Header Ads

ຈຳນວນ 4 ບ້ານ ຂອງ​ເມືອງ​ວຽງຄຳ​ ​ແຂວງ​ຫຼວງ​ພະ​ບາງໄດ້​ຖຶກຮັບຮອງ​ເປັນ​ບ້ານ​ສາມັກຄີ​ປອງ​ດອງ​ຂອງ​ແນວ​ລາວ​ສ້າງ​ຊາດ



ໃນ​ຕອນ​​ເຊົ້າ​ຂອງ​ວັນ​ທີ 5 ກັນຍາ (9) 2017 ຜ່ານມານີ້ ທີ່ສະໂມສອນເມືອງວຽງ​ຄຳ ​ໄດ້​ຈັດພິທີມອບ - ຮັບໃບຢັ້ງຢືນບ້ານ​ສາມັກຄີ ແລະ ຄອບຄົວສາມັກຄີຂຶ້ນ ​ໂດຍ​ພາຍ​ໃຕ້​ການ​ເປັນ​ປະທານ​ຂອງ​ ທ່ານ ວັນ​ໂຈ​ຍ ວາຊົວລີ ປະທານແນວລາວສ້າງຊາດເມືອງວຽງ​ຄຳ, ​ເປັນ​ກຽດ​ເຂົ້າ​ຮ່ວມ​ພິທີ​​ໂດຍ ທ່ານ​ ນາງ ບຸນ​ມາ ຖາວອນ​ສັກ ຮອງປະທານ​ແນວ​ລາວ​ສ້າງ​ຊາດ​ແຂວງຫຼວງພະບາງ,ມີທ່ານ ຊາຍ​ພອນ ຈັນ​ທຸມມາ ຮອງ​ເລຂາພັກເມືອວ ຮອງເຈົ້າ​ເມືອງ​ວຽງ​ຄຳ ມີ​ບັນດາ​ຫົວໜ້າ​ຫ້ອງການ, ຮອງ​ຫ້ອງການ​ຂອງ​ເມືອງ, ​ບັນດາ​ອົງການຈັດ​ຕັ້ງ​ຂອງ​ 4 ບ້ານເຂົ້າຮ່ວມເຊັ່ນ: ບ້ານວຽງ​ຄຳ, ບ້ານ ​ແສ້, ບ້ານວັງ​ເຫິງ ​ແລະ ບ້ານ​ວັງ​ໄບ, ພ້ອມ​ດ້ວຍ​ຫົວໜ້າ​ໜ່ວຍ​ແຕ່ລະ​ບ້ານເຂົ້າ​ຮ່ວມຈຳນວນທັງ​ໝົດ 64 ຍິງ 15 ທ່ານ.



​​ໃນ​ພິທີ​ທ່ານ ນາງ ​ແສງ​ຈັນ ສຸວັນ​ເພັງ ຮອງ​ປະທານ​ແນວ​ລາວ​ສ້າງ​ຊາ​ດ​ເມືອງ​ວຽງ​ຄຳ ໄດ້ກ່າວຈຸດປະສົງໃນພິທີມອບ-ຮັບໃບຢັ້ງຢືນ​ບ້ານ​ສາມັກຄີ ແລະ ຄອບຄົວສາມັກຄີໃນຄັ້ງນີ້. ຈາກ​ນັ້ນ, ທ່ານ ວັນ​ໂຈ​ຍ ວາລີຊົວ ປະທານແນວລາວສ້າງຊາດເມືອງວຽງ​ຄຳ ​ໄດ້​ຜ່ານ​ບົດ​ສະຫຼຸບ​ການ​ສ້າງ​ຄອບຄົວ ​ແລະ ບ້ານ​ສາມັກຄີ ທັງ 4 ບ້ານ. ພ້ອມນັ້ນ, ທ່ານ ຄຳ​ຜູ ​ແກ້ວ​ພົມມາ ຮອງ​ປະທານ​ແນວ​ລາວ​ສ້າງ​ຊາ​ດ​ເມືອງ​ວຽງ​ຄໍາ ໄດ້ຂື້ນຜ່ານ​ຂໍ້​ຕົກລົງ​ຂອງ​ທ່ານເຈົ້າ​​ເມືອງ​ໆວຽງຄຳ​ວ່າ​ດ້ວຍ​ການຮັບຮອງ​ເອົາ​ຄອບຄົວ​ສາມັກ​ຄີປອງ​ດອງ ​ແລະ ຜ່ານ​ຂໍ້​ຕົກລົງ​ຂອງ​ທ່ານ​ເຈົ້າ​ແຂວງ​ຫຼວງ​ພະ​ບາງ​ວ່າ​ດ້ວຍ​ການ​ຮັບຮອງ​ເອົາ​ບ້ານ​ສາມັກຄີ​ປອງ​ດອງ​ຂອງ​ແນວ​ລາວ​ສ້າງ​ຊາດ ຈຳນວນ 4 ບ້ານ​ ເຊັ່ນ : ບ້ານວຽງ​ຄຳ, ບ້ານ ​ແສ້, ບ້ານວັງ​ເຫິງ, ບ້ານ​ວັງ​ໄບ. ຄອບຄົວທີ່ໄດ້ຮັບຮອງເປັນຄອບຄົວສາມັກຄີໃນຄັ້ງນີ້ມີຈຳນວນທັງໝົດ 483 ຄອບຄົວ. ຈາກນັ້ນ, ຫົວໜ້າໜ່ວຍແຕ່ລະໜ່ວຍ​ທັງ 4 ບ້ານ ທີ່​ຕາງໜ້າ​ໃຫ້​ແກ່​ແຕ່​ລະ​ຄອບຄົວ ໄດ້ຂື້ນຮັບໃບຢັ້ງຢືນຄອບຄົວສາມັກຄີ ​ໃຫ້ກຽດມອບໂດຍ ທ່ານ ຊາຍພອນ ຈັນທຸມມາ ຮອງເຈົ້າເມືອງໆວຽງຄຳ ແລະ ນາຍບ້ານ 4 ບ້ານໄດ້ຂື້ນຮັບໃບຢັ້ງຢືນບ້ານສາມັກຄີ ເປັນກຽດມອບໂດຍທ່ານ ນາງ ບຸນມາຖາວອນສັກ ຮອງປະທານແນວລາວສ້າງຊາດແຂວງ. ພ້ອມນັ້ນ ຍັງໄດ້ມອບໃບຍ້ອງຍໍໃຫ້ແກ່ບຸກຄົນດີເດັ່ນທີ່ປະກອບສ່ວນໃນຂະບວນການສ້າງຄອບຄົວ ແລະ ບ້ານສາມັກຄີ ຈຳນວນ 76 ທ່ານ ຍິງ 21 ທ່ານ ໃຫ້ກຽດມອບໂດຍ ທ່ານທອງຄຳ ພົມມະສິດ ກຳມະການສູນກາງແນວລາວສ້າງຊາດປະຈຳແຂວງຫຼວງພະບາງ.



ໃນ​ພິທີ​ໄດ້​ຮັບຟັງ​ການ​ໂອ້ລົມ​ຈາກ​ ທ່ານນາງ ບຸນ​ມາ ຖາວອນ​ສັກ ຮອງປະທານແນວລາວສ້າງຊາດແຂວງ ​ເຊິ່ງ​ທ່ານ ​ໄດ້​ສະ​ແດງ​ຄວາມ​ຍ້ອງຍໍຊົມເຊີຍຕໍ່ຜົນງານທັງ 4 ບ້ານຍາດມາໄດ້ໃນປີຜ່ານມາ, ທ່ານກ່າວວ່າ ​ພິທີມອບ - ຮັບໃບຢັ້ງຢືນ​ບ້ານ​ສາມັກຄີ , ຄອບຄົວສາມັກຄີ ຢູ່ເມືອງວຽງ​ຄໍາໃນ​ຄັ້ງ​ນີ້​ເປັນ​ຄັ້ງ​