Header Ads

ຫຍິບກຸບຂາຍສ້າງລາຍຮັບເພີ່ມໃຫ້ຄອບຄົວ ຂອງຊາວບ້ານຫ້ວຍແຫ້ ເມືອງຈຳປາສັກ




ການເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກຕາມແນວທາງທີ່ພັກວາງໄວ້ນັ້ນສິ່ງສຳຄັນທີ່ສຸດແມ່ນຕ້ອງເຮັດໃຫ້ຄອບຄົວປະຊາຊົນມີລາຍຮັບທີ່ໝັ້ນຄົງຈາກການຜະລິດສິນຄ້າໃດໜຶ່ງ. ການຫຍິບກຸບຂອງຊາວບ້ານຫ້ວຍແຫ້ ເມືອງຈຳປາສັກນັບວ່າເປັນອາຊີບໜຶ່ງທີ່ເປັນອາຊີບເສີມທີ່ມີມາແຕ່ດົນນານນອກຈາກອາຊີບເຮັດນາ.ປັດຈຸບັນເຖິງລາຍໄດ້ຈາກການຂາຍກຸບບໍ່ຄ່ອຍດີແຕ່ກໍ່ສາມາດຊ່ວຍເຫຼືອຄອບຄົວໄດ້ສ່ວນໃດສ່ວນໜຶ່ງ.

ຜູ້ຂຽນເປັນຄົນບ້ານຫ້ວຍແຫ້ເມືອງຈຳປາສັກ.ຈື່ໄດ້ວ່າພໍແຕ່ຈຳຄວາມໄດ້ກໍ່ໄດ້ເຫັນພໍ່ແມ່ພີ່ນ້ອງຊາວບ້ານຫ້ວຍແຫ້ພາກັນຫຍິບກຸບໝົດບ້ານໂດຍມີແມ່ຄ້າມາເກັບຊື້ກັບທີ່. ດັ່ງນັ້ນລາຍໄດ້ຈາກການຂາຍກຸບຈຶ່ງຖືວ່າເປັນລາຍໄດ້ສຳຄັນທີ່ສາມາດລ້ຽງດູຄອບຄົວໄດ້ເປັນຢ່າງດີຫຼືເວົ້າໄດ້ວ່າເປັນລາຍໄດ້ທີ່ສາມາດລ້ຽງດູລູກເຕົ້າໃຫ້ໄດ້ຮຽນໜັງສືແລະຊື້ເຄື່ອງຮັບໃຊ້ຕ່າງໆ.ເພາະການເຮັດນາສ່ວນຫຼາຍກໍ່ພຽງແຕ່ກຸ້ມກິນສ່ວນຄອບຄົວທີ່ມີເຂົ້າເຫຼືອກິນແມ່ນມີໜ້ອຍ. 

ເມື່ອຮຽນຈົບມັດທະຍົມຜູ້ຂຽນກໍ່ບໍ່ໄດ້ຢູ່ບ້ານຈຶ່ງບໍ່ຄ່ອຍຮູ້ເລື່ອງລາວການຫຍິບກຸບຂອງຊາວບ້ານຫຼາຍປານໃດ. ແຕ່ທີ່ພໍຮູ້ກໍຄືອາຊີບຫຍິບກຸບໄດ້ມີປະຊາຊົນຫຼາຍບ້ານໃນເຂດນັ້ນພາກັນເຮັດ ຄືກັບຊາວບ້ານຫ້ວຍແຫ້ເຊັ່ນ: ບ້ານບ້ານດອນຮີ, ໂນນສະຫວາງ, ດອນກອຍ, ດອນຊຽງຫຼ້າ, ບ້ານກວ້າງແລະອື່ນໆທີ່ ຢູ່ໃນເຂດເມືອງຈຳປາສັກ. ເມື່ອຄົນຫຍິບຫຼາຍຂຶ້ນບວກກັບເງື່ອນໄຂອື່ນໆອີກກໍ່ເຮັດໃຫ້ລາຄາກຸບຖືກລົງຊາວບ້ານຈຶ່ງພາກັນເຊົາເພາະຫຍິບກຸບຂາຍແລ້ວກໍ່ບໍ່ກຸ້ມຄ່າກັບການລົງເຫື່ອລົງແຮງ.


ຜູ້ຂຽນເມືອບ້ານທ້າຍປີ 2016 ເຫັນມີຊາວບ້ານ 2-3 ຄົນພາກັນຟື້ນການຫຍິບກຸບມາຄືນເພາະຫຍິບແລ້ວເຂົາເຈົ້າສົ່ງໃຫ້ລູກຫຼານຂາຍຢູ່ຕະຫຼາດຫຼັກ 14 ເມືອງບາຈຽງທີ່ໃຫ້ລາຄາດີແນ່. ແຕ່ເມື່ອອາທິດແລ້ວນີ້ ທີ່ຜູ້ຂຽນເມືອບ້ານໃນບຸນຫໍ່ເຂົ້າສະຫຼາກຊາວບ້ານບອກວ່າມີຜູ້ຫຍິບກຸບເພີ່ມຂຶ້ນແລ້ວເປັນ 20 ກວ່າຄອບຄົວຍ້ອນມີຄອບຄົວໜຶ່ງໃນບ້ານຊ່ວຍເກັບຊື້ຈາກເຂົາເຈົ້າໃນລາຄາໃບລະ 1.800 ກີບຊຶ່ງຜູ້ຊື້ບອກວ່າລາວສົ່ງຕໍ່ໃຫ້ນ້ອງທີ່ປາກເຊຂາຍຊ່ວຍໃນລາຄາດຽວກັບທີ່ລາວຊື້. ທີ່ລາວຊື້ແລະຂາຍແນວນີ້ ພຽງເພື່ອຢາກຊ່ວຍຊາວບ້ານເພາະລາຄາກຸບນ້ອງຂາຍຕໍ່ຢູ່ປາກເຊກໍ່ພຽງແຕ່ໃບລະ 2.000 ກີບຊຶ່ງໄລ່ຄ່າຂົນສົ່ງຄ່າແຮງງານເຂົ້າໄປແລ້ວຜູ້ຂາຍຢູ່ປາກເຊກໍ່ເກືອບວ່າບໍ່ໄດ້ກຳໄລ. 


ນາງແຫຼ້ ອາຍຸ 46 ປີຊາວບ້ານຫ້ວຍແຫ້ ເປັນອີກຜູ້ໜຶ່ງທີ່ຟື້ນການຫຍິບກຸບມາຄືນບອກວ່າລາວເຄີຍຫຍິບກຸບມາແຕ່ຍັງເປັນເດັກນ້ອຍ. ຮູ້ສຶກດີໃຈທີ່ມີຜູ້ມາຊ່ວຍເກັບຊື້ກຸບພໍໃຫ້ມີລາຍຮັບສ່ວນໃດສ່ວນໜຶ່ງມາໃຊ້ຈ່າຍໃນຄອບຄົວ. ລາວບອກວ່າຢາກໃຫ້ມີຜູ້ຊ່ວຍຊື້ກຸບໄປຕະຫຼອດແລະໄດ້ລາຄາດີກວ່ານີ້ພໍໄດ້ເປັນລາຍຮັບທີ່ໝັ້ນຄົງຂອງຄອບຄົວ,ເພາະຕົນເອງກໍ່ບໍ່ຢາກໄປເຮັດວຽກຢູ່ຕ່າງປະເທດຄືແຕ່ກ່ອນອີກ. 


ເບິ່ງແລ້ວກໍ່ໜ້າເຫັນໃຈຊາວບ້ານ.ຕໍ່ໜ້າຫາກມີການຈັດຕັ້ງໃດໜຶ່ງເຂົ້າມາຊຸກຍູ້ສົ່ງເສີມທາງດ້ານສີມືໃຫ້ມີຄວາມສວຍງາມ, ມີການຈັດຕັ້ງເປັນກຸ່ມ, ມີການຊອກຕະຫຼາດທີ່ໝັ້ນຄົງໃຫ້ເຂົາເຈົ້າເຊື່ອວ່າ “ ກຸບ ” ຄົງເປັນສິນຄ້າທີ່ເປັນເອກະລັກໜຶ່ງທີ່ໜ້າພາກພູມໃຈທັງສາມາດສ້າງລາຍຮັບແລະຊື່ສຽງໃຫ້ຊາວບ້ານຫ້ວຍແຫ້ ກໍ່ຄືປະຊາຊົນໃນເຂດນີ້ທີ່ຫຍິບກຸບໄດ້ອີກທາງໜຶ່ງ. 


ໂດຍ: ສ.ເພັດທານີ/ໜັງສືພິມຈໍາປາໃໝ່

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.