Header Ads

ທ່ານ ຈະເລີນ ເຢຍປາວເຮີ ຕ້ອນຮັບຄະນະຜູ້ແທນ ສປ. ຈີນ



ໃນຕອນບ່າຍຂອງວັນທີ 06 ກັນຍາ 2017ຜ່ານມານີ້ ທີ່ສໍານັກງານນາຍົກລັດຖະມົນຕີ, ທ່ານ ຈະເລີນ ເຢຍປາວເຮີ, ລັດຖະມົນຕີປະຈໍາສຳນັກງານນາຍົກລັດຖະມົນຕີ, ໂຄສົກລັດຖະບານ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງ ທ່ານ ຫວາງ ເວີນທ່ຽນ ພ້ອມດ້ວຍຄະນະ ເນື່ອງໃນໂອກາດມາດໍາລົງຕໍາແໜ່ງ ເປັນເອກອັກຄະລັດຖະທູດ ສປ ຈີນ ຄົນໃໝ່ປະຈໍາ ສປປ ລາວ.


ໂອກາດດັ່ງກ່າວ, ທ່ານ ຈະເລີນ ເຢຍປາວເຮີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ສາຍພົວພັນຮ່ວມມື ລະຫວ່າງ ສປປ ລາວ ແລະ ສປ ຈີນ ທີ່ເປັນມູນເຊື້ອມາແຕ່ດົນນານ, ກາຍເປັນຄູ່ຮ່ວມມືຍຸດທະສາດຮອບດ້ານ, ມີຄວາມເຂົ້າອົກເຂົ້າໃຈເຊິ່ງກັນ ແລະ ກັນຕະຫຼອດມາ ແລະ ຂໍສະແດງຄວາມຂອບໃຈມາຍັງ ລັດຖະບານ ສປ ຈີນ ທີ່ໄດ້ໃຫ້ການຊຸກຍູ້, ຊ່ວຍເຫຼືອ ສປປ ລາວ ໃນດ້ານຕ່າງໆຕະຫຼອດມາ ເປັນຕົ້ນ ການຊ່ວຍເຫຼືອເພື່ອພັດທະນາ ພື້ນຖານໂຄງລ່າງຂອງລາວ, ທຶນກູ້ຢືນດອກເບ້ຍຕໍ່າ, ການພັດທະນາຊັບພະຍາກອນມະນຸດ, ການເຂົ້າມາລົງທຶນ ຂອງນັກທຸລະກິດຈີນ, ການຊ່ວຍເຫຼືອ ທາງດ້ານເຕັກນິກຕ່າງໆ, ການປູກຝັງລ້ຽງສັດ. ພິເສດແມ່ນການຊ່ວຍເຫຼືອ ສປປ ລາວ ໃນການກໍ່ສ້າງເສັ້ນທາງລົດໄຟ ແລະ ອື່ນໆ. ພ້ອມດຽວກັນນີ້, ທັງສອງຝ່າຍ ຍັງໄດ້ສືບຕໍ່ພົວພັນຮ່ວມມືກັນ ໃນດ້ານຕ່າງໆ ຢ່າງເປັນປົກກະຕິ, ສະໜັບສະໜູນເຊິ່ງກັນ ແລະ ກັນໃນເວທີ ພາກພື້ນ ແລະ ສາກົນ, ການນໍາຂັ້ນສູງຂອງສອງປະເທດ ໄດ້ເດີນທາງໄປເຄື່ອນໄຫວ ແລະ ພົບປະກັນຢ່າງເປັນປົກກະຕິ. ທ່ານ ຈະເລີນ ເຢຍປາວເຮີ ຍັງຫວັງຢ່າງຍິ່ງວ່າ ໂອກາດທີ່ ທ່ານ ຫວາງ ເວີນທ່ຽນ ມາດໍາລົງຕໍາແໜ່ງເປັນ ເອກອັກຄະລັດຖະທູດ ສປ ຈີນ ຄົນໃໝ່ປະຈໍາ ສປປ ລາວ ໃນຄັ້ງນີ້ ຈະກາຍເປັນຂົວຕໍ່ທີ່ສໍາຄັນ ເພື່ອຮັດແໜ້ນສາຍພົວພັນຮ່ວມມື ລະຫວ່າງ ສປ ຈີນ ແລະ ສປປ ລາວ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ ແລະ ນໍາເອົາຜົນປະໂຫຍດສູງສຸດ ມາສູ່ປະຊາຊົນຂອງສອງຊາດ ລາວ-ຈີນ ຢ່າງແທ້ຈິງ.

ໂອກາດດຽວກັນນີ້, ທ່ານ ຫວາງ ເວີນທ່ຽນ ກໍ່ໄດ້ສະແດງຄວາມຂອບໃຈຕໍ່ ທ່ານລັດຖະມົນຕີ ປະຈໍາສຳນັກງານນາຍົກລັດຖະມົນຕີ ທີ່ໄດ້ເສຍສະຫຼະອັນມີຄ່າ ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້. ທ່ານ ຫວາງ ເວີນທ່ຽນ ຍັງໄດ້ກ່າວຕື່ມວ່າ: ໃນໂອກາດທີ່ມາດຳລົງຕໍາແໜ່ງ ເປັນເອກອັກຄະລັດຖະທູດ ສປ ຈີນ ປະຈໍາລາວໃນຄັ້ງນີ້ ຈະຕັ້ງໜ້າເຮັດວຽກ ແລະ ພະຍາຍາມ ເປັນຂົວຕໍ່ມິດຕະພາບຂອງສອງຊາດ ທັງຈະອອກແຮງຊຸກຍູ້ ການຈັດຕັ້ງປະຕິບັດຂໍ້ຕົກລົງ ແລະ ໝາກຜົນທີ່ສໍາຄັນ ທີ່ການນຳສອງປະເທດຕົກລົງຮ່ວມກັນ ແລະ ຊຸກຍູ້ການຮ່ວມມືໃນຂົງເຂດຕ່າງໆຂອງສອງຝ່າຍ ເພື່ອເພີ່ມທະວີຄວາມເຂົ້າໃຈ ແລະ ສົ່ງເສີມນ້ຳໃຈມິດຕະພາບ ລະຫວ່າງ ປະຊາຊົນສອງຊາດ ໃຫ້ມີໝາກມີຜົນຕົວຈິງ.

ແຫລ່ງຂ່າວ: ຫ້ອງວ່າການສຳນັກງານນາຍົກລັດຖະມົນຕີ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.