Header Ads

ລາວ-ໄທ ຫາລືຮ່ວມກັນດ້ານ ຄວາມສະຫງົບ-ຄວາມເປັນລະບຽບຮຽບຮ້ອຍ ຕາມຊາຍແດນ



ໃນວັນທີ 26 ກັນຍາ 2017 ທີ່ ນະຄອນຫລວງວຽງຈັນ, ບັນດາເຈົ້າແຂວງ ແລະ ຜູ້ວ່າຣາຊະການ ຈັງຫວັດ ຊາຍແດນ ລາວ-ໄທ, ພ້ອມກັນປຶກສາຫາລື ແລະ ຄົ້ນຄວ້າ ເພື່ອກະກຽມເນື້ອໃນເອກະສານຕ່າງໆ ແກ່ກອງປະຊຸມ ຄະນະເຈົ້າແຂວງ ແລະ ຜູ້ວ່າ ຣາຊະການ ຈັງຫວັດຊາຍແດນ ລາວ-ໄທ ຄັ້ງທີ 10 ທີ່ຈະໄຂຂຶ້ນຢ່າງເປັນທາງການ ໃນວັນທີ 28 ກັນຍາ 2017 ນີ້.

ການຄົ້ນຄວ້າປຶກສາຫາລື ໄດ້ສຸມໃສ່ການຮ່ວມມື ຮັກສາຄວາມສະຫງົບ ແລະ ຄວາມເປັນລະບຽບ ຮຽບຮ້ອຍ ຕາມບໍລິເວນ ຊາຍແດນ, ການອຳນວຍຄວາມສະດວກ ແລະ ຄວາມປອດໄພ ໃນການເຂົ້າ-ອອກເມືອງ, ການຮ່ວມມື ພັດທະນາ ເສດຖະກິດ-ສັງຄົມ, ການສົ່ງເສີມການທ່ອງທ່ຽວ ລວມທັງການໂຄສະນາສຶກສາອົບຮົມ ໃຫ້ປະຊາຊົນ ຂອງສອງຟາກຝັ່ງຊາຍແດນ ລາວ-ໄທ ໃຫ້ຮັບຮູ້ ແລະ ເຂົ້າໃຈ.

ທ່ານ ບຸນຖອງ ດີ​ວິ​ໄຊ ເຈົ້າແຂວງໆຈຳປາສັກ ປະທານຮ່ວມກອງປະຊຸມ ລະຫວ່າງເຈົ້າແຂວງ ແລະ ຜູ້ວ່າຣາຊະການ ຈັງຫວັດຊາຍແດນ ລາວ-ໄທ ກ່າວວ່າ: ນັບແຕ່ກອງປະຊຸມ ຄະນະເຈົ້າແຂວງ ແລະ ຜູ້ວ່າຣາຊະການ ຈັງຫວັດຊາຍແດນ ລາວ-ໄທ ຄັ້ງທີ 9 ໃນປີ 2013 ເປັນຕົ້ນມາ ເຫັນວ່າສະພາບການພົວພັນຮ່ວມມື ລະຫວ່າງແຂວງ ແລະ ຈັງຫວັດຊາຍແດນ ຂອງສອງປະເທດໄດ້ຮັບ ການຈັດຕັ້ງປະຕິບັດເປັນຮູບປະທຳ ໃນຫລາຍດ້ານ ເປັນຕົ້ນແມ່ນ ໄດ້ຮ່ວມກັນຈັດກອງປະຊຸມ ຄະນະກຳມະການຮ່ວມມື ຮັກສາຄວາມສະຫງົບ ຕາມຊາຍແດນລະດັບແຂວງ ແລະ ຈັງຫວັດ. ສະພາບການຢູ່ຕາມ ບໍລິເວນຊາຍແດນ ລາວ-ໄທ ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ປອດໄພດີໂດຍພື້ນຖານ. ນອກຈາກນັ້ນ, ການແລກປ່ຽນທາງດ້ານ ເສດຖະກິດ-ການຄ້າ, ສິລະປະ, ວັດທະນະທຳ, ກິລາ ແລະ ການໄປມາຫາສູ່ຢ້ຽມ ຢາມເຊິ່ງກັນ ແລະ ກັນ ລະຫວ່າງສອງປະເທດເຫັນວ່າ ໄດ້ມີພັດທະນາເຂົ້າສູ່ລວງເລິກ ແລະ ເພີ່ມຂຶ້ນຢ່າງຕໍ່ເນື່ອງ.

