Header Ads

ສາລະວັນ ເຜີຍແຜ່ແນະນຳການແຈ້ງຊັບສິນ ແລະລາຍຮັບ ຮອບທີ 2



ແຂວງສາລະວັນ ໄດ້ຈັດກອງປະຊຸມເຜີຍແຜ່, ເຊື່ອມຊຶມ ແລະແນະນຳການຂຽນເອກະສານແຈ້ງຊັບສິນ ແລະລາຍຮັບຂອງພະນັກງານ-ລັດຖະກອນ ຮອບທີ II ຂຶ້ນຢູ່ສະໂມສອນໃຫຍ່ແຂວງ ໃນວັນທີ 14 ກັນຍານີ້ ໂດຍການເປັນປະທານຂອງ ທ່ານ ຄຳຈັນ ແຈ່ມສະໝອນ ຄະນະປະຈຳພັກແຂວງ ປະທານກວດກາແຂວງ, ມີບັນດາຄະນະກວດກາ 8 ຕົວເມືອງ, ພະແນກການອ້ອມຂ້າງແຂວງ, ລັດວິສາຫະກິດ ແລະພະນັກງານວິຊາການເຂົ້າຮ່ວມ.



ກອງປະຊຸມໄດ້ເຜີຍແຜ່ດຳລັດສະບັບເລກທີ 159/ລບ, ລົງວັນທີ 4 ມີຖຸນາ 2013 ວ່າດ້ວຍ ການແຈ້ງຊັບສິນ ເຊີ່ງມີ 7 ໝວດ, 27 ມາດຕາ ແລະຄຳແນະນຳຂອງອົງການກວດກາລັດຖະບານ ສະບັບເລກທີ 46/ອກລ, ລົງວັນທີ 20 ກຸມພາ 2017 ວ່າດ້ວຍການຈັດຕັ້ງປະຕິບັດດຳລັດວ່າດ້ວຍການແຈ້ງຊັບສິນ ພ້ອມທັງມີການເຜີຍແຜ່ ແລະແນະນຳເຕັກນິກການຂຽນແບບພິມແຈ້ງຊັບສິນ ຕາມເອກະສານຮັບແຈ້ງຊັບສິນ ແລະລາຍຮັບທີ່ອົງການກວດກາລັດຖະບານ ແລະອົງການຕ້ານການສໍ້ລາດບັງຫຼວງກຳນົດໄວ້, ແນໃສ່ເພື່ອຜັນຂະຫຍາຍດຳລັດຂອງລັດຖະບານວ່າດ້ວຍການແຈ້ງຊັບສິນໃຫ້ຖືກຕ້ອງ, ເປັນເອກະພາບ, ມີປະສິດທິຜົນ ແລະທົ່ວເຖີງທຸກເປົ້າໝາຍ, ເປັນບ່ອນອີງໃຫ້ອົງການກວດກາລັດ ແລະການຕ້ານການສໍ້ລາດບັງຫຼວງແຕ່ລະຂັ້ນໃນການຈັດຕັ້ງປະຕິບັດລະອຽດກ່ຽວກັບການແຈ້ງຊັບສິນ ແລະລາຍຮັບຂອງພະນັກງານລັດຖະກອນ, ທະຫານ, ຕຳຫຼວດ, ເຮັດໃຫ້ລັດຖະກອນໃໝ່ ແລະຜູ້ເຂົ້າຮ່ວມກອງປະຊຸມໄດ້ຮັບຮູ້ ແລະເຂົ້າໃຈ, ມີຄວາມເປັນເອກະພາບກັນ ແລະເປັນເຈົ້າການຈັດຕັ້ງປະຕິບັດດ້ວຍຄວາມຮັບຜິດຊອບສູງ, ມີປະສິດທິຜົນ, ດຳເນີນຢ່າງ ຖືກຕ້ອງ, ຈະແຈ້ງ ແລະມີຄວາມໂປ່ງໃສ, ແນໃສ່ສະກັດກັ້ນ ແລະຕ້ານການສໍ້ລາດບັງຫຼວງຢູ່ໃນການຈັດຕັ້ງພັກ-ລັດ. ໂດຍສະເພາະປະເພດຊັບສິນ ແລະລາຍຮັບຕ່າງໆເຊັ່ນ: ປະເພດທີ່ດິນ, ສິ່ງປຸກສ້າງ, ພາຫະນະ ແລະກົນຈັກການຜະລິດຕ່າງໆ, ວັດຖຸມີຄ່າ, ພັນທະບັດ, ເງິນຝາກ ແລະອື່ນໆ ທີ່ຈະຕ້ອງແຈ້ງເປັນອັນລະອຽດ ແລະຖືກຕ້ອງຊັດເຈນ.



ພາບ ແລະ ຂ່າວ: ໜັງສືພິມສາລະວັນ 

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.