Header Ads

ຊາວບ້ານ ພາກັນໄປເກັບເອົາປາຕາຍ ຈໍານວນຫຼວງຫຼາຍ ຈາກເຫດ ເຂື່ອນນໍ້າເອົ້າແຕກ! ນັກສິ່ງແວດລ້ອມເປັນຫ່ວງສະພາບຜົນກະທົບ!



ຈາກເຫດການ ເຂື່ອນ ນໍ້າອ້າວ (ເອົ້າ) ແຕກໃນຕອນບ່າຍ ວັນທີ 11 ກັນຍາ 2017 ຜ່ານມາ. ທາງພາກສ່ວນກ່ຽວຂ້ອງ ກໍ່ໄດ້ລົງກວດສອບ ຜົນກະທົບ,  ລາຍງານບອກວ່າ ບໍ່ມີຜູ້ໄດ້ຮັບບາດເຈັບ ຫຼື ເສຍຊີວິດ. ຜົນກະທົບສ່ວນໃຫຍ່ຈະແມ່ນ ສິ່ງປຸກສ້າງຂອງປະຊາຊົນ ແລະ ໄຮ່ນາຮົ້ວສວນ ເຊິ່ງທາງ ບໍລິສັດ ຮັບເໝົາກໍ່ສ້າງ ກໍ່ພ້ອມທີ່ຈະ ໃຫ້ການຊົດເຊີຍ ແລະ ຊ່ວຍເຫຼືອ, ໂດຍການເຮັດວຽກຢ່າງໃກ້ຊິດ ກັບທາງ ໜ່ວຍງານຂອງພາກລັດ.





ເຖິງຢ່າງໃດກໍ່ດີ ບັນຫາທີ່ ຄາດວ່າຈະສົ່ງຜົນກະທົບຕໍ່ແຫຼ່ງສະບຽງອາຫານຂອງປະຊາຊົນ ກໍ່ຄືສະພາບຂອງສາຍນໍ້າ ທີ່ໄດ້ຮັບຜົນກະທົບຢ່າງໜັກ. ພາຍຫຼັງມື້ເຂື່ອນແຕກ ຈຳນວນປາແມ່ນຕາຍຢ່າງຫຼວງຫຼາຍ ທັງປານ້ອຍປາໃໝ່, ແລະ ປາທີ່ໃກ້ຈະສູນພັນໃນເຂດນີ້ ຫຼາຍຊະນິດ ກໍ່ຕາຍ. ນັກສິ່ງແວດລ້ອມ ໄດ້ໃຫ້ທັດສະນະກັບ ຜົນກະທົບໃນຄັ້ງນີ້ ວ່າຮ້າຍແຮງຫຼາຍ ກັບສະພາບແວດລ້ອມ ຂອງແມ່ນໍ້າສາຍນີ້ ແລະ ອາດຈະໃຊ້ເວລາຫຼາຍປີ ກ່ອນຈະກັບຄືນມາດັ່ງເກົ່າ. ໂດຍສະເພາະ ແມ່ນຊະນິດພັນປາ ທີ່ຕາຍໄປຫຼາຍຈາກ ສະພາບນໍ້າຂຸ່ນ ເຮັດໃຫ້ປາຫາຍໃຈບໍ່ໄດ້ ຫຼື ກິນເອົາຂີດິນ ຂີ້ຫີນ ຊາກໄມ້ຕ່າງໆ.



ດ້ວຍເຫດນີ້ ຈິ່ງຢາກຮຽກຮ້ອງໃຫ້ໜ່ວຍງານສິ່ງແວດລ້ອມ ແລະ ຄຸ້ມຄອງນໍ້າ ໄດ້ໃຫ້ການກວດສອບ ຢ່າງຈິງຈັງ ແລະ ຫາທາງ ເພື່ອຟື້ນຟູ ສະພາບແວດລ້ອມ ໃຫ້ດີຂຶ້ນມາ. ທາງບໍລິສັດ ທີ່ສ້າງເຂື່ອນ ກໍ່ຕ້ອງ ໄດ້ຊ່ວຍໃນການແກ້ໄຂບັນຫານີ້ ຢ່າງຈິງຈັງ ເພາະແມ່ນໍ້າສາຍນີ້ ແມ່ນຫຼໍ່ລ້ຽງ ຊີວິດ ປະຊາຊົນ ຫຼາຍໝູ່ບ້ານ.










ຂ່າວກ່ອນໜ້ານີ້:




ຈາກການໃຫ້ຂໍ້ມູນຈາກເຈົ້າໜ້າທີ່ທ້ອງຖິ່ນ ເມືອງທ່າໂທມ ໃຫ້ຮູ້ວ່າ ເກີດເຫດເຂື່ອນແຕກແທ້ ໃນຕອນສວາຍ ວັນທີ 11 ກັນຍາ 2017 ເປັນເຂື່ອນນ້ອຍທີ່ກຳລັງກໍ່ສ້າງຢູ່ເທິງເໜືອ ເຂື່ອນນ້ຳງຽບ 2 ຊື່ວ່າ ເຂື່ອນນ້ຳເອົ້າ. 



ເຈົ້າໜ້າທີ່ກ່ຽວຂ້ອງແມ່ນກໍາລັງເລັ່ງກວດຫາເຫດທີ່ແຕກ. ສ່ວນຜົນກະທົບທີ່ມີຕໍ່ ປະຊາຊົນ ແລະ ພື້ນທີ່ທີ່ກະແສນໍ້າພັດໄປນັ້ນເຫັນວ່າເສຍຫາຍ ຫຼາຍສົມຄວນ,​ ຈະຕ້ອງໄດ້ໃຊ້ເວລາໃນການສໍາຫຼວດ. ປະຈຸບັນ ບໍ່ທັນມີລາຍງານ ຜູ້ບາດເຈັບ ຫຼື ເສຍຊີວິດ.














ລາຍງານຈາກປະຊາຊົນໃຫ້ຮູ້ວ່າ ໃນຕອນບ່າຍ ເວລາປະມານ 14:00 ວັນທີ 11 ກັນຍາ 2017 ເກີດມີເຫດການນໍ້າໄຫຼ່ແຮງ ມາທີ່ເຂດ ທ່າວຽງ ເມື່ອງທ່າໂທມ ແຂວງໄຊສົມບູນ .

ຂໍ້ມູນເບື້ອງຕົ້ນ ແມ່ນຄາດວ່າແມ່ນເກີດຈາກ ເຂື່ອນແຕກ, ແຕ່ຍັງບໍ່ໄດ້ຮັບຄຳຢືນຢັນ ເຖິງສາເຫດ, ແຕ່ນໍ້າຈຳນວນມວນມະຫາສານ ແມ່ນໄຫຼມາບາດດຽວ. ຜົນກະທົບ ແລະ ຄວາມເສຍຫາຍ ຍັງບໍ່ທັນຊາບ.

ກົດຊົມຄລິບຂ້າງລຸ່ມ







------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com





No comments

Powered by Blogger.