Header Ads

ທ່ານນາຍົກລັດຖະມົນຕີ ໃຫ້ກຽດໂອ້ລົມຕໍ່ຄະນະນັກກີລາລາວ

ຕອນເຊົ້າຂອງວັນທີ 5 ກັນຍາ 2017 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນ ຕີ ໄດ້ໃຫ້ກຽດຕ້ອນຮັບ ແລະ ໂອ້ລົມ ຕໍ່ຄະນະນັກກີລາລາວ ທີ່ກັບມາຈາກການແຂ່ງຂັນກິລາຊີເກມ ຄັ້ງທີ 29 ທີ່ປະເທດມາເລເຊຍ ໃນລະຫວ່າງວັນທີ 19-30 ສິງຫາ 2017.

ໃນໂອກາດດັ່ງກ່າວ, ທ່ານ ສົມພູ ພົງສາ ຜູ້ຊ່ວຍລັດຖະມົນຕີ, ຮອງປະທານ ແລະ ເລຂາທິການ ຄະນະກຳມະການໂອແລມປິກແຫ່ງຊາດລາວ ໄດ້ລາຍງານຜົນການເຂົ້າຮ່ວມການແຂ່ງຂັນກີລາຊີເກມ ຄັ້ງທີ 29 ທີ່ປະເທດມາເລເຊຍ ໃຫ້ທ່ານນາຍົກລັດຖະມົນຕີໄດ້ຮັບຊາບ ຊຶ່ງເຫັນວ່າ: ມະຫາກຳກີລາຊີເກມຄັ້ງນີ້ ໄດ້ກຳນົດເອົາ 38 ປະເພດກີລາ ບັນຈຸເຂົ້າໃນການແຂ່ງຂັນ ແລະ ມີການຊີງໄຊຫຼຽນຄຳທັງໝົດ 405 ຫຼຽນ. ສຳລັບຄະນະກີລາ ສປປ ລາວ ໄດ້ສົ່ງນັກກິລາເຂົ້າຮ່ວມການແຂ່ງຂັນທັງໝົດ 22 ປະເພດກີລາ, ລວມຜູ້ເຂົ້າຮ່ວມທັງໝົດ 350 ຄົນ ໃນນັ້ນ ປະກອບມີ ຄະນະມົນຕີຊີເກມ, ຄະນະນຳ, ແພດກີລາ, ກຳມະການຕັດສີນ, ຄູຝຶກ ແລະ ນັກກີລາ ຈຳນວນ 296 ຄົນ ຊຶ່ງນຳໃຊ້ງົບປະມານຂອງລັດຖະບານ ທີ່ໄດ້ໃຫ້ການສະໜັບສະໜູນ ແລະ ອະນຸມັດ ຈຳນວນ 18,37 ຕື້ກີບ ພ້ອມນັ້ນ ກໍ່ຍັງມີຄະນະສັງເກດການ, ຄະນະສະຫະພັນກີລາແຫ່ງຊາດ, ຜູ້ຕິດຕາມ ແລະ ຜູ້ໃຫ້ການອຸປະຖຳກີລາປະເພດຕ່າງໆ ຈຳນວນ 54 ທ່ານ ໂດຍກຸ້ມຕົນເອງທາງດ້ານງົບປະມານໃນການໃຊ້ຈ່າຍຕ່າງໆ. ສຳລັບຜົນສຳເລັດ ກໍ່ຄື ຫຼຽນທີ່ສາມາດຍາດມາໄດ້ ທັງໝົດ 26 ຫຼຽນ ໃນນັ້ນ ປະກອບມີ ຫຼຽນຄຳ ຈຳນວນ 2 ຫຼຽນ ຈາກກິລາເປຕັງ ແລະ ສະນຸກເກີ; ຫຼຽນເງິນ ຈຳນວນ 3 ຫຼຽນ ຈາກກີລາເທັກຄວັນໂດ, ເປຕັງ ແລະ ກະຕໍ້ຊິນລອນ; ຫຼຽນທອງແດງ ຈຳນວນ 21 ຫຼຽນ ຈາກກີລາ ມວຍສາກົນ, ມວຍລາວ, ເປຕັງ, ສະນຸກເກີ, ເທັກຄວັນໂດ, ກະຕໍ້, ກະຕໍ້ຊິນລອນ, ປັ່ນຈັກສີລັດ, ແລ່ນລານ ແລະ ຢູໂດ.



ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ຄະນະດັ່ງກ່າວ. ກ່ອນອື່ນ, ທ່ານໄດ້ກ່າວຍ້ອງຍໍ ຊົມເຊີຍ ແລະ ຕີລາຄາສູງ ຕໍ່ຄະນະນຳກະຊວງສຶກສາທິການ ແລະ ກີລາ, ຄະນະກຳມະການໂອແລມປິກແຫ່ງຊາດລາວ, ຄະນະສະຫະພັນກິລາແຫ່ງຊາດ, ຄູຝຶກ ແລະ ນັກກີລາ ຕະຫຼອດຮອດຜູ້ທີ່ໃຫ້ການສະໜັບສະໜູນ ແລະ ອຸປະຖຳ ແກ່ການເຂົ້າຮ່ວມກິລາຊີ ເກມຄັ້ງນີ້ ທີ່ໄດ້ສຸມສະຕິປັນຍາ, ເຫື່ອແຮງ, ຄວາມຮູ້ຄວາມສາມາດ, ກຳລັງໃຈ ແລະ ກຳລັງຊັບ ເຂົ້າໃນການຄົ້ນຄວ້າ, ຝຶກແອບ ແລະ ແຂ່ງຂັນ ເຮັດໃຫ້ສາມາດຍາດໄດ້ຫຼຽນປະເພດຕ່າງໆ ມາໃຫ້ປະເທດຊາດ ຊຶ່ງສິ່ງເຫຼົ່ານັ້ນ ສ່ອງແສງເຖິງຄວາມຮັບຜິດຊອບ, ຄວາມຕັດສິນໃຈສູງ, ມີຄວາມຫ້າວຫັນ, ອົດທົນ, ມີຄວາມເສຍສະຫຼະ ແລະ ມີພິກໄຫວ ຢ່າງແທ້ຈິງ. ທີ່ສຳຄັນເຫັນໄດ້ວ່າ ນັກກິລາລາວແມ່ນມີລະບຽບວິໄນດີ, ປະຕິບັດກະຕິກາຕ່າງໆຢ່າງເຂັ້ມງວດ, ມີກິລິຍາມາລະຍາດ, ຮັກສາໄດ້ມູນເຊື້ອ ແລະ ວັດທະນະທຳອັນດີງາມຂອງຊາດລາວເຮົາ, ເຖິງແມ່ນວ່ານັກກີລາບໍ່ສາມາດຍາດໄດ້ຫຼຽນ ໝົດທຸກຄົນ ແຕ່ກໍ່ສາມາດເອົາຊະນະໃຈຂອງຜູ້ເບິ່ງ-ຜູ້ຊົມ ແລະ ເພື່ອນກິລາດ້ວຍກັນ ນີ້ນັບວ່າເປັນຄວາມພາກພູມໃຈ ແລະ ກຽດສັກສີຂອງຄວາມເປັນຄົນລາວຢ່າງແທ້ຈິງ. ພ້ອມດຽວກັນນັ້ນ, ທ່ານນາຍົກລັດຖະມົນຕີ ຍັງໄດ້ກ່າວເນັ້ນໜັກ ໃຫ້ຄະນະກິລາລາວທັງໝົດ ຈົ່ງສືບຕໍ່ເສີມຂະຫຍາຍ ແລະ ຮັກສາມູນເຊື້ອອັນດີງາມ ທີ່ພວກເຮົາສາມາດປະຕິບັດໄດ້ ໃນໄລຍະທີ່ຜ່ານມາ ກໍ່ຄື ຖອດຖອນເອົາບົດຮຽນ ທີ່ເກັບກ່ຽວໄດ້ຈາກການເຂົ້າຮ່ວມ ກີລາຊີເກມຄັ້ງນີ້ ໄປປັບປຸງວຽກງານກີລາ ໃຫ້ນັບມື້ເຕີບໃຫຍ່ເຂັ້ມແຂງ ແລະ ມີຜົນສຳເລັດເປັນກ້າວໆ ເພື່ອເປັນພື້ນຖານອັນໜັກແໜ້ນ ໃຫ້ແກ່ການເຂົ້າຮ່ວມງານມະຫາກຳກິລາຕ່າງໆ ທີ່ຈະຈັດຂຶ້ນໃນອະນາຄົດ ທັງຢູ່ພາຍໃນ ແລະ ຕ່າງປະເທດ ໃຫ້ໄດ້ຮັບຜົນທີ່ໜ້າຊື່ນຊົມກວ່າເກົ່າ. ນອກນີ້, ທ່ານຍັງກ່າວຕື່ມວ່າ ໃນນາມລັດຖະບານ ຈະເອົາໃຈໃສ່ຊອກງົບປະມານ ມາຮັບໃຊ້ວຽກງານກີລາໃຫ້ຫຼາຍຂຶ້ນ.​​

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.