Header Ads

ຟອຍແຂມສິນຄ້າຕົ້ນຕໍຂອງປະຊາຊົນບ້ານພັດທະນາໝື່ນຫຼວງ ເມືອງບາຈຽງຈະເລີນສຸກ



ຜະລິດຟອຍແຂມເປັນສິນຄ້າ ແມ່ນເປັນອາຊີບຕົ້ນຕໍຂອງປະຊາຊົນ ບ້ານພັດທະນາໝື່ນຫຼວງ ເມືອງບາຈຽງຈະເລີນສຸກ ແຂວງຈໍາປາສັກ ໃນການສ້າງເສດຖະກິດຄອບຄົວໃຫ້ມີຢູ່ມີກິນໄດ້ເປັນຢ່າງດີ.

ທ່ານນາງອິດມິດປະຊາ ຮອງນາຍບ້ານພັດທະນາໝື່ນຫຼວງ ອາຍຸ 41 ປີ ໃຫ້ຮູ້ວ່າ: ບ້ານໝື່ນຫຼວງມີຈໍານວນຄອບຄົວທັງໝົດ 220 ຄອບຄົວ ໃນນັ້ນຢຶດຖືອາຊີບເຮັດຟອຍແຂມຈໍານວນ 190 ຄອບຄົວ, ສ່ວນທີ່ເຫຼືອແມ່ນມີອາຊີບເຮັດສວນ, ກໍາມະກອນ, ການບໍລິການຄ້າຂາຍ. ໂດຍການຜະລິດຟອຍແຂມເປັນສິນຄ້າ ພາຍໃນບ້ານເຫັນວ່າເປັນອາຊີບທີ່ເຮັດມາແຕ່ຮຸ່ນພໍ່-ແມ່ ຊຶ່ງເປັນພື້ນຖານສໍາຄັນ ໃຫ້ຮຸ່ນລູກ ໄດ້ສືບຕໍ່ເຮັດອາຊີບດັ່ງກ່າວເຂົ້າໃນການສ້າງເສດຖະກິດຄອບຄົວໃຫ້ມີຢູ່ມີກິນ ໄດ້ເປັນຢ່າງດີ. ສະນັ້ນແຕ່ປີ 2010 ເປັນຕົ້ນມາໂດຍໄດ້ຮັບການຊຸກຍູ້ສົ່ງເສີມຈາກອໍານາດການປົກຄອງຂອງ ພາກລັດທີ່ກຽ່ວຂ້ອງ ຕໍ່ກັບການຜະລິດຟອຍແຂມ ເປັນສິນຄ້າໃຫ້ມີລັກສະນະເປັນກຸ່ມການຜະລິດ ເພື່ອຮັບປະກັນໃຫ້ແກ່ການຜະລິດທີ່ມີຄຸນະພາບ, ໃຫ້ໄດ້ຈໍານວນຫຼາຍ ສາມາດຕອບສະໜອງກັບຄວາມຕ້ອງການຂອງຕະຫຼາດໄດ້ຢ່າງພຽງພໍ ສະນັ້ນຈິ່ງໄດ້ມີການສ້າງຕັ້ງກຸ່ມການຜະລິດຫັດຖະກໍາ ຟອຍແຂມ ຂອງບ້ານຂຶ້ນ.

ທ່ານ ນາງ ອິດ ມິດປະຊາ ໃຫ້ຮູ້ຕື່ມວ່າ: ການເຮັດຟອຍແຂມ ຂອງປະຊາຊົນພາຍໃນບ້ານ ແມ່ນນໍາໃຊ້ວັດຖຸດິບປະເພດແຂມ ທີ່ປູກເອງ ແລະ ຈໍານວນໜຶ່ງແມ່ນຊື້ມາຈາກເມືອງປາກຊ່ອງ ໃນລາຄາ 2-3 ພັນກີບຕໍ່ກິໂລ (ແຂມປຽກ). ການຜະລິດຟອຍແຂມ ແມ່ນເຮັດໄດ້ຕະຫຼອດປີ, ສະເລ່ຍແຕ່ລະຄົນສາມາດສານຟອຍໄດ້ 12 ຄັນຕໍ່ວັນ ແລະ ມີລາຄາຂາຍປົກກະຕິແມ່ນ 2.500 ກີບຕໍ່ຄັນ, ແຕ່ຖ້າຫາກລູກຄ້າ ຫຼື ມີຜູ້ສັ່ງໃຫ້ສານຟອຍ ທີ່ມີຄວາມໜາຂຶ້ນຕື່ມກໍ່ຈະຄິດໄລ່ລາຄາເພີ່ມຂຶ້ນຕາມຄວາມເໝາະສົມ. ການຈໍາໜ່າຍຟອຍແຂມ ແມ່ນຜູ້ຜະລິດຈໍານວນໜຶ່ງຈະນໍາມາວາງຂາຍຕາມທ້ອງຕະຫຼາດ, ເລາະຂາຍຕາມບ້ານຕ່າງໆ ແລະ ມີພໍ່ຄ້າທົ່ວໄປມາຮັບຊື້ໄປຂາຍຕໍ່ເຊັ່ນ: ພໍ່ຄ້າຈາກແຂວງສະຫວັນນະເຂດ, ສາລະວັນ, ເຊກອງ, ອັດຕະປື ເຊິ່ງປັດຈຸບັນເຫັນວ່າການຕອບຮັບຂອງສັງຄົມໃນການຊົມໃຊ້ຟອຍແຂມ ເປັນຈໍານວນຫຼາຍສົມຄວນ.


ສໍາລັບທຶນຮອນທີ່ນໍາໃຊ້ເຂົ້າໃນການຜະລິດຂອງແຕ່ລະຄອບຄົວແມ່ນອີງຕາມເງື່ອນໄຂຕົວຈິງ ເປັນຕົ້ນຄອບຄົວທີ່ມີທ່າແຮງດ້ານທຶນຮອນ ແລະ ກໍາລັງແຮງງານພຽງພໍ ກໍ່ສາມາດລົງທຶນເຂົ້າໃສ່ການຜະລິດໄດ້ຫຼາຍ ທັງນີ້, ທັງນັ້ນການລົງທຶນເຂົ້າໃສ່ການຜະລິດຫຼາຍ ກໍ່ຈະມີຜົນກໍາໄລຕອບແທນທີ່ໜ້າເພິ່ງພໍໃຈຄື: ຖ້າຫາກລົງທຶນໃນຈໍານວນເງິນ 6 ແສນກີບ ກໍ່ຈະໄດ້ຮັບຜົນກໍາໄລປະມານ 3 ແສນກີບ, ດັ່ງນັ້ນ ຈິ່ງເປັນຜົນກໍາໄລໃຫ້ປະຊາຊົນ ກໍ່ຄືກຸ່ມການຜະລິດຫັດຖະກໍາຟອຍແຂມ ສາມາດມີລາຍຮັບກຸ້ມຕົນເອງ, ມີຊີວິດການເປັນຢູ່ທີ່ດີຂຶ້ນ ແລະ ຜະລິດຕະພັນດັ່ງກ່າວກໍ່ໄດ້ຮັບ ປ້າຍກາໝາຍສິນຄ້າໜຶ່ງເມືອງໜຶ່ງຜະລິດຕະພັນ (ODOP) ແຫ່ງຊາດ ໃນປີ 2014.


ທ່ານ ນາງ ອິດ ມິດປະຊາ ກ່າວໃນຕອນທ້າຍອີກວ່າ: ເພື່ອເປັນການສົ່ງເສີມກຸ່ມການຜະລິດຫັດຖະກໍາຟອຍແຂມ ໃຫ້ມີຄວາມເຂັ້ມແຂງກ້າວໄປເລື້ອຍໆ ທະນາຄານນະໂຍບາຍ ສາຂາແຂວງຈໍາປາສັກ ກໍ່ໄດ້ມີສ່ວນຮ່ວມໃນການສົ່ງເສີມດ້ວຍການໃຫ້ສະມາຊິກຂອງກຸ່ມການຜະລິດ ກູ້ຢືມເງິນ ເພື່ອນໍາມາໃຊ້ເປັນທຶນຮອນເຂົ້າໃສ່ການຜະລິດ ເຊິ່ງກໍານົດໃຫ້ກູ້ຢືມ 5-10 ລ້ານກີບ.


ແຫຼ່ງທີ່ມາ: ່ ຈັນທະວີສັກ/Champamai Newspaper

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.