Header Ads

ເຊກອງ ປຶກສາຫາລື ທົດແທນຄ່າເສຍຫາຍ ແລະ ຟື້ນຟູຊີວິດການເປັນຢູ່ໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໂຄງການເຂື່ອນໄຟຟ້ານໍ້າຕົກ 4A ແລະ 4B



ແຂວງເຊກອງ:  ຕອນເຊົ້າວັນທີ 26 ກັນຍາ 2017 ນີ້ ຢູ່ທີ່ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງເຊກອງ ໄດ້ມີກອງປະຊຸມປຶກສາຫາລື ການທົດແທນຄ່າເສຍຫາຍ ແລະ ຟື້ນຟູຊີວິດການເປັນຢູ່ໃຫ້ແກ່ປະຊາຊົນຜູ່ທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າຕົກ 4A ແລະ 4B ໂດຍການເຂົ້າຮ່ວມເປັນປະທານຂອງທ່ານ ສີດາ ສຸວັນນະສາຍ ກໍາມະການປະຈໍາພັກແຂວງ, ຮອງເລຂາພັກແຂວງ, ຮອງເຈົ້າແຂວງ, ປະທານຄະນະກໍາມະການຄຸ້ມຄອງສິ່ງແວດລ້ອມ ສັງຄົມ-ທໍາມະຊາດ ແລະ ແກ້ໄຂຜົນກະທົບ ຈາກໂຄງການພັດທະນາພະລັງງານໄຟຟ້າ ແລະ ສາຍສົ່ງທົ່ວແຂວງ, ມີບັນດາຄະນະກໍາມະການຄຸ້ມຄອງສິ່ງແວດລ້ອມ ສັງຄົມ-ທໍາມະຊາດ ແລະ ແກ້ໄຂຜົນກະທົບຈາກໂຄງການພັດທະນາພະລັງງານໄຟຟ້າ ແລະ ສາຍສົ່ງທົ່ວແຂວງ, ມີບັນດາຂະແຫນງການທີ່ກ່ຽວຂ້ອງຂັ້ນແຂວງ-ເມືອງ ພ້ອມດ້ວຍຕາງຫນ້າຜູ້ພັດທະນາໂຄງການເຂື່ອນໄຟຟ້ານໍ້າຕົກ 4A; 4B ເຂົ້າຮ່ວມ.



ໃນກອງປະຊຸມບັນດາທ່ານຄະນະກໍາມະການ ແລະ ຫນ່ວຍງານທີ່ກ່ຽວຂ້ອງກໍໄດ້ຮ່ວມກັນຄົ້ນຄວ້າປຶກສາຫາລື, ປະກອບຄໍາຄິດເຫັນທາງດ້ານວິຊາການເຂົ້າໃສ່ແຜນງານຕ່າງໆຂອງໂຄງການເຊັ່ນ: ຜ່ານໂຄງຮ່າງແບບເຮືອນ, ສຸກສາລາ, ໂຮງຮຽນ, ປັກຜັງບ້ານ ແລະ ແຜນການຈັດສັນການຍົກຍ້າຍປະຊາຊົນອອກຈາກໂຄງການເຂື່ອນໄຟຟ້າ 4B, ແຜນການຊົດເຊີຍຕໍ່ປະຊາຊົນຜູ້ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າຕົກ 4A; 4B ແລະ ສາຍສົ່ງໄຟຟ້າແຮງສູງ 230 kv ແລະ ແຜນການຊົດເຊີຍຟື້ນຟູຊີວິດການເປັນຢູ່ຄອບຄົວຜູ້ທີ່ໄດ້ຮັບຜົນກະທົບຈາກໂຄງການ ເພື່ອທີ່ຈະນໍາໄປປັບປຸງເນື້ອໃນຂອງບົດລາຍງານການປະເມີນຜົນກະທົບຕໍ່ສິ່ງແວດລ້ອມໃຫ້ມີຄວາມສົມບູນ, ສາມາດຮັບຮອງ ແລະ ນໍາໄປຈັດຕັ້ງປະຕິບັດໃຫ້ມີຄວາມສອດຄ່ອງກັບດໍາລັດວ່າດ້ວຍການທົດແທນຄ່າເສຍຫາຍ ແລະ ຈັດສັນຍົກຍ້າຍປະຊາຊົນຈາກໂຄງການພັດທະນາ ໃຫ້ມີເນື້ອໃນຄົບຖ້ວນສົມບູນ ຮັບປະກັນການພັດທະນາໃຫ້ໄປຕາມທິດສີຂຽວ ແລະ ຍືນຍົງ.




ທັງນີ້ ກໍເພື່ອແນໃສ່ເຮັດໃຫ້ການຈັດຕັ້ງປະຕິບັດບັນດາໂຄງການຕ່າງໆທີ່ມາລົງທຶນ ທັງການລົງທຶນຂອງລັດ, ຂອງເອກະຊົນທັງພາຍໃນ ແລະ ຕ່າງປະເທດ ທີ່ມາດໍາເນີນກິດຈະການຢູ່ພາຍໃນ ສປປ ລາວ ກໍຄືຢູ່ແຂວງເຊກອງໃຫ້ເກີດປະໂຫຍດສູງສຸດແກ່ປະຊາຊົນ ແລະ ສິ່ງແວດລ້ອມ ຫລື ບໍ່ໃຫ້ສົ່ງຜົນກະທົບຕໍ່ສິ່ງແວດລ້ອມ ສັງຄົມ-ທໍາມະຊາດ.


ຂ່າວ-ພາບ: ນາລີວັນ/ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.