Header Ads

ມ້າງກຸ່ມແກ້ງລັດລົດຈັກ ໄດ້ 5 ຄົນ ພ້ອມອາວຸດ


ໄລຍະຜ່ານມາ, ຢູ່ແຂວງບໍ່ແກ້ວ ບັນດາກຸ່ມໄວລຸ້ນຈໍານວນໜຶ່ງ ໄດ້ເຄື່ອນໄຫວລັກລອບລັກຊັບພົນລະເມືອງ ໂດຍສະເພາະລັກລົດຈັກ ເຮັດໃຫ້ມີຫ່າງສຽງຈົ່ມວ່າຈາກສັງຄົມຕ່າງໆນາໆ. ຕໍ່ກັບເຫດການດັ່ງກ່າວ, ເຈົ້າໜ້າທີ່ສືບສວນ-ສອບສວນ ກໍ່ໄດ້ເອົາໃຈໃສ່ຕິດຕາມຕົວຄົນຮ້າຍໄດ້ຫຼາຍລາຍ ລ່າສຸດໃນວັນທີ 1 ກັນຍາ 2017 ເຈົ້າໜ້າທີ່ວິຊາສະເພາະ ປກສ ແຂວງບໍ່ແກ້ວ ໄດ້ມ້າງກຸ່ມແກ້ງລັກລົດຈັກໄດ້ອີກ 5 ຄົນ ພ້ອມອຸປະກອນດັດແປງລົດຈັກ, ລະເບີດ 1 ລູກ, ປືນແກັບ 1 ກະບອກ, ງ້າວ 1 ດວງ ໄປດໍາເນີນຄະດີຕາມກົດໝາຍ.
ພັທ ຄໍາດີ ເກດພິນດາ ຮອງຫົວໜ້າຫ້ອງຕໍາຫຼວດ ປກສ ແຂວງບໍ່ແກ້ວ ໃຫ້ຮູ້ວ່າ: ຜູ້ຖືກຫາທັງ 5 ຄົນ ຊື່ທ້າວ ອຸ່ນສັກ ຄໍາໄຊ ອາຍຸ 27 ປີ ຢູ່ບ້ານໃຫຍ່ຫ້ວຍຊາຍເໜືອ, ທ້າວ ໄຊ ວິໄລສັກ ອາຍຸ 25 ປີ ຢູ່ບ້ານຫ້ວຍຕາບ , ທ້າວ ສົມສັກ ແກ້ວມະນີ ຢູ່ບ້ານປ່າອ້ອຍ, ທ້າວ ປ້ອມ ບຸນຕີ ອາຍຸ 36 ປີ ຢູ່ບ້ານຫ້ວຍຕາບ ແລະ ທ້າວ ທູນສັກ ປັນຍາວິຈິດ ອາຍຸ 28 ປີ ຢູ່ບ້ານບໍ່ແກ້ວ ທັງ 5 ຄົນ ຢູ່ເມືອງຫ້ວຍຊາຍ ແຂວງບໍ່ແກ້ວ ເຊິ່ງພວກກ່ຽວແມ່ນໄດ້ຮ່ວມກັນເຄື່ອນໄຫວລັກຊັບ ປະເພດລົດຈັກ ຕາມເທດສະບານແຂວງ ແລະ ເມືອງ ອ້ອມຂ້າງແຂວງ ໂດຍມີການປະສານງານເຮັດເປັນກຸ່ມແກັງ; ພາຍຫຼັງລັກມາ, ກໍນໍາໄປດັດແປງສະພາບ ແລ້ວໄປຂາຍຕໍ່ ຫຼື ແຍກເອົາສິ້ນສວນລົດຈັກໄປຂາຍ. ນອກນີ້, ພວກກ່ຽວຍັງມີການພົວພັນກັບຢາເສບຕິດ ຕື່ມອີກ.
ຜ່ານການສອບສວນ ພວກກ່ຽວສາລະພາບວ່າ: ໄດ້ເຄື່ອນໄຫວລັກຊັບພົນລະເມືອງມາແລ້ວຫຼາຍໆຄັ້ງ, ໂດຍສະເພາະແມ່ນການລັກລົດຈັກ ແລະ ວັດຖຸມີຄ່າທີ່ສາມາດນໍາມາຂາຍໄດ້ ສ່ວນເງິນທີ່ໄດ້ມານັ້ນແມ່ນແບ່ງກັນ ເອົາໄປຈ່າຍຫຼິ້ນກິນຈົນໝົດ ແລະ ຊື້ຢາເສບຕິດເສບ, ລົດຈັກລັກມາໄດ້ແຕ່ລະຄັນ ບາງຄັນກໍດັດແປງສະພາບລົດ ພົ່ນສີ ດັດແປງເຕັກນິກ ເພື່ອບໍ່ໃຫ້ເຈົ້າຂອງຈື່ໄດ້ ແລະ ເຈົ້າໜ້າທີ່ກວດພົບ. ປັດຈຸບັນ, ເຈົ້າໜ້າທີ່ກໍາລັງເກັບກໍາຂໍ້ມູນ ແລ້ວຕິດຕາມນໍາຈັບຕົວຂະບວນການດຽວກັນ ແລະ ເກັບກູ້ລົດຈັກທີ່ພວກກ່ຽວລັກໄປນັ້ນ ໄປມອບຄືນໃຫ້ເຈົ້າຂອງເດີມ.
 ທີ່ມາ: ໜັງສືພິມຄວາມສະຫງົບ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.