Header Ads

ລະມາມ ໄຂສົກຮຽນໃໝ່ປະຈຳສົກປີ 2017-2018




ພິທີໄຂສົກຮຽນໃໝ່ປະຈໍາສົກຮຽນ 2017-2018 ໄດ້ໄຂຂຶ້ນ ຢ່າງເປັນທາງການໃນຕອນເຊົ້າຂອງວັນທີ 1 ກັນ 2017 ນີ້, ຢູ່ທີ່ເດີ່ນໂຮງຮຽນມັດທະຍົມຕົ້ນ ລາວ-ຫວຽດ ພາຍໄຕ້ການເຂົ້າຮ່ວມເປັນປະທານຂອງທ່ານ ນ. ຄໍາເສັງ ທຸມມະວົງສາ ຄະນະປະຈຳພັກເມືອງ ຮອງເຈົ້າເມືອງລະມາມ ຜູ້ຊີ້ນຳວຽກງານວັດທະນະທຳ-ສັງຄົມ ຂັ້ນເມືອງ, ທ່ານ ຄຳຜາຍ ສຸນີວັນ ຮອງຫົວໜ້າພະແນກສຶກສາທິການ ແລະ ກິລາແຂວງ, ທ່ານ ໂພທອງ ສີລັນດອນ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີບັນດາຄະນະອຳນວຍການ,ພະນັກງານຄູອາຈານ, ອໍານາດການປົກຄອງບ້ານ ຕະຫຼອດຮອດນ້ອງນ້ອຍນັກຮຽນເຂົ້າຮ່ວມ.



ໃນພິທີຄັ້ງນີ້, ທ່ານ ໂພທອງ ສີລັນດອນ ຫົວໜ້າຫ້ອງການສຶກສາທິການ ແລະ ກິລາເມືອງລະມາມໄດ້ລາຍງານຜົນສຳເລັດການຈັດຕັ້ງປະຕິບັດແຜນພັດທະນາການສຶກສາ ແລະ ທິດທາງແຜນການໃນຕໍ່ໜ້າໂດຍຫຍໍ້, ທົ່ວເມືອງລະມາມມີຈຳວນໂຮງຮຽນທັງໝົດ 77 ແຫ່ງ( ອະນຸບານ 7 ແຫ່ງ, ປະຖົມ 53 ແຫ່ງ ແລະ ມັດທະຍົມ 17 ແຫ່ງ); ມີອາຄານ 129 ຫຼັງ(ອະນຸບານ 7 ຫຼັງ, ປະຖົມ 87 ຫຼັງ ,ມັດທະຍົມ 35 ຫຼັງ) ; ມີຈຳນວນຫ້ອງນັກຮຽນ 414 ຫ້ອງ( ອະນຸບານ 19 ຫ້ອງ,ຫ້ອງກຽມປະຖົມ 25 ຫ້ອງ, ປະຖົມ 213 ຫ້ອງ,ມັດທະຍົມສຶກສາ 157 ຫ້ອງ), ມີຈຳນວນຄູສອນ ແລະ ພະນັກງານບໍລິຫານໃນໂຮງຮຽນ 648 ຄົນ, ຍິງ 398 ຄົນ, ມີນັກຮຽນທັງໝົດ 12.163 ຄົນ,ຍິງ 5.861 ຄົນ ອັນທີ່ພົ້ນເດັ່ນແມ່ນໄດ້ຈັດພິທີປະກາດເມືອງລະມາມ ເປັນເມືອງຈົບຊັ້ນມັດທະຍົມສຶກສາຕອນຕົ້ນບໍາລຸງ ໃນປີຜ່ານມາ,ໃນນີ້ຂະຫຍາຍໂຮງຮຽນອະນຸບານໄດ້ 2 ແຫ່ງ,ຂະຫາຍຫ້ອງກຽມປະຖົມໄດ້ 1 ຫ້ອງ,ໄດ້ຮັບຕົວເລກ ພ້ອມຈັດສົ່ງຄູອາສາລົງປະຈຳການໃນໂຮງຮຽນທີ່ຂາດຄູສອນ ຈຳນວນ 29 ສະຫາຍ ຍິງ 11 ສະຫາຍ.ສ່ວນທິດທາງແຜນການໃນສົກປີ 217-2018 ສູ້ຊົນໃຫ້ອັດຕາເຂົ້າຮຽນຂອງເດັກ 0-2ປີໃຫ້ບັນລຸ 10%(ຈາກ 2016-2017: 8,62%),ສູ້ຊົນໃຫ້ອັດຕາເຂົ້າຮຽນຂອງເດັກ 3-5ປີ ບັນລຸ 53%(ຈາກ 2016-2017: 49,09%),ສູ້ຊົນໃຫ້ອັດຕາເຂົ້າຮຽນຂອງເດັກໃຫ້ບັນລຸ 85%(ຈາກ 2016-2017:83,13%),ອັດຕາເຂົ້າຮຽນໃໝ່ໃຫ້ບັນລຸ 99%, ສວ່ນອັດຕາຄ້າງຫ້ອງໃຫ້ຫຼຸດລົງຈາກ 8,51% ເປັນ 6,17% ແລະ ອັດປະລະຫຼຸດລົງຈາກ 6,09% ໃຫ້ເຫຼື່ອ 4,57%. ໃນພິທີໄຂສົກຮຽນໃໝ່ຍັງໄດ້ມອບໃບຍ້ອງຍໍໃຫ້ແກ່ຄູອາຈານຜູ້ທີ່ມີຜົນງານສອນດີ-ສອນເກ່ງຈໍານວນ 11 ທ່ານ, ຍິງ 5 ທ່ານ.




ໂອກາດນີ້, ທ່ານ ນ. ຄຳເສັງ ທຸມມະວົງສາ ຮອງເຈົ້າເມືອງລະມາມ ກໍ່ໄດ້ໃຫ້ກຽດຂຶ້ນໂອ້ລົມເຊີ່ງ ກ່ອນອື່ນ ທ່ານກໍ່ໄດ້ຍ້ອງຍໍຊົມເຊີຍຕໍ່ຜົນງານທີ່ພະນັກງານຄູ-ອາຈານທັງໝົດຍາດມາໄດ້ໃນໄລຍະຜ່ານມາ ພ້ອມທັງຮຽກໃຫ້ບັນດາພະນັກງານຄູ-ອາຈານທັງໝົດ ໂດຍສະເພາະຜູ້ບໍລິຫານການສຶກສາ ຕ້ອງສຸ່ມຈິດສຸ່ມໃຈໃນການຈັດຕັ້ງປະຕິບັດວຽກງານການຮຽນ-ການສອນ ໃນສົກຮຽນໃໝ່ນີ້ໃຫ້ມີຄຸນນະພາບ, ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ບັນດາພະນັກງານຄູອາຈານ ເຊື່ອມຊຶມກຳແໜ້ນຕໍ່ແນວທາງແຜນນະໂຍບາຍທີ່ພັກ-ລັດວາງອອກ ໂດຍຕິດພັນກັບຄວາມສາມັກຄີພາຍໃນໃຫ້ໜັກແໜ້ນ , ເອົາໃຈໃສ່ຊີ້ນໍາໆພາ 7 ໜ້າວຽກຂອງການບໍລິຫານການສຶກສາ ແລະ 5 ຫຼັກມູນຂອງກະຊວງສຶກສາທິການ ແລະ ກິລາວາງອອກໃຫ້ປະກົດຜົນເປັນຈິງເທື່ອລະກ້າວ.


ຂ່າວ-ພາບ : ດາວສະຫວັນ ໄຊລາສອນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.