Header Ads

ເຊ​ກອງ ເຜີຍແຜ່ດໍາລັດຂອງນາຍົກລັດຖະມົນຕີວ່າດ້ວຍກອງທຶນການທ່ອງທ່ຽວ



ຕອນເຊົ້າວັນທີ 13 ກັນຍາ 2017 ນີ້ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງເຊກອງ ໄດ້ຈັດກອງປະຊຸມເຜີຍແຜ່ດຳລັດຂອງນາຍົກລັດຖະມົນຕີ ວ່າດ້ວຍກອງທຶນການທ່ອງທ່ຽວ ທີ່ຫ້ອງປະຊຸມພະແນກຖະແຫລງຂ່າວ, ວັດທະນະທໍາ ແລະທ່ອງທ່ຽວແຂວງເຊກອງ ໂດຍການເປັນປະທານຂອງທ່ານ ບູ່ໄຊ ໄຊຍະເສນ ຫົວຫນ້າພະແນກ ຖວທ ແຂວງ, ທ່ານ ນາງ ແພງຈັນ ແພງເມືອງ ຄະນະພັກກະຊວງ, ຫົວຫນ້າກົມແຜນການ-ການເງິນກະຊວງ ຖວທ, ມີຜູ້ຕາງຫນ້າຈາກຂະແຫນງການຕ່າງໆທີ່ກ່ຽວຂ້ອງທາງພາກລັດ ແລະ ຜູ້ປະກອບການທຸລະກິດເຂົ້າຮ່ວມ.




ທ່ານ ນາງ ແພງຈັນ ແພງເມືອງ ໄດ້ໃຫ້ຮູ້ວ່າ: ຈຸດປະສົງຂອງການຈັດກອງປະຊຸມໃນຄັ້ງນີ້ກໍເພຶ່ອເປັນການເຜີຍແຜ່ດຳລັດວ່າດ້ວຍກອງທຶນການທ່ອງທ່ຽວ ແລະ ບົດແນະນໍາການຈັດຕັ້ງປະຕິບັດດໍາລັດວ່າດ້ວຍກອງທຶນການທ່ອງທ່ຽວ ຂອງນາຍົກລັດຖະມົນຕີ ເຊິ່ງເນື້ອໃນດໍາລັດດັ່ງກ່າວແມ່ນໄດ້ກໍານົດບັນດາຫລັກການ, ລະບຽບການ ແລະ ມາດຕະການກ່ຽວກັບການສ້າງຕັ້ງ, ການຄຸ້ມຄອງ ແລະ ການຕິດຕາມກວດກາກອງທຶນການທ່ອງທ່ຽວໃຫ້ມີຄວາມໂປ່ງໃສ, ເປັນລະບຽບຮຽບຮ້ອຍ ແນໃສ່ສະສົມ-ລະດົມທຶນຊ່ວຍຫນູນງົບປະມານ ປະກອບສ່ວນເຂົ້າໃສ່ການພັດທະນາ, ການໂຄສະນາສົ່ງເສີມ ແລະ ການຄຸ້ມຄອງການທ່ອງທ່ຽວຢ່າງມີຈຸດສຸມ, ມີປະສິດທິພາບ, ປະສິດທິຜົນ ແລະ ມີຄວາມຍືນຍົງ ແລະ ຂະຫຍາຍຕົວ.


ການເກັບກອງທຶນການທ່ອງທ່ຽວ ແມ່ນເກັບຈາກນັກທ່ອງທ່ຽວຕ່າງປະເທດ ທີ່ເຂົ້າມາທ່ຽວ ສາທາລະນະລັດ ປະຊາທິປະໄຕ ປະຊາຊົນລາວ ໂດຍຜ່ານ ຫຼື ບໍ່ຜ່ານຫົວໜ່ວຍທຸລະກິດການນຳທ່ຽວ 1 ໂດລາ/ຫົວຄົນ/ຄັ້ງໃນອັດຕາດຽວກັນທົ່ວປະເທດ, ເກັບຈາກການຈັດງານເທສະການອາຫານ, ງານວາງສະແດງການທ່ອງທ່ຽວ ຫຼື ​​ເທສະການກ່ຽວກັບກິດຈະການການທ່ອງທ່ຽວ ເຊິ່ງການເກັບໃນແຕ່ລະກິດຈະການມີການຕົກລົງເປັນສະເພາະຕື່ມອີກ.


ສ່ວນການຄຸ້ມຄອງ ແລະ ການນຳໃຊ້ກອງທຶນການທ່ອງທ່ຽວ ແມ່ນມີການປະສານງານສົມທົບກັນ ລະຫວ່າງ ຂະແໜງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກັບຂະແໜງສ່ວຍສາອາກອນ ແລະ ຂະແໜງການອື່ນໆທີ່ກ່ຽວຂ້ອງ ເພຶ່ອສົມທຽບ, ກວດກາ, ຕິດຕາມບັນຊີເງິນຝາກຂອງຕົນຢູ່ຄັງເງິນແຫ່ງຊາດ ແລ້ວລາຍງານໃຫ້ຂັ້ນເທິງຂອງຕົນຮັບຊາບ ກ່ອນວັນທີ 10 ຂອງເດືອນຖັດໄປ, ຂະແໜງ ຖວທ ຂັ້ນສູນກາງ ແລະ ທ້ອງຖິ່ນ ຕ້ອງກໍານົດລາຍຮັບ-ລັາຍຈ່າຍ ກອງທຶນການທ່ອງທ່ຽວເຂົ້າໃນແຜນງົບປະມານປະຈໍາປີຂອງຕົນຕາມຂັ້ນຕອນ ແລະ ລະບຽບການ ທີ່ໄດ້ກໍານົດໄວ້ໃນກົດໝາຍງົບປະມານແຫ່ງລັດ.

ທັງນີ້, ກໍເພຶ່ອເປັນບ່ອນອີງໃນການຈັດຕັ້ງປະຕິບັດຂັ້ນຕອນ, ວິທີການເກັບ, ການຄຸ້ມຄອງ, ການນຳໃຊ້ ແລະ ການຈັດແບ່ງກອງທຶນການທ່ອງທ່ຽວຢູ່ນະຄອນຫຼວງ ແລະ ບັນດາແຂວງໃຫ້ເປັນລະບົບ ແລະ ເປັນເອກະພາບກັນໃນຂອບເຂດທົ່ວປະເທດ ໃຫ້ຖືກຕ້ອງຕາມກົດໝາຍ ແລະ ນິຕິກຳດ້ານການເງິນ, ສອດຄ່ອງກັບສະພາບຕົວຈິງ ກັບຄວາມຕ້ອງການພັດທະນາການທ່ອງທ່ຽວ ຂອງສາທາລະນະລັດປະຊາທິປະໄຕປະຊາຊົນລາວ.

ທີ່ມາ: ຂ່າວແຂວງເຊກອງ / ຂ່າວ-ພາບ: ນາລີວັນ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.