເລີ່ມເຂົ້າຮ່ວມແຂ່ງຂັນຄັ້ງທີ3ທີ່ບາງກອກ, ປະເທດໄທ,ໃນປີ2001, ແລະ ໄດ້ເຂົ້າຮ່ວມຕະຫຼອດມາ ເຊິ່ງສາມາດຍາດມາໄດ້ຜົນງານຕາມຈຸດປະສົງ ແລະ ລະດັບຄາດໝາຍ ໃນແຕ່ລະຄັ້ງ ທັງ ສາ
ມາດນຳໄປຜັນຂະຫຍາຍ ແລະ ຖ່າຍທອດເຂົ້າໃນການພັດທະນາສີມືແຮງງານລາວ ໃຫ້ດີຫຍິ່ງໆຂຶ້ນ ຕາມລຳດັບ.
ກອງປະຊຸມຄັ້ງນີ້ຈັດຂຶ້ນໂດຍ ກົມພັດທະນາສີມືແຮງງານ ແຫ່ງປະເທດໄທ; ມີຜູ້ແທນຂັ້ນສູງ ແລະ ຄະນະວິຊາການກ່ຽວຂ້ອງ ຈາກບັນດາປະເທດສະມາຊິກອາຊຽນ ເຂົ້າຮ່ວມຫຼາຍກວ່າ 60 ທ່ານ.

ກອງປະຊຸມດັ່ງກ່າວ ທ່ານ ລັດຖະມົນຕີກະຊວງແຮງງານ ແຫ່ງປະເທດໄທ, ໄດ້ຍົກໃຫ້ເຫັນຄວາມໝາຍ ແລະ ຄວາມສຳຄັນຂອງການແຂ່ງຂັນສີມືແຮງງານອາຊຽນ ເຊິ່ງເປັນການຊ່ວຍພັດທະນາກຳລັງແຮງງານ ກໍຄືການພັດທະນາຊັບພະຍາກອນມະນຸດ, ການເຊື່ອມໂຍງອາຊຽນ ແລະ ພາກພື້ນ. ໃນການເຂົ້າຮ່ວມຂອງ ສ ປປ ລາວ, ຄະນະຜູ້ແທນ ໄດ້ສະແດງເຈດຈຳນົງຂອງ ສ ປປ ລາວ ຕາມທິດທາງ ແລະ ນະໂຍບາຍແຫ່ງຊາດ ໃນການປະກອບສ່ວນ ແລະ ເຂົ້າຮ່ວມແຂ່ງຂັນສີມືແຮງງານອາຊຽນ ທີ ເປັນການແລກປ່ຽນ ແລະ ສະແດງຄວາມຮູ້ ແລະ ຄວາມສາມາດຂອງຊາວໜຸ່ມໃນການພັດທະນາສີມືແຮງງານລາວທັງເປັນອີກເວທີໜຶ່ງໃນການຮັດແໜ້ນສາຍສຳພັນແລະຄວາມສາມັກຄີອັນໂອບເອື້ອອາລີເພື່ອຄວາມເປັນນໍ້າໜຶ່ງໃຈດຽວຂອງບັນດາປະເທດສະມາຊິກອາຊຽນກໍຄືການຫັນວິໃສທັດໃຫ້ເປັນຮູບປະທຳໃນຂອບຂອງອາຊຽນ.

ກອງປະຊຸມຄັ້ງນີ້ໄດ້ກຳນົດໄດ້ແຜນການແຂ່ງຂັນສີມືແຮງງານອາຊຽນຄັ້ງທີ 12 ທີ ຈະມີຂຶ້ນໃນ ລະຫວ່າງວັນທີ 26 ສິງຫາ - 4 ກັນຍາ 2018, ທີ ນົນທະບູລີ, ເຊິ່ງປະເທດໄທເປັນເຈົ້າພາບ; ມີ 24 ສາຂາວິຊາທີຈະແຂ່ງຂັນ ແລະ 1 ສາຂາວິຊາສາທິດ ໂດຍຈະມີຜູ້ເຂົ້າແຂ່ງຂັນທັງໝົດ 332 ຄົນ.

ສ່ວນລາຍລະອຽດອື່ນໆ ເຊັ່ນ: ລະບຽບການ, ນັກແຂ່ງຂັນ, ສາຂາວິຊາແຂ່ງຂັນ ຂອງແຕ່ລະປະເທດສະມາຊິກ, ຄະນະຮັບຜິດຊອບດ້ານວິຊາການຈະສືບຕໍ່ປຶກສາຫາລື ແລະ ແຈ້ງເຖິງປະເທດເຈົ້າພາບ ໃນເວລາອັນຄວນ. ສຳລັບ ສ ປປ ລາວ ໄດ້ກຳນົດແຜນການເບື້ອງຕົ້ນທີຈະສົ່ງເຂົ້າຮ່ວມແຂ່ງຂັນສີມືແຮງງານອາຊຽນຄັ້ງທີ 12, ເຊິ່ງນັບເປັນຄັ້ງທີ 10 ຂອງ ສ ປປ ລາວ, ມີ 7 ສາຂາວິຊາຄື: (1) ຊ່າງຕິດຕັ້ງໄຟຟ້າ,(2) ຊ່າງໄມ້ເຄື່ອງເຮືອນ, (3) ຊ່າງຈອດໂລຫະ, (4) ຊ່າງປຸງແຕ່ງອາຫານ,(5) ຊ່າງຕັດຫຍິບ, (6) ຊ່າງກໍ່, ແລະ (7) ຊ່າງອອກແບບເວັບໄຊໂດຍຈຳນວນນັກແຂ່ງຂັນທິມຊາດລາວຈະມີ 2 ຄົນ ຕໍ່ ສາຂາວິຊາ ທີມີອາຍຸບໍ່ເກີນ 22 ປີ ເມື່ອເຖິງ ປີ 2018 ເຊິ່ງ ກະຊວງແຮງງານ ແລະ ສະຫວັດດີການສັງຄົມ, ແລະ ພາກສ່ວນກ່ຽວຂ້ອງ ຈະຈັດງານມະຫາກຳແຂ່ງຂັນສີມືແຮງງານແຫ່ງຊາດ ໃນຕົ້ນປີ 2018 ເພື່ອຄັດເລືອກເອົາຄູຝຶກ ແລະ ນັກແຂ່ງຂັນທິມຊາດລາວ.

ຂ່າວສານແຮງງານ ແລະ ສະຫວັດດີການສັງຄົມ
ພາບ ແລະ ບົດຂ່າວ: ສຸລິສັກສຸພັນທອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.