Header Ads

ເມືອງລະມາມ ຂຶ້ນສຳມະໂນຄົວສຳເລັດແລ້ວ 7 ພັນກວ່າຄອບຄົວ



ວັນທີ 8 ກັນຍາ 2017 ນີ້, ເມືອງລະມາມແຂວງເຊກອງໄດ້ຈັດກອງປະຊຸມຄົ້ນຄວ້າປຶກສາຫາລືກ່ຽວກັບວຽກງານຄຸ້ມຄອງສຳມະໂນຄົວ ແລະ ຮ້ານກິນດື່ມ-ບັນເທີງ ຂຶ້ນໂດຍການເຂົ້າຮ່ວມຂອງທ່ານ ນາງ ຄຳເສັງ ທຸມມະວົງສາ ຮອງເຈົ້າເມືອງໆລະມາມ, ທ່ານ ພັທ ສົມສັກ ຂັດຕິຍະວົງ ຮອງຫົວໜ້າກອງບັນຊາການ ປກສ ແຂວງ, ບັນດາທ່ານຫົວໜ້າ-ຮອງພະແນກ, ຫ້ອງການຂັ້ນແຂວງ-ເມືອງ, ວິຊາການກ່ຽວຂ້ອງ ແລະ ອຳນາດການປົກຄອງບ້ານເຂົ້າຮ່ວມ.



ໃນພິທີທ່ານ ພັຕ ແກ້ວປະເສີດ ພອນເທວາ ຮອງຫົວໜ້າກອງບັນຊາການ ປກສ ເມືອງລະມາມໄດ້ຂຶ້ນຜ່ານບົດສະຫຼຸບກ່ຽວກັບວຽກງານຄຸ້ມຄອງສຳມະໂນຄົວ ແລະ ກໍສ້າງຮາກຖານໃນ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ2017ໃຫ້ຮູ້ວ່າ: ເມືອງລະມາມແມ່ນເປັນເມືອງເທສະບານຂອງແຂວງເຊກອງເປັນສູນກາງທາງດ້ານການເມືອງ, ເສກຖະກິດ ແລະ ວັດທະນະທຳ-ສັງຄົມ ຊຶ່ງປະກອບມີ 43 ບ້ານ ມີ 5.750 ຫຼັງຄາເຮືອນ ມີ 7.066 ຄອບຄົວ, ມີພົນລະເມືອງທັງໝົດ 36.040 ຄົນ,ຍິງ 17.657 ຄົນ, ໃນນີ້ໄດ້ຂຶ້ນສຳມະໂນຄົວຖືກຕ້ອງແລ້ວ 5.750 ຫຼັງຄາເຮືອນ 7.065 ຄອບຄົວ, ມີ 36.037 ຄົນ,ຍິງ 17.656 ຄົນ ແລະ ອາຍຸ 15 ປີຂຶ້ນໄປມີ 22.831 ຄົນ,ຍິງ 10.991 ຄົນ.



ຂະນະທີ່ວຽກງານຄຸ້ມຄອງຮ້ານກິນດື່ມ-ບັນເທິງ ຜ່ານມາຂະແໜງການກ່ຽວຂ້ອງໄດ້ເອົາໃຈໃສ່ຕິດຕາມ, ກວດ ກາ ແລະ ເຜີຍແຜ່ລະບຽບການຕ່າງໆໃຫ້ຜູ້ປະກອບການຢ່າງເປັນປົກກະຕິຕໍ່ເນື່ອງ ໂດຍໃນ 6 ເດືອນຕົ້ນປີ 2017 ໄດ້ສຶກສາອົບຮົມກ່າວເຕືອນຜູ້ປະກອບການຮ້ານກິນດື່ມບັນເທິງທີ່ລະເມີດລະບຽບການ (ເປີດບໍລິການກາຍໂມງເວລາ) ທັງໝົດ 5 ຮ້ານລວມມີ 7 ຄັ້ງ ທັງນີ້ ແນໃສ່ໃຫ້ບັນດາຮ້ານກິນດື່ມບັນເທິງເອົາໃຈໃສ່ປະຕິບັດລະບຽບການຢ່າງເຂັ້ມງວດເພື່ອຫຼີກລ້ຽງປະກົດການຫຍໍ້ທໍ້ຕ່າງໆ.


ຈາກນັ້ນ ບັນດາຜູ້ເຂົ້າຮ່ວມກໍ່ໄດ້ຜັດປ່ຽນກັນຂຶ້ນປະກອບຄຳຄິດຄຳເຫັນໃຫ້ທິດຊີ້ນຳຕໍ່ກັບການແກ້ໄຂ ແລະ ວິທີການຈັດຕັ້ງປະຕິບັດ, ໃຫ້ຖືກຕ້ອງຕາມຫຼັກການ, ລະບຽບການ ແລະ ຂໍ້ກຳນົດຕ່າງໆທີ່ພັກ-ລັດຂັ້ນເທິງວາງອອກ ແນໃສ່ເຮັດໃຫ້ເມືອງລະມາມ ກໍຄືແຂວງເຊກອງມີຄວາມເປັນລະບຽບຮຽບຮ້ອຍ, ສັງຄົມມີຄວາມສະຫງົບສຸກ, ປະຊາ ຊົນມີຄວາມສາມັກຄີປອງດອງ, ຍຸຕິທຳ ແລະ ສີວິໄລ.


ຂ່າວ-ພາບ : ສັນຍາ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.