ໃນໂອກາດນີ້, ທ່ານ ບຸນຖອງ ດີ​ວິ​ໄຊ ກໍໄດ້ສະແດງຄວາມເຊື້ອໝັ້ນວ່າ: ໃນກອງປະຊຸມຄັ້ງນີ້, ບັນດາເຈົ້າແຂວງ ແລະ ຜູ້ວ່າຣາຊະການ ຈັງຫວັດຊາຍແດນ ລາວ-ໄທ ຈະໄດ້ພ້ອມກັນປຶກສາຫາລື ແລກ ປ່ຽນຄຳຄິດຄຳເຫັນ ເຊິ່ງກັນ ແລະ ກັນ ດ້ວຍຄວາມຈິງໃຈ ຢ່າງກົງໄປກົງມາ. ທັງນີ້, ກໍເພື່ອນຳເອົາຜົນປະໂຫຍດມາສູ່ ປະຊາຊົນສອງຊາດ ທີ່ດຳລົງຊີວິດຢູ່ບັນດາແຂວງ ແລະ ຈັງຫວັດຕາມຊາຍແດນ ຂອງສອງປະເທດໃຫ້ດີຂຶ້ນ ກວ່າທຸກໆປີຜ່ານມາ.

ທ່ານ ສົມສັກ ຈັງຕະກຸນ ຫົວໜ້າຄະນະຜູ້ວ່າຣາຊະການ ຈັງຫວັດຊາຍແດນ ລາວ-ໄທ ແຫ່ງຣາຊະນາຈັກໄທ ກ່າວວ່າ:​ ຈັງຫວັດ ແລະ ແຂວງທີ່ມີພື້ນທີ່ຕິດຕໍ່ກັນ ເຊິ່ງມີກົນໄກການປະຊຸມ ຄະນະກຳມະ ການຮ່ວມມື ຮັກສາຄວາມສະຫງົບ ຮຽບຮ້ອຍລະດັບ ຈັງຫວັດ-ແຂວງ, ເປັນກົນໄກທີ່ສົ່ງເສີມ ຄວາມສຳພັນ ແລະ ຄວາມເຂົ້າໃຈອັນດີ ລະຫວ່າງ ປະຊາຊົນລຽບຕາມຊາຍແດນ ຂອງທັງສອງປະເທດ ແລະ ມີການພັດທະນາຄວາມສຳພັນ ໃນລະດັບທ້ອງຖິ່ນ ຢ່າງຕໍ່ເນື່ອງສະໝ່ຳສະເໝີ. ການປະຊຸມ ຄັ້ງນີ້, ຈຶ່ງເປັນໂອກາດທີ່ດີທີ່ທ່ານ ຜູ້ວ່າການຈັງຫວັດ ແລະ ເຈົ້າແຂວງ ຈະໄດ້ພົບປະຫາລືກັນ ເພື່ອເຮັດໃຫ້ ຜູ້ບໍລິຫານລະດັບສູງ ໃນພື້ນທີ່ດັ່ງກ່າວ ມີແນວທາງປະຕິບັດທີ່ຊັດເຈນ, ສອດຄ່ອງກັບເຈດຕະນາລົມ ແລະ ນະໂຍບາຍ ຂອງລັດຖະບານ, ພ້ອມທັງເປັນການສານ ຕໍ່ຄວາມຮ່ວມມືດ້ານຕ່າງໆ ທີ່ລັດຖະບານ ສອງປະເທດ ໄດ້ຕົກລົງຮ່ວມກັນ.

ຂ່າວ: ສິງຄຳ, ພາບ: ອ່າຍຄຳ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.