Header Ads

ເອົາພື້ນທີ່ສາທາລະນະ ມາເກງກຳໄລໃນຍາມບຸນ! ບັນຫານີ້ ພາກສ່ວນກ່ຽວຂ້ອງຈະແກ້ໄຂແນວໃດ?



ສະບາຍດີໂທລະໂຄ່ງ,

ນີ້ແມ່ນແຟນເພຈໂທລະໂຄ່ງ, ຂໍນຳເອົາບັນຫານີ້ມາລົມແລກປ່ຽນ ແລະ ສະທ້ອນບັນຫາ ຫາ ພາກສ່ວນກ່ຽວຂ້ອງແດ່.

ເອົາລະນໍ້! ບໍ່ເວົ້າກະເປັນຕາເວົ້າ ເພາະບັນຫານີ້ ຈະເກີດຂຶ້ນຕະຫຼອດ ບໍ່ວ່າຈະເປັນ ບຸນຊ່ວງເຮືອອອກພັນສາ, ຫຼື ບຸນທາດຫຼວງ ຫຼື ອື່ນໆ. ສະຖານທີ່ແຄມທາງ ກາຍເປັນ ຕະຫຼາດອະສັງຫາລິມະຊັບ ທີ່ດຸເດືອດ ຂອງບັນດາພໍ່ຄ້າ ແລະ ນັກທຸລະກິດ ທີ່ຫົວໃສ ໂດຍບໍ່ໄດ້ຄຳນຶງເຖິງຜົນກະທົບທີ່ຕາມມາ. ນອກນີ້, ພາກສ່ວນທີ່ຄຸ້ມຄອງ ຈັດສັນສະຖານທີ່ກະເຮັດທຳທ່າ ຕາກາຍ ຫຼື ບໍຮັບຮູ້ ວ່າບັນຫານີ້ ມັນເກີດຂຶ້ນ.


ຕົວຢ່າງງ່າຍໆ ຫຼ້າສຸດ ທີ່ໃກ້ຈະຮອດ ບຸນຊ່ວງເຮືອອອກພັນສາ ກໍ່ມີການເອົາພື້ນທີ່ ສາທາລະນະ ອອກມາປະກາດຂາຍ ທາງອ່ອນລາຍ, (ຫຼາຍກໍ່ລະນີ ກໍ່ແມ່ນ ອອບລາຍ) ແລ້ວ ເປັນລາຄາທີ່ສູງຫຼາຍ.


ຈາກບັນຫານີ້ ຈິ່ງມີຫຼາຍຄົນຝາກມີຄຳເຫັນວ່າ ນີ້ຄືສາເຫດ ທີ່ເຮັດໃຫ້ ອາຫານການກິນ ແລະ ເຄື່ອງຂອງທີ່ຂາຍ ໃນຍາມບຸນ ແພງ. ຟັງແຕ່ວ່າ ເຂົ້າປຽກ ຖ້ວຍ 30​000 -50​000 ກີບ. ກໍ່ຕັກຫງາຍແລ້ວ. ເລີຍຢາກຝາກຖາມບັນຫານີ້ ເຖິງພາກສ່ວນທີ່ຮັບຜິດຊອບ ຈັດສັນພື້ນທີ່ເພື່ອ ຈັດຕະຫຼາດນັດ ແລະ ໃຫ້ຄົນມາຂາຍເຄື່ອງໃນຍາມບຸນວ່າ ຈະມີວິທີການແນວໃດ ໃຫ້ຄ່າເຊົ່າ ສົມເຫດສົມຜົນ ແລະ ບໍ່ຖືກເອົາປຽບຈາກ ນາຍໜ້າ ທີ່ໄປຊື້ພື້ນທີ່ໄວ້ ແລ້ວຂາຍຕໍ່ໃນລາຄາໜ້າເລືອດ. 

ເພາະສິ່ງເຫຼົ່ານີ້ມັນໄດ້ສົ່ງຜົນກະທົບ ແກ່ຊາວຄ້າຂາຍ ທີ່ຕ້ອງທົນເຊົ່າພື້ນທີ່ໃນລາຄາແພງ ທັງໆທີ່ມັນເປັນພື້ນທີ່ສາທາລະນະ. ທີ່ຄົນຈະໃຫ້ຄົນລາວໄດ້ທຳມາຫາກິນ ແບບໃຜທັນໄປກ່ອນ ແລະ ຂຽນຄຳຮ້ອງຂໍກໍ່ໃຫ້ໄດ້ກ່ອນ. 


ຢາກໃຫ້ມື້ງານບຸນ ເປັນມື້ທີ່ ປະຊາຊົນ (ທັງຜູ້ຮັງມີ ແລະ ທຸກຍາກ) ໄດ້ມີໂອກາດໄປທ່ຽວໄປຊົມ, ມີເງິນໜ້ອຍ ກໍ່ພໍຈະໄດ້ຊື້ອາຫານການກິນທີ່ບໍ່ແພງເກີນໄປ.

ກໍ່ຂໍຝາກແທ້ໆ ໃຫ້ພາກສ່ວນກ່ຽວຂ້ອງໄດ້ມີມາດຕະການທີ່ເດັດຂາດ, ຊັດເຈນ ແລະ ເຫັນແກ່ ປະຊາຊົນແດ່. 

ນອກຈາກຄ່າເຊົ່າພື້ນທີ່ຂາຍເຄື່ອງແລ້ວ, ກໍ່ແມ່ນເລື່ອງຄ່າຝາກລົດທີ່ ອອກລະບຽບມາທຸກປີ ແຕ່ສຸດທ້າຍ ເຮັດຫຍັງບໍ່ໄດ້. ແບບວ່າອອກລະບຽບມາລ້າໆ ບໍ່ມີສາມາດຄຸ້ມຄອງໄດ້ ຈົນເຮັດໃຫ້ປະຊາຊົນ ຈຳຕ້ອງກົ້ມໜ້າ ຈ່າຍຄ່າຝາກລົດ ເກີນ ທີ່ກຳນົດໄວ້.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




loading...

No comments

Powered by Blogger.