Header Ads

ເຊກອງ ສ້າງຄວາມເຂົ້າໃຈກ່ຽວກັບການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ



ຕອນເຊົ້າວັນທີ 11 ກັນຍາ 2017 ນີ້ ຢູ່ທີ່ສະໂມສອນ ປກສ ແຂວງເຊກອງໄດ້ມີພິທີເຜີຍແຜ່ ແລະ ສ້າງຄວາມເຂົ້າໃຈກ່ຽວກັບການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດທີ່ມາເຄືອນໄຫວບໍ່ຖືກຕ້ອງຕາມລະບຽບກົດຫມາຍຢູ່ ສປປ ລາວ ໂດຍການເຂົ້າຮ່ວມເປັນປະທານຂອງທ່ານ ຖາວອນ ພົມມະໄລລຸນ ກໍາມະການປະຈໍາພັກແຂວງ ຮອງເຈົ້າແຂວງເຊກອງ ຜູ້ຊີ້ນໍາຂົງເຂດວຽກງານວັດທະນະທໍາສັງຄົມ, ມີທ່ານ ບຸນຄົງ ຫລ້າສຸກກັນ ຮອງລັດຖະມົນຕີກະຊວງ ຮສສ, ມີຄະນະນໍາຂັ້ນແຂວງ-ເມືອງ, ຂະແຫນງການທີ່ກ່ຽວຂ້ອງຂັ້ນແຂວງ, ອົງການປົກຄອງ 06 ຫມູ່ບ້ານ ແລະ ຜູ້ປະກອບການທຸລະກິດເຂົ້າຮ່ວມ. 



ທ່ານ ພະຂັນໄຊ ສີຫາເທບ ຮອງຫົວຫນ້າພະແນກ ແຮງງານ ແລະ ສະຫວັດດີການສັງຄົມ (ຮສສ) ແຂວງ, ຮອງຄະນະຮັບຜິດຊອບອອກບັດອະນຸຍາດເຄື່ອນໄຫວຊົ່ວຄາວຂັ້ນແຂວງກ່າວວ່າ: ເພື່ອປະຕິບັດຕາມຄໍາສັ່ງຂອງນາຍົກລັດຖະມົນຕີສະບັບເລກທີ 62/ນຍ, ລົງວັນທີ 13 ພະຈິກ 2015 ວ່າດ້ວຍການອໍານວຍຄວາມສະດວກ ແລະ ໃຫ້ການຮ່ວມມືໃນການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວ ໃຫ້ຄົນຕ່າງປະເທດ ທີ່ເຄື່ອນໄຫວບໍ່ຖືກຕ້ອງຢູ່ ສປປ ລາວ. ທັງນີ້ກໍ່ເພື່ອແກ້ໄຂບັນຫາຄົນຕ່າງປະເທດມາເຄື່ອນໄຫວບໍ່ຖືກຕ້ອງຕາມລະບຽບການ ທີ່ເປັນບັນຫາຊໍາເຮື້ອມາເປັນເວລາຫລາຍປີ, ເກັບກໍາຈໍານວນຄົນຕ່າງປະເທດທີ່ມາເຄື່ອນໄຫວບໍ່ຖືກຕ້ອງຕາມລະບຽບການຢູ່ແຂວງເຊກອງມີເທົ່າໃດ? ແນໃສ່ໃນການຕິດຕາມຄຸ້ມຄອງການເຄື່ອນໄຫວຂອງຄົນຕ່າງປະເທດໃຫ້ເຂົ້າສູ່ລະບຽບກົດຫມາຍ ແລະ ເພື່ອຮັບປະກັນຄວາມເປັນລະບຽບຮຽບຮ້ອຍ, ຄວາມສະຫງົບ-ປອດໄພ ແລະ ຄວາມຫມັ້ນຄົງຂອງຊາດ. ຄົນຕ່າງປະເທດທີ່ໄດ້ອອກບັດໃຫ້ແລ້ວຜ່ານມາແມ່ນມີ 2 ເງື່ອນໄຂຄື: ຜູ້ທີ່ໄດ້ອອກບັດໃຫ້ເພື່ອປັບສະຖານະພາບ ແລະ ຜູ້ທີ່ໄດ້ອອກບັດໃຫ້ເພື່ອຊໍາລະສະສາງ ພາຍຫລັງທີ່ໄດ້ອອກບັດໃຫ້ທັງ 2 ເງື່ອນໄຂແລ້ວ ຖ້າພົບວ່າຜູ້ກ່ຽວຍັງເຄື່ອນໄຫວບໍ່ຖືກຕ້ອງຕາມລະບຽບກົດຫມາຍທີ່ກໍານົດໃຫ້ຕາມແຕ່ລະເງື່ອນໄຂແລ້ວ ແມ່ນຈະໄດ້ພິຈາລະນາຕໍ່ອາຍຸບັດໃຫ້ແຕ່ສູງສຸດບໍ່ໃຫ້ເກີນ 3 ເດືອນ ແຕ່ຖ້າຍັງພົບວ່າຜູ້ກ່ຽວບໍ່ດໍາເນີນການຕາມທີ່ໄດ້ອະນຸຍາດໃຫ້ນັ້ນ ແມ່ນຈະບໍ່ໄດ້ອະນຸຍາດອອກບັດໃຫ້ຕື່ມ ແລະ ຈະໄດ້ຜັກດັນອອກຈາກ ສປປ ລາວ. ສໍາລັບຜູ້ທີ່ຈະຂຶ້ນທະບຽນໃຫມ່ ກໍ່ໃຫ້ອອກບັດອະນຸຍາດຊົ່ວຄາວໃຫ້ສູງສຸດບໍ່ໃຫ້ເກີນ 3 ເດືອນ ທັງຜູ້ທີ່ປັບສະຖານະພາບ ແລະ ຊໍາລະສະສາງ ສ່ວນການຕໍ່ອາຍຸບັດ ແລະ ການອອກບັດອະນຸຍາດເຄື່ອນໄຫວຊົ່ວຄາວໃຫ້ໃຫມ່ແມ່ນຈະໄດ້ຈ່າຍຄ່າບໍລິການເທົ່າກັບ 300.000 ກີບ/ຄົນ/ເດືອນ. 




ໂອກາດດຽວກັນນີ້ ທ່ານ ບຸນຄົງ ຫລ້າສຸກກັນ ຮອງລັດຖະມົນຕີກະຊວງ ຮສສ ໄດ້ເນັ້ນຫນັກໃຫ້ສອງຂະແຫນງການ ຮສສ ແລະ ປກສ ແຂວງເຊກອງ ຮີບຮ້ອນລາຍງານຄະນະນໍາຂອງແຂວງເພື່ອຮັບຊາບກ່ຽວກັບການເຫັນດີຂອງຫ້ອງວ່າການສໍານັກງານນາຍົກລັດຖະມົນຕີໃນການສືບຕໍ່ແກ້ໄຂບັນຫາຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມລະບຽບກົດຫມາຍຂອງ ສປປ ລາວ ພ້ອມດຽວກັນນັ້ນກໍ່ໃຫ້ນໍາພາຫນ່ວຍປະຕິບັດງານຂອງແຂວງ ສືບຕໍ່ຂຶ້ນບຽນແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ ໂດຍໃຫ້ໄດ້ເລີ່ມລົງມືນັບແຕ່ວັນທີ 1 ກັນຍາ 2017-30 ພະຈິກ 2017 ຫລັງຈາກນັ້ນໃຫ້ມີການແຍກອັນລະອຽດເປັນແຕ່ລະເງື່ອນໄຂ ພ້ອມນີ້ກໍ່ໄດ້ຮຽກຮ້ອງໃຫ້ທຸກພາກສ່ວນໃນສັງຄົມຈົ່ງໃຫ້ການຮ່ວມມື ແລະ ລະດົມຄົນຕ່າງປະເທດໃຫ້ມາຂຶ້ນທະບຽນ ແລະ ເຮັດບັດອະນຸຍາດໂດຍສະເພາະປະຊາຊົນທີ່ໃຫ້ເຊົ່າສະຖານທີ່ເຮັດທຸລະກິດປະເພດຕ່າງໆ ຈົ່ງໃຫ້ການຮ່ວມມື ແລະ ຮ່ວມຂະບວນການດັ່ງກ່າວ.


ຂ່າວ-ພາບ: ນາລີວັນ/ຂ່າວເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.