Header Ads

ຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນ ແບບບໍ່ເປັນທາງການ ແລະ ກອງປະຊຸມທີ່ກ່ຽວຂ້ອງອື່ນໆ



ໃນຕອນບ່າຍຂອງ ວັນທີ 23 ກັນຍາ 2017 ຜ່ານມານີ້ຢູ່ ສຳນັກງານໃຫ່ຍຂອງອົງການສະຫະປະຊາຊາດ ທີ່ ນິວຢອກ, ສະຫະລັດ ອາເມລິກາ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ຂອງ ສປປ ລາວ ໄດ້ນໍາພາ ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ແບບບໍ່ເປັນທາງການ (Informal ASEAN Foreign Ministers’ Meeting) (IAMM), ໂດຍການເຂົ້າຮ່ວມຂອງບັນດາລັດຖະມົນຕີຕ່າງປະເທດ, ເຈົ້າໜ້າທີ່ອາວຸ ໂສ ແລະ ຄະນະຜູ້ແທນຈາກບັນດາປະເທດອາຊຽນ. ຈຸດປະສົງແມ່ນເພື່ອປຶກສາຫາລືກ່ຽວກັບການກະກຽມໃຫ້ແກ່ກອງປະ ຊຸມສຸດຍອດອາຊຽນ ຄັ້ງທີ 31 ແລະ ບັນດາກອງປະຊຸມສຸດຍອດອື່ນໆທີ່ກ່ຽວຂ້ອງ ຊຶ່ງຈະຈັດຂຶ້ນໃນລະຫວ່າງວັນທີ 12-14 ພະຈິກ 2017 ທີ່ຟີລິບປິນ ແລະ ບັນຫາອື່ນໆ ທີ່ມີຄວາມສົນໃຈຮ່ວມກັນ, ເຊິ່ງໃນໂອກາດນີ້ມຽນມາ ໄດ້ແຈ້ງສະພາບ ການຢູ່ລັດລະໄຂ່ ໃຫ້ເພື່ອນອາຊຽນຊາບ ແລະ ອາຊຽນກໍໄດ້ອອກຖະແຫຼງການປະທານອາຊຽນ ກ່ຽວກັບສະພາບການ ດ້ານມະນຸດສະທໍາ ຢູ່ລັດລະໄຂ່.


ໃນຕອນບ່າຍຂອງວັນດຽວກັນ, ທ່ານ ສະເຫລີມໄຊ ກົມມະສິດ ກໍໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະ ຊຸມລະຫວ່າງ ບັນດາລັດຖະມົນຕີການຕ່າງປະເທດອາຊຽນ ກັບເລຂາທິການໃຫຍ່ອົງການສະຫະປະຊາຊາດ ແລະ ປະທານ ກອງປະຊຸມສະມັດຊາໃຫຍ່ສະຫະປະຊາຊາດ ສະໄໝທີ 72 (ASEAN Foreign Ministers’ Meeting with the United Nations Secretary-General and the President of 72nd Session of the United Nations General Assembly) (AUMM). ກອງປະຊຸມໄດ້ ປຶກສາຫາລື ແລະ ຕີລາຄາຄືນກ່ຽວກັບການຮ່ວມມື ລະຫວ່າງ ອາຊຽນ ແລະ ອົງການສະຫະປະຊາຊາດ ໃນໄລຍະ 1 ປີຜ່ານມາ ໂດຍສະເພາະຄວາມຄືບໜ້າໃນການຈັດຕັ້ງຜັນຂະຫຍາຍ ຜົນຂອງກອງປະຊຸມສຸດຍອດ ອາຊຽນ-ສະຫະປະຊາຊາດ ຄັ້ງທີ 8 ຈັດຂຶ້ນໃນວັນທີ 7 ກັນຍາ 2016 ທີ່ ນະຄອນຫຼວງ ວຽງຈັນ, ສປປ ລາວ, ຕະຫຼອດຮອດການຈັດຕັ້ງປະຕິບັດບັນດາກິດຈະກຳຮ່ວມມືພາຍໃຕ້ແຜນປະຕິບັດງານອາຊຽນ-ສະ ຫະປະຊາຊາດ ໄລຍະປີ 2016-2020 ເພື່ອປະກອບສ່ວນເຂົ້າໃນການຈັດຕັ້ງຜັນຂະຫຍາຍວິໄສທັດອາຊຽນປີ 2025 ແລະ ວາລະການພັດທະນາແບບຍືນຍົງ 2030 ຂອງສະຫະປະຊາຊາດ ແນໃສ່ສົ່ງເສີມສັນຕິພາບ, ສະຖຽນລະພາບ ແລະ ການ ພັດທະນາແບບຍືນຍົງໃນພາກພື້ນກໍຄືໃນໂລກ. ນອກນັ້ນ, ກອງປະຊຸມຍັງໄດ້ແລກປ່ຽນຄຳຄິດເຫັນກ່ຽວກັບບັນຫາຕ່າງໆທີ່ ພວມເກີດຂຶ້ນຢູ່ໃນພາກພື້ນ ແລະ ໃນໂລກ ທີ່ມີຄວາມເປັນຫ່ວງຮ່ວມກັນ.

ນອກຈາກນັ້ນ, ຄະນະຜູ້ແທນລາວ ຍັງໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດ ລະຫວ່າງອາຊຽນ ກັບກຸ່ມພັນທະມິດປາຊີຟິກ (ASEAN-Pacific Alliance) ແລະ ກອງປະຊຸມລັດຖະມົນຕີການຕ່າງປະເທດ ລະຫວ່າງ ອາຊຽນກັບບັນດາປະເທດກຸ່ມຕະຫຼາດຮ່ວມໃນອາເມລິກາໃຕ້ (ASEAN-MERCOSUR) ຊຶ່ງສອງກອງປະຊຸມດັ່ງກ່າວ ໄດ້ປຶກສາຫາລືກ່ຽວກັບທິດທາງໃນການເພີ່ມທະວີການຮ່ວມມືເພື່ອ ສົ່ງເສີມການຮ່ວມມືດ້ານການຄ້າ, ການລົງທຶນ, ການ ທ່ອງທ່ຽວ ແລະ ການໄປມາຫາສູ່ ລະຫວ່າງປະຊາຊົນສອງພາກພື້ນ. ສປປ ລາວ ຈະເປັນປະເທດປະສານງານໃຫ້ແກ່ພົວພັນ ຮ່ວມມືລະຫວ່າງອາຊຽນ ກັບບັນດາປະເທດກຸ່ມຕະຫຼາດຮ່ວມໃນອາເມລິກາໃຕ້ ສໍາລັບປີ 2018.

ທີ່ມາ: ກະຊວງການຕ່າງປະເທດ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.