Header Ads

ຫ້ອງວ່າການ ປະທານປະເທດ ເຜີຍແຜ່ດໍາລັດວ່າດ້ວຍ ການແຈ້ງຊັບສິນ




ໃນ​ວັນ​ທີ 22 ກັນຍາ 2017 ນີ້  ຫ້ອງ​ວ່າການ​ ປະທານ​ປະ​ເທດ ​ໄດ້​ຈັດ​ຕັ້ງເຜີຍ​ແຜ່​ດໍາລັດ ​ແລະ ບົດ​ແນະ​ນໍາ ວ່າ​ດ້ວຍການ​ແຈ້ງ​ຊັບ​ສິນ ​ແລະ ລາຍຮັບ, ​ໂດຍ​ການ​ເປັນ​ປະທານ​ຂອງ ທ່ານ ກິ່ງ​ມະ​ໂນ ພົມ​ມະຫາ​ໄຊ ກຳມະການ​ພັກ, ຮອງ​ລັດຖະມົນຕີ, ຮອງ​ຫົວໜ້າ​ຫ້ອງ​ວ່າການ ​ປະທານ​ປະ​ເທດ, ມີ​ບັນ ດາ​ຫົວໜ້າ​ກົມ, ຮອງ​ກົມ ​ແລະ ພ້ອມ​ດ້ວຍພະນັກງານ-​ລັດຖະກອນ​ ​ເຂົ້າ​ຮ່ວມ.




ຈຸດປະສົງ​ສຳຄັນ​ ໃນ​ການ​ເຜີຍ​​ແຜ່​ດຳລັດໃນ​ຄັ້ງ​ນີ້, ເພື່ອ​ເຮັດ​ໃຫ້​ ພະນັກງານ-​ລັດຖະກອນ ທົ່ວຫ້ອງວ່າການ ປະທານ​ປະ​ເທດ ໄດ້ຮັບຮູ້, ເຂົ້າໃຈແຈ້ງ ແລະ ມີຄວາມເປັນເອກະພາບ, ມີຄວາມຮັບຜິດຊອບ ໃນການແຈ້ງຊັບສິນ ແລະ ລາຍຮັບຢ່າງຖືກຕ້ອງ, ຊັດເຈນ, ໂປ່ງ​ໃສ ​ແນ​ໃສ່​ສະ​ກັດ​ກັ້ນ ​ແລະ ຕ້ານ​ການ​ສໍ້​ລາດ​ບັງ​ຫລວງ​ ໃນ​ກົງຈັກ​ການຈັດ​ຕັ້ງ​ຂອງ​ພັກ-​ລັດ ​ເພື່ອ​ປະກອບສ່ວນ​ເຂົ້າ​ໃນ ​ການສ້າງສາ, ​ພັດທະນາປະ​ເທດ​ຊາດ​ ໃຫ້​ຈະ​ເລີ​ນຮຸ່ງ​ເຮືອງ ​ແລະ ສີວິ​ໄລ.

ທ່ານ ​ເພັດ​ສະ​ໜອນ ພັນທະ​ວົງ ປະທານ​ກວດກາ​ພັກ, ທັງ​ເປັນ​ຫົວໜ້າ​ກົມ​ກົດໝາຍ ຫ້ອງ​ວ່າການ​ປະທານ​ປະ​ເທດ ​ໄດ້​ແຈ້ງ​ໃຫ້​ຮູ້ວ່າ: ດຳລັດວ່າດ້ວຍ ການແຈ້ງຊັບສິນ ໄດ້ກຳນົດຫລັກການ, ລະບຽບການ ແລະ ມາດຕະການ ກ່ຽວກັບການແຈ້ງຊັບສິນ ແລະ ລາຍຮັບຂອງ ພະນັກງານ-ລັດຖະກອນ, ທະຫານ, ຕຳຫລວດ ທີ່ສັງກັດໃນກົງຈັກ ການຈັດຕັ້ງຂອງ ພັກ-ລັດ, ແນວລາວສ້າງຊາດ, ອົງການຈັດຕັ້ງ ມະຫາຊົນ ​ແລະ ອື່ນໆ. ທັງ​ເປັນການແຈ້ງລາຍລະອຽດ ເປັນລາຍລັກອັກສອນຂອງຜົວ ຫລື ເມຍ, ລູກ ແລະ ບຸກຄົນອື່ນ ທີ່ຂຶ້ນກັບການຄຸ້ມຄອງ ໂດຍກົງຂອງຕົນ, ມີການພົວພັນທາງດ້ານ ກຳມະສິດ ຊັບສິນກັບຕົນເອງ ຕາມເອກະສານການແຈ້ງຊັບສິນ ແລະ ລາຍຮັບ ທີ່ອົງການກວດກາ ລັດຖະບານ ໄດ້ກຳນົດໄວ້ນັ້ນ ປະກອບມີທີ່ດິນ, ສິ່ງປຸກສ້າງ, ພາຫະນະ ແລະ ກົນຈັກການຜະລິດຕ່າງໆ, ວັດຖຸມີຄ່າ, ພັນທະບັດ, ເງິນຝາກທະນາຄານ, ເງິນຝາກກອງທຶນ ແລະ ສະຖາບັນການເງິນ ທັງຢູ່ພາຍໃນ ແລະ ຕ່າງປະເທດ, ບັນ ຊີຮຸ້ນ,  ໜີ້ຕ້ອງຮັບ ແລະ ໜີ້ຕ້ອງສົ່ງ​. ສ່ວນມູນຄ່າຊັບສິນ ແລະ ລາຍຮັບທີ່ຕ້ອງແຈ້ງ ແຕ່ລະ​ປະ​ເພດ​ ມີ​ມູນ​ຄ່າ 20 ລ້ານ​ກີບ​ຂຶ້ນ​ໄປ ແລະ ​ປະ​ເພດລາຍຮັບ​ ທີ່​ຕ້ອງ​ແຈ້ງ​ ຄື: ​ເງິນ​ເດືອນ, ​ເງິນ​ອຸດໜູນ, ​ເງິນ​ບຳ​ເນັດ, ລາຍ​ໄດ້​ຈາກ​ການ​ສ້າງ ​ເສດຖະກິດ​ຄອບຄົວ, ການ​ດຳ​ເນີນ​ທຸລະ​ກິດ, ການ​ຂາຍ, ການ​ໃຫ້​ເຊົ່າ, ການ​ໃຫ້​ກູ້​ຢືມ, ດອກ​ເບ້ຍ​ເງິນ​ຝາກ, (ຂອງຂວັນ-​ລາງວັນມູນ​ຄ່າ 5 ລ້ານ​ກີບ​ຂຶ້ນ​ໄປ), ການ​ໃຫ້​ບໍລິການ, ຊັບ​ສິນ​ທາງ​ປັນຍາ ​ແລະ ລາຍ​ຮັບ​ອື່ນໆ.

ຂ່າວ: ວິ​ໄລ​ສັກ ພາບ: ວຽງ​ສະຫວັນ/ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.