Header Ads

ຫົວໜ້າຫ້ອງການ ຖວທ ເມືອງກະລຶມລົງເຄື່ອນໄຫວຊຸກຍູ້ການພັດທະນາແຫຼ່ງທ່ອງທ່ຽວບ້ານຈິງ



ແຂວງເຊກອງ :   ໃນກາງເດືອນກັນຍາ 2017 ຜ່ານມານີ້, ທ່ານ ສຸດສັກສິດ ຍິດແສນຫວັງ ກຳມະການພັກເມືອງ ຫົວໜ້າຫ້ອງການ ຖະແຫຼງຂ່າວ-ວັດທະນະທຳ ແລະທ່ອງທ່ຽວເມືອງ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຊຸກຍູ້ການພັດທະນາວຽກງານທ່ອງທ່ຽວຢູ່ ບ້ານ ຈິງ ເມືອງກະລຶມ ແຂວງເຊກອງ ໂດຍໃຫ້ກຽດຕ້ອນຮັບຢ່າງອົບອຸ່ນຂອງອຳນາດການປົກຄອງ ແລະພໍ່ແມ່ປະຊາຊົນພາຍໃນບ້ານ.



ໃນໂອກາດລົງເຄື່ອນໄຫວເຮັດວຽກໃນຄັ້ງນີ້ ທ່ານ ຫົວໜ້າຫ້ອງການ ຖວທ ເມືອງ ໄດ້ຍົກໃຫ້ເຫັນຈຸດສຳຄັນທີ່ພົ້ນເດັ່ນໃນບ້ານດັງກ່າວວ່າ: ບ້ານ ຈິງ ເປັນບ້ານໜຶ່ງທີ່ຂື້ນກັບກຸ່ມ 01 ສອງຄອນ ຫ່າງຈາກເທດສະບານເມືອງກະລຶມ 10 ກິໂລແມັດ ປະຊາຊົນສ່ວນໃຫຍ່ແມ່ນມີອາຊີບປູກຝັງລ້ຽງສັດ ມີປະຊາກອນທັງໝົດ 250 ຄົນ, ຍິງ 130 ຄົນ, ມີ 43 ຄອບຄົວ, 38 ຫຼັງຄາເຮືອນ ປະກອບມີ 1 ເຜົ່າໃຫຍ່ຄື ເຜົາກຣຽງ ຊຶ່ງເປັນບ້ານທີ່ມີຄວາມອຸດົມສົມບູນໄປດ້ວຍຊັບພະຍາກອນທຳມະຊາດ ແລະທິວທັດທໍາມະຊາດທີ່ສວຍສົດງົດງາມ ພິເສດໃປກວ່ານັ້ນ ແມ່ນມີແຫຼ່ງທ່ອງທ່ຽວທາງດ້ານປະຫວັດສາດ, ທຳມະຊາດ ແລະວັດທະນະທຳ ທີ່ໂດດເດັ່ນເປັນຕົ້ນແມ່ນ ຖໍ້າຈະກຳອົງແກ້ວ, ນໍ້າຕົກຕາດຈາຣຸ້ຍ ທີ່ຢູ່ຫ່າງຈາກເທດສະບານບ້ານ 100 ກວ່າແມັດ ແລະມີຮີດຄອງປະເພນີອັນດີງາມຂອງເຜົ່າ ອັນເປັນທ່າແຮງບົ່ມຊ້ອນໃຫ້ກ້າວໄປສູ່ການພັດທະນາເປັນແຫຼ່ງທ່ອງທ່ຽວລະດັບເມືອງ, ແຂວງ ແລະລະດັບຊາດ ເພື່ອສ້າງລາຍຮັບໃຫ້ແກ່ຄອບຄົວພໍ່ແມ່ປະຊາຊົນພາຍໃນບ້ານ ຈິງ ໃຫ້ເພີ່ມຂື້ນ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ.

ພ້ອມດຽວກັນ ທ່ານ ຫົວໜ້າຫ້ອງການ ຖວທ ເມືອງກະລຶມ ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນພາຍໃນບ້ານດັ່ງກ່າວ ຈົ່ງສ້າງຄວາມສາມະຄີເປັນຈິດໜຶ່ງໃຈດຽວ ເປັນເຈົ້າການທຸ້ມເທເຫື່ອແຮງ, ສຸມທຸກສະຕິປັນຍາຂອງຕົນເຂົ້າໃສ່ການອະນຸລັກຮັກສາ ແລະພັດທະນາແຫຼ່ງທ່ອງທ່ຽວແຫ່ງນີ້ ເພື່ອສາມາດຕອບສະໜອງແກ່ຄວາມຕ້ອງການຂອງນັກທ່ອງທ່ຽວ ພ້ອມທັງດຶງດູດນັກທ່ອງທ່ຽວທັງພາຍໃນ ແລະຕ່າງປະເທດ ໃຫ້ມີຄວາມຈູງໃຈຢາກເຂົ້າມາທ່ຽວຊົມນັບມື້ນັບຫຼາຍຂຶ້ນ.


ຂ່າວ: ອັດສະວິນ ແສງສີຈັນ (ນັກຂ່າວ ເມືອງກະລຶມ 0302807470)
ແຫຼ່ງຂ່າວ: ແຂວງເຊກອງ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.