Header Ads

ກອງປະຊຸມຄົບຄະນະບໍລິຫານງານພັກເມືອງທ່າແຕງ ປະຈໍາໄຕມາດ 3 ເດືອນ ຄັ້ງທີ 3 ສະໄໝທີ 5



ແຂວງເຊກອງ  : ກອງປະຊຸມຄົບຄະນະບໍລິຫານງານພັກເມືອງ ທ່າແຕງ ປະຈໍາໄຕມາດ 3 ເດືອນ ຄັ້ງທີ 3 ສະໄໝທີ 5 ໄດ້ໄຂຂື້ນຕອນເຊົ້າວັນທີ 28 ກັນຍາ 2017 ຜ່ານມານີ້ ຢູ່ທີ່ຫ້ອງປະຊຸມຊັ້ນສອງຫ້ອງວ່າການປົກຄອງເມືອງ ທ່າແຕງ ແຂວງ ເຊກອງ ໂດຍພາຍໃຕ້ການເປັນປະທານຂອງສະຫາຍ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ. ກອງປະຊຸມ ຈະໄດ້ຄົ້ນຄວ້າ, ປຶກສາຫາລື ແລະຕີລາຄາຜົນການຈັດຕັ້ງປະຕິບັດຊີ້ນໍາ-ນໍາພາຮອບດ້ານປະຈໍາໄຕມາດ 3 ເດືອນ, ນັບແຕ່ເດືອນ ກໍລະກົດຫາເດືອນກັນຍານີ້ ແລະທິດທາງສໍາລັບ 3 ເດືອນທ້າຍປີ 2017 ໃນຕໍ່ໜ້າ.

ສະຫາຍ ຄໍາໄພ ສິມມາວັດ ຮອງເລຂາພັກເມືອງ ທ່າແຕງ ຂື້ນຜ່ານບົດສະຫຼຸບລາຍງານໃນການຈັດຕັ້ງປະຕິບັດວຽກງານຮອບດ້ານ 3 ເດືອນ, ນັບແຕ່ເດືອນກໍລະກົດຫາເດືອນກັນຍານີ້ ແລະທິດທາງ 3 ເດືອນທ້າຍປີ 2017 ເຊິ່ງໄດ້ຍົກຜົນງານທີ່ພົ້ນເດັ່ນ ພາຍໃຕ້ການຊີ້ນຳ-ນຳພາ ແລະເປັນຄວາມຮັບຜິດຊອບຂອງຄະນະພັກແຕ່ລະຂັ້ນ, ແຕ່ລະຂະແໜງການເປັນຕົ້ນ ແມ່ນການເອົາໃຈໃສ່ເປັນເຈົ້າການສະກັດກັ້ນປະກົດການຫຍໍ້ທໍ້ຕ່າງໆໃນສັງຄົມ,ເຮັດໃຫ້ທົ່ວເມືອງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ, ສາມາດສ້າງບ້ານປອດຄະດີໄດ້ 5 ບ້ານ, ມີ 378 ຄອບຄົວ,ຈັບຜູ້ຕ້ອງຫາຄະດີຕ່າງໆໄດ້ 13 ຄົນ, ໄດ້ມອບເຄື່ອງນຸ່ງໃຫ້ກອງຫຼອນໄດ້ 5 ບ້ານ, ມອບໃບຢັ້ງຢືນບ້ານວັດທະນະທໍາ 1 ບ້ານ,ໃບຢັ້ງຢືນຄອບຄົວວັດທະນະທໍາໄດ້ 7 ບ້ານ ມີ 348 ຄອບຄົວ, ຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສໍາຮອງມີ 28 ສະຫາຍ, ຍິງ 10 ສະຫາຍ, ເລື່ອນສະມາຊິກພັກສໍາຮອງຂື້ນສົມບູນມີ 19 ສະຫາຍ, ຍິງ 6 ສະຫາຍ, ປັບປຸງກໍ່ສ້າງຮາກຖານພັກໄດ້ 6 ໜ່ວຍ ແລະ 1 ຄະນະພັກຮາກຖານ, ປັບປຸງອົງການຈັດຕັ້ງນາຍບ້ານໄດ້ 5 ບ້ານ, ເຜີ່ຍແຜ່ນິຕິກໍາຕ່າງໆ ເພື່ອສ້າງ ແລະຮັບຮອງເປັນບ້ານພັດທະນາໄດ້ 10 ບ້ານ, ໄດ້ຮັບສໍານວນຄະດີ 2 ເລື່ອງ, ແກ້ໄຂຄະດີຕ່າງໆມີ 9 ຄະດີ, ວຽກງານພົວພັນຕ່າງປະເທດໄດ້ເພີ່ມທະວີຮັດແໜ້ນຄວາມສາມັກຄີພິເສດການຮ່ວມມືຮອບດ້ານກັບ ສາທາລະນະລັດ ສັງຄົມນິຍົມ ຫວຽດນາມ ໄດ້ຮັບການຊ່ວຍເຫຼືອລ້າຈາກຄະນະພັກ ແລະປະຊາຊົນເມືອງ ຟູນິງ ແຂວງ ກວາງນາມ ສສ ຫວຽດນາມ ກໍ່ສ້າງກໍາແພງຮົ້ວໂຮງຮຽນອະນຸບານບ້ານ ຫ້ວຍຊາຍ ມູນຄ່າ 2 ຕື້ກວ່າດົ້ງ, ມາຮອດປັດຈຸບັນສໍາເລັດການກໍ່ສ້າງຮ້ອຍສ່ວນຮ້ອຍ, ດ້ານເສດຖະກິດສາມາດເກັບລາຍຮັບເຂົ້າງົບປະມານໄດ້ 78 ກວ່າສ່ວນຮ້ອຍ,ປະຕິບັດລາຍຈ່າຍໄດ້ 73 ກວ່າສ່ວນຮ້ອຍຂອງແຜນການປີ, ຕິດຕາມໂຄງການລົງທືນຂອງລັດທີ່ສະພາຮັບຮອງຄື:ໂຄງການກໍ່ສ້າງຊົນລະປະທານຫ້ວຍດໍາ ບ້ານດອນຊາ, ໂຄງການກໍ່ສ້າງເສັ້ນທາງເຂົ້າເຂດຜະລິດຂອງປະຊາຊົນສໍາເລັດ 100%, ໂຄງການກໍ່ສ້າງຊົນລະປະທານ, ໂຄງການກໍ່ສ້າງໂຮງຮຽນປະຖົມສົມບູນບ້ານຫຼີກສໍາເລັດ 30%,ໂຄງການກໍ່ສ້າງສະໜາມຂີ້ເຫຍື່ອຖາວອນສໍາເລັດ 31%, ໂຄງການກໍ່ສ້າງໂຮງຮຽນປະຖົມສົມບູນບ້ານໝື່ນກາງສໍາເລັດ 65%.

ໂອກາດນີ້ ສະຫາຍ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ ໄດ້ຕີລາຄາສູງຕໍ່ຄະນະພັກທຸກຂັ້ນ ພ້ອມເນັ້ນໃຫ້ເອົາໃຈໃສ່ການຊີ້ນໍາ-ນໍາພາແຕ່ລະໜ້າວຽກທີ່ຂື້ນກັບຄວາມຮັບຜິດຊອບຂອງຕົນໃຫ້ດີຂື້ນກວ່າເກົ່າ ຖືເອົາບັ້ນດໍາເນີນຊີວິດການເມືອງພາຍໃນພັກ,ປັບປຸງພັກໃຫ້ມີຄວາມໜັກແໜ້ນ ແລະເຂັ້ມແຂງທາງດ້ານການຈັດຕັ້ງ, ບັນດາຫ້ອງການ, ໜ່ວຍງານ, ບ້ານ ໃຫ້ສຸມໃສ່ຜັນຂະຫຍາຍທຸກມະຕິຄໍາສັ່ງຂອງຂັ້ນເທິງວາງອອກ, ຕັ້ງໜ້າຫັນລົງຮາກຖານຢ່າງແຂງແຮງເປັນປົກກະຕິຕໍ່ເນື່ອງ, ສ້າງຂະບວນການແຂ່ງຂັນຮັກຊາດ, ສ້າງບ້ານພັດທະນາ ຕິດພັນກັບການເຮັດທົດລອງສາມສ້າງ ໂດຍສະເພາະແມ່ນ ຂະແໜງທີ່ກຽວຂ້ອງ ຕ້ອງລົງຊຸກຍູ້ສ້າງຄວມເຂັ້ມແຂງຢູ່ຮາກຖານບ້ານ ເພື່ອສຸມໃສ່ເຂົ້າໃນການພັດທະນາພື້ນຖານໂຄງ່ລາງ, ສ້າງອາຊີບຕາມທ່າແຮງທ້ອງຖິນ ເຮັດໃຫ້ປະຊາຊົນມີຊີວິດການເປັນຢູ່ທີດີຂື້ນເທື່ອລະກ້າວ.

ກອງປະຊຸມໃນຄັ້ງນີ້ຍັງໄດ້ຍົກເອົາຫຼາຍບັນຫາເພື່ອນຳມາພິຈາລະນາ, ຄົ້ນຄ້ວາ ນັບທັງຂໍ້ຂາດຕົກບົກຜ່ອງ,ບົດຮຽນທີ່ຖອດຖອນໄດ້ຂອງຄະນະພັກ ເພື່ອກະກຽມສະເຫຼີມສະຫຼອງສອງວັນສໍາຄັນລາວ-ຫວຽດນາມ ແລະ ວັນສະເຫຼີມສະຫຼອງເມືອງທ່າແຕງຄົບຮອບ 25 ປີທີ່ຈະມາເຖິງນີ້ໃຫ້ເປັນຂະບວນການຢ່າງຟົດຟື້ນ.

ຂ່າວ: ພອນ ບຸນອຸທິດ /ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.