Header Ads

ປິດໂຄງການສ້າງຄວາມເຂັ້ມແຂງດ້ານສຸຂະພາບໄລຍະ I



ກອງປະຊຸມສະຫຼຸບຕີລາຄາ ແລະ ປິດໂຄງການສ້າງຄວາມເຂັ້ມແຂງດ້ານການບໍລິການຮັກສາສຸຂະພາບໄລຍະທີ I ໄດ້ຈັດຂຶ້ນໃນວັນທີ 21 ກັນຍາ 2017 ຢູ່ຫ້ອງປະຊຸມພະແນກສາທາລະນະສຸກແຂວງເຊກອງ ໂດຍການເຂົ້າຮ່ວມຂອງທ່ານ ຖາວອນ ພົມມະໄລລຸນ ຮອງເຈົ້າແຂວງໆເຊກອງ, ມີຜູ້ຕາງໜ້າຈາກອົງການຊ່ວຍເຫຼືອເຊິ່ງກັນ ແລະ ກັນ (SFE) ປະຈໍາ ສປປ ລາວ, ຂະແໜງການກ່ຽວຂ້ອງຂັ້ນສູນກາງ, ແຂວງ ແລະ ເມືອງເຂົ້າຮ່ວມ.

ໃນກອງປະຊຸມຄັ້ງນີ້ ບັນດາຜູ້ເຂົ້າຮ່ວມໄດ້ຮັບຟັງຜົນຂອງການເຄື່ອນໄຫວຈັດຕັ້ງປະຕິບັດວຽກງານຂອງໂຄງ ການຕະຫຼອດໄລຍະ 3 ປີ 2014-2017 ຜ່ານມາ ໂດຍສະເພາະແມ່ນໝາກຜົນ ແລະ ຜົນສຳເລັດຂອງການປະຕິບັດ 5 ກິດຈະກຳຫຼັກຄື: ກິດຈະກຳການຝຶກອົບຮົມສ້າງຄູຝຶກ; ກິດຈະກໍາສະໜັບສະໜູນການຮຽນ; ກິດຈະກຳສະໜອງອຸປະ ກອນການແພດ; ກິດຈະກໍາຝຶກອົບຮົມກ່ຽວກັບການຄຸ້ມຄອງບໍລິຫານ ແລະ ກິດຈະກໍາສະໜັບສະໜູນການສ້ອມແປງ. ນອກຈາກນັ້ນ ຍັງໄດ້ຮັບຟັງການປະກອບຄຳຄິດຄຳເຫັນໃສ່ຈຸດອ່ອນ, ສິ່ງທ້າທາຍ ແລະ ຂໍ້ຄົງຄ້າງທີ່ເປັນອຸປະສັກຕໍ່ການປະຕິບັດວຽກງານຂອງໂຄງ ທັງນີ້ ກໍ່ເພື່ອພ້ອມກັນຫາວິທີແກ້ໄຂ ໂດຍແນໃສ່ເຮັດໃຫ້ການຈັດຕັ້ງປະຕິບັດວຽກງານໃນໄລຍະທີ II ມີຜົນສໍາ ເລັດໃໝ່ທີ່ດີກວ່າເກົ່າ (ໄລຍະທີ 2 ຈະເລີ່ມປະຕິບັດເດືອນທີ 1 ປີ 2018).

ທ່ານ ນາງ ນວນຕາ ແກ້ວທານິນ ວິຊາການອົງການຊ່ວຍເຫຼືອເຊິ່ງກັນ ແລະ ກັນປະຈຳແຂວງເຊກອງ ກ່າວວ່າ: ໂຄງການສ້າງຄວາມເຂັ້ມແຂງດ້ານການບໍລິການຮັກສາສຸຂະພາບ ແມ່ນໄດ້ຮັບທຶນສະໜັບສະໜູນຈາກອົງການເພື່ອການພັດທະນາ ແລະ ການຮ່ວມມືແຫ່ງປະເທດສະວິດເຊີແລນ ແລະ ອົງການຝຣັ່ງເພື່ອການພັດທະນາລວມທັງໝົດກວ່າ 4 ແສນໂດລາ ຫຼື ປະມານ 3,7 ຕື້ກວ່າກີບ. ໂຄງການນີ້ ແມ່ນສຸມໃສ່ 5 ກິດຈະກໍາ.


ໃນໂອກາດດັ່ງກ່າວ ທ່ານຮອງເຈົ້າແຂວງໆເຊກອງ ກ່າວວ່າ: ຜົນສຳເລັດການເຄື່ອນໄຫວວຽກງານຂອງໂຄງການໃນໄລຍະຜ່ານມາ ແມ່ນເປັນພື້ນຖານອັນໜັກແໜ້ນປະກອບສ່ວນສຳຄັນເຂົ້າໃນການພັດທະນາວຽກງານສາທາລະນະສຸກຂອງແຂວງເຊກອງໃຫ້ນັບມື້ສູງຂຶ້ນ ໂດຍສະເພາະແມ່ນດ້ານບຸກຄະລາກອນ, ອຸປະກອນ ແລະ ລະບົບພື້ນຖານໂຄງລ່າງ. ແຕ່ເຖິງຢ່າງໃດກໍ່ຕາມ ເມື່ອທຽບໃສ່ຄວາມຮຽກຮ້ອງຕ້ອງການໃນການບໍລິການປະຊາຊົນແລ້ວແມ່ນຍັງມີຫຼາຍຕ້ອງສືບຕໍ່ພັດທະນາ ແລະ ແກ້ໄຂ ໂດຍສະເພາະແມ່ນດ້ານອຸປະກອນ, ຈຳນວນພະນັກ ງານແພດ-ໝໍ ແລະ ຄວາມຮູ້ຄວາມສາມາດອື່ນໆໃຫ້ສູງຂຶ້ນກວ່າເກົ່າ.


ຂ່າວ : ສັນຍາ/ຂ່າວແຂວງດເຊກອງ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.