Header Ads

ນະຄອນຫຼວງວຽງຈັນ ປູກຈິດສຳນຶກຂັບຂີ່ປອດໄພ



ໜັງສືພິມວຽງຈັນໃໝ່ :  ວັນ​ທີ 19 ກັນຍາ 2017  ຜ່າມານີ້ ຢູ່​ທີ່ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ ໄດ້​ຈັດກອງ​ປະຊຸມ​ກະກຽມ​ລົງ​ໂຄສະນາ ເພື່ອ​ແນະນຳ​ນັກ​ຂັບ​ຂີ່​ຕາມ​ຈຸດທາງ​ຄົບ-ທາງ​ແຍກ ໃນ​ນະຄອນຫຼວງ​ວຽງ​ຈັນ ລະຫວ່າງ​ວັນ​ທີ 20 ກັນຍາຫາ 17 ຕຸລາ 2017 ໂດຍເປັນ​ປະທານ​ຮ່ວມ​ຂອງ​ທ່ານ ສີວອນ ສັບ​ທະວີ ຫົວໜ້າ​ຂະແໜງຄຸ້ມ​ຄອງ​ຂົນສົ່ງ ພະ​ແນກ ​ຍທຂ ນວ ທ່ານ​ພັນ​ຕີ ສັງຄົມ ພົມ​ມະລາດ ຮອງ​ຫົວໜ້າ​ພະ​ແນກ​ຕຳຫຼວດ​ຈະລາຈອນ ນະຄອນຫຼວງ ມີ​ຫົວໜ້າ​ກອງຮ້ອຍ​ຈະລາຈອນ 4 ເມືອງ​ໃນ​ເຂົ້າ​ຮ່ວມ.

ການ​ລົງ​ໂຄສະນາ​ເຜີຍແຜ່ຄັ້ງ​ນີ້ ແມ່ນ​ຈະ​ປະຕິບັດ​ຕົວ​ຈິງ​ຢູ່ຕາມ​ໄຟ​ອຳນາດ 3 ແຍກ 4 ແຍກ ແລະ ຈຸດ​ວົງວຽນ​ຢູ່ 4 ເມືອງ​ໃນຄື: ເມືອງ​ສີ​ໂຄດ​ຕະບອງ ເມືອງ​ຈັນທະ​ບູ​ລີ ເມືອງ​ໄຊ​ເຊດ​ຖາ ແລະ ເມືອງສີ​ສັດຕະ​ນາກ ທັງ​ນີ້ກໍ່​ເພື່ອ​ແນໃສ່​ໃຫ້​ບັນດາ​ນັກຂັບ​ຂີ່​ຜູ້​ທີ່​ໃຊ້​ລົດ​ໃຊ້​ຖະໜົນ ​ໃຫ້​ປະຕິ​ບັດ​ຕາມ​ກົດ​ລະບຽບ​ກົດໝາຍຈະລາຈອນ​ທາງບົກ ເພື່ອ​ແກ້​ໄຂບັນຫາ​ການ​ຈະລາຈອນ​ແອ​ອັດ ແລະ ຫຼຸດຜ່ອນ​ການ​ເກີດ​ອຸບັດ​ຕິເຫດ​ຕາມ​ຈຸດ​ທາງ​ຄົບ ແລະ ທາງແຍກໃນ​ນະຄອນ ຫຼວງ​ວຽງ​ຈັນ.

ພາຍຫຼັງ​ທີ່​ສຳເລັດ​ການ​ປະຕິບັດ​ຕົວ​ຈິງ​ຄັ້ງ​ນີ້​ແລ້ວ ທາງ​ເຈົ້າ​ໜ້າທີ່​ຕຳຫຼວດ​ຈະລາ​ຈອນ​ ແມ່ນ​ຈະ​ໄດ້​ໃຊ້​ມາດ​ຕະການ​ເດັດຂາດ​ຕໍ່​ຜູ້​ທີ່​ລະເມີດ​ກົດລະບຽບ​ຈະລາຈອນ ເປັນຕົ້ນແມ່ນ ການ​ລ່ວງ​ໄຟ​ອຳນາດຈອດ​ລົດ​ຢຽບ​ທາງ​ມ້າ​ລາຍ ແລະ ຂັບ​ລົດ​ຂຶ້ນ​ທາງ​ຄົນ​ຍ່າງ ເຊິ່ງ​ຈະໄດ້​ປັບ​ໃໝ​ຕາມ​ກໍລະນີ​ເບົາ​ຫາໜັກຕາມ​ດຳລັດ ເລກ​ທີ 188/​ນຍ ວ່າ​ດ້ວຍ​ການ​ປັບ​ໃໝ​ຕໍ່​ຜູ້​ລະເມີດ​ລະບຽບ​ການ​ສັນຈອນ.

ແຫລ່ງຂ່າວ: ໜັງສືພິມວຽງຈັນໃໝ່ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.