Header Ads

ພະແນກສຶກສາທິການ ແລະ ກິລາແຂວງຫຼວງພະບາງ ໄຂສົກຮຽນໃໝ່ 2017-2018



ຕອນເຊົ້າວັນທີ່ 1 ກັນຍາ 2017 ຜ່ານມາ ທີ່ພະແນກສຶກສາທິການ ແລະ ກິລາແຂວງຫຼວງພະບາງ ໄດ້ຈັດພິທີໄຂສົກຮຽນໃໝ່ 2017-2018 ໂດຍການເຂົ້າຮ່ວມຂອງທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງຜູ້ຊື້ນໍາວຽກງານວັດທະນະທໍາ-ສັງຄົມ,ມີຮອງຫົວໜ້າພະແນກສຶກສາທິການ ແລະ ກິລາແຂວງ, ຮອງເຈົ້າເມືອງ,ບັນດາໂຮງຮຽນອ້ອມຂ້າງແຂວງ ແລະ ຂະແໜງການກ່ຽວຂ້ອງພ້ອມດ້ວຍຄູ-ອາຈານ ແລະ ນັກຮຽນເຂົ້າຮ່ວມຢ່າງພ້ອມພຽງ.



ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການ ແລະ ກິລາ ໄດ້ລາຍງານຜົນການຮຽນ-ການສອນໃນປີຜ່ານມາ ທົ່ວແຂວງຫຼວງພະບາງມີໂຮງຮຽນທັງໝົດ 978 ແຫ່ງ,ໃນນັ້ນມັດທະຍົມຕອນປາຍ 47 ແຫ່ງ,ມັດທະຍົມຕົ້ນ 57 ແຫ່ງ ແລະ ປະຖົມ 717 ແຫ່ງ,ໃນນີ້ປະຖົມສົມບູນ 625 ແຫ່ງ,ມູນລະປະຖົມ 92 ແຫ່ງ.ອານຸບານ 151 ແຫ່ງ,ຫ້ອງລ້ຽງເດັກ 71 ຫ້ອງ ແລະ ຫ້ອງກຽມ.ໃນສົກ 2016-2017 ຜ່ານມາທົ່ວແຂວງມີນັກຮຽນທັງໝົດ 127.726 ຄົນ,ຍິງ 59.680 ຄົນ.ພະນັກງານຄູທັງໝົດ 5.784 ຄົນ,ຍິງ 2.894 ຄົນ,ມີອັດຕາເຂົ້າຮຽນ 3-5 ປີ 59,33%,ອັດຕາລອດເຫຼືອ ປ.5 84,33%,ດັດສະນີຄວາມສະເໝີພາບ ຍິງ-ຊາຍຊັ້ນປະຖົມ 0,98%,ອັດຕາເຂົ້າຮຽນ ມ.ຕົ້ນ 90,70%,ມ.ປາຍ 50,20% ແລະອັດຕາເຂົ້າຮຽນສຸດທິຊັ້ນປະຖົມ 99,2%,ໄດ້ສົ່ງນັກຮຽນເກັ່ງເຂົ້າສອບເສັງລະດັບຊາດ ສາມາດຍາດໄດ້ຄື: ມ.ຕົ້ນ ໄດ້ທີ 3 ແມ່ນວິຊາຟີຊິກສາດ ແລະ ມ.ປາຍໄດ້ທີ 1 ແມ່ນວິຊາຄະນິດສາດ ແລະ ເຄມີສາດ.ໄດ້ຈັດຕັ້ງການຮຽນການສອນວິຊາ ປກສ-ປກຊ ຮ່ວມກັບພາກສ່ວນກ່ຽວຂ້ອງມີນັກຮຽນເຂົ້າຮ່ວມທັງໝົດ 15.514 ຄົນ,ຍິງ 7.018 ຄົນ,ມີມະຫາວິທະຍາໄລ 1 ແຫ່ງ,ວິທະຍາໄລ 11 ແຫ່ງ,ອາຈານສອນ 998 ຄົນ,ຍິງ 347 ຄົນ,ມີນັກຮຽນທັງໝົດ 10.828 ຄົນ,ຍິງ 5.028 ຄົນ,ໄດ້ສົ່ງນັກຮຽນໄປຮຽນຕໍ່ໃນຕ່າງປະເທດ 134 ຄົນ,ຍິງ 55 ຄົນ,ພາຍໃນປະເທດ 116 ຄົນ,ທີ່ສໍາຄັນແມ່ນສາມາດປະກາດຂື້ນປ້າຍໂຮງຮຽນປອດຢາເສບຕິດໄດ້ 101 ແຫ່ງ ແລະ ຮັບຮອງໂຮງຮຽນປອດຢາເສບຕິດໄດ້ 5 ສົກຕິດຕໍ່ກັນມີ 19 ແຫ່ງ, 4 ສົກຮຽນ 16 ແຫ່ງ,3ສົກຮຽນ 19 ແຫ່ງ,2ສົກຮຽນ 10 ແຫ່ງ ແລະ ເປົ້າໝາຍສ້າງໂຮງຮຽນປອດຢາເສບຕິດ 123 ແຫ່ງ.ສໍາລັບຜົນການຈັດຕັ້ງການຮຽນ-ການສອນລະບົບບໍາລຸງ,ຊັ້ນມັດທະຍົມຕົ້ນມີນັກຮຽນທັງໝົດ 2.385 ຄົນ,ຍິງ 1.345 ຄົນ ເສັງໄດ້ 99,03%,ຊັ້ນ ມ. ປາຍ 259 ຄົນ,ຍິງ 48 ຄົນ ເສັງໄດ້ 100%,ພ້ອມນີ້ໄດ້ຈັດຊຸດອົບຮົມຄູສອນພາສາອັງກິດປະຖົມແຕ່ ປ.3-ປ.5 ມີ 26 ຄົນ,ຍິງ 11 ຄົນ,ສາມາດປະກາດຈົບຊັ້ນມັດທະຍົມຕົ້ນບໍາລຸງໄດ້ 1 ເມືອງຄື: ເມືອງໂພນໄຊ ໃນປີຜ່ານມາ,ປະຈຸບັນສາມາດປະກາດໄດ້ແລ້ວ 6 ເມືອງ ແລະ ຄາດໝາຍຈະໄດ້ປະກາດຈົບຊັ້ນມັດທະຍົມຕົ້ນບໍາລຸງໃນທົ່ວແຂວງໃຫ້ໄດ້ 2019.ສໍາລັບວຽກງານກິລາ-ກາຍຍະກໍາ ແລະ ສິລະປະ ໄດ້ຈັດການແຂ່ງຂັນ ເປັນປົກກະຕິ ເປັນຕົ້ນແມ່ນໄດ້ຈັດການແຂ່ງຂັນກິລາບານເຕະຟຸດຊໍຊາຍ,ເປັນເຈົ້າພາບແຂ່ງຂັນບານເຕະອາວຸໂສ ລຸ່ມແມ່ນໍ້າຂອງລາວ,ໄທ ແລະ ຫວຽດນາມ ແລະ ກິລາເຂດ1,2 ແລະ ເຂດ 3.ເຊິ່ງແຕ່ລະເຂດມີ 4 ເມືອງ,ໄດ້ເຂົ້າຮ່ວມກິລານັກຮຽນທົ່ວປະເທດຄັ້ງທີ 7 ທີ່ແຂວງບໍລິຄໍາໄຊເປັນເຈົ້າພາບ,ສາມາດຍາດໄດ້ 9 ຫຼຽນຄໍາ,6 ຫຼຽນເງິນ ແລະ 20 ຫຼຽນທອງ,ຈັດເປັນທີ 7 ໃນທົ່ວປະເທດ,ຈັດການແຂ່ງຂັນສິລະປະ-ວັນນະຄະດີສະໂມສອນ ປະກອບມີ 16 ລາຍການ ແລະ ບົດຮ້ອງ 16 ລາຍການ.




ທ່ານຍັງໃຫ້ຮູ້ອີກຕື່ມວ່າ: ເພື່ອເປັນການກະກຽມໃຫ້ແກ່ການໄຂສົກຮຽນໃໝ່ນີ້ ທາງພະແນກສຶກສາທິການ ແລະ ກິລາແຂວງ ໄດ້ສໍາເລັດກອງປະຊຸມຜູ້ບໍລິຫານການສຶກສາ ແລະ ກິລາໃນຂັ້ນຂອງຕົນ,ສໍາເລັດບັ້ນດໍາເນີນຊີວິດການເມືອງປັບປຸງປົວແປງພັກ,ນອກຈາກນັ້ນໄດ້ຈັດຊຸດອົບຮົມພາສາອັງກິດໃຫ້ແກ່ຄູຊັ້ນປະຖົມ ແລະ ສອບເສັງຄັດເລືອກເອົານັກຮຽນໄປຮຽນຕໍ່ທັງພາຍໃນ ແລະ ຕ່າງປະເທດ,ນອກນັ້ນກໍ່ໄດ້ແຈ້ງການ ແລະ ປຸກລະດົມບັນດາໂຮງຮຽນໃນທົ່ວແຂວງ ແລະ ອໍານາດການປົກຄອງທ້ອງຖິ່ນ ສ້ອມແປງໂຮງຮຽນ,ໂຕະ,ຕັ່ງ ແລະ ອື່ນໆເພື່ອກະກຽມຄວາມພ້ອມການຮອງຮັບນັກຮຽນໃນສົກໃໝ່ໃຫ້ທ່ວງທັນເວລາ.ຈາກນັ້ນທ່ານ ວົງສະຫັວນ ເທບພະຈັນ ຮອງເຈົ້າແຂວງ ໄດ້ມີຄໍາເຫັນໂອ້ລົມ ເຊິ່ງມີບາງຕອນທ່ານ ໄດ້ຮຽກຮ້ອງໃຫ້ນ້ອງນັກຮຽນຈົ່ງຕັ້ງໃຈເຂົ້າໃນການສຶກສາໃນສົກໃໝ່ ເພື່ອຮັບເອົາບົດຮຽນຮູ້,ຮັບເອົາຄວາມຮູ້ຄວາມສາມາດຈາກຄູ-ອາຈານ,ຈົ່ງຝຶກຝົນຫຼໍ່ຫຼອມຕົນເອງໃຫ້ກາຍເປັນຄົນດີ,ເປັນລູກທີ່ດີ,ເປັນນັກຮຽນເກັ່ງ ເພື່ອຈະໄດ້ເຂົ້າຮຽນລະດັບວິຊາຊີບໃດໜຶ່ງ ແລະ ພ້ອມຈົບອອກມາຮັບໃຊ້ປະເທດຊາດ-ສັງຄົມໃນອານາຄົດ. ຈາກນັ້ນຜູ້ເຂົ້າຮ່ວມພິທີໄດ້ຮ່ວມກັນປ່ອຍປ້າຍໝາກເບັງຂື້ນສູ່ທ້ອງຟ້າ ເພື່ອເປັນການໄຂສົກຮຽນໃໝ່ 2017-2018 ຢ່າງເປັນທາງການ.






ຂ່າວ: ເພັດສາຄອນ ສິມມະວົງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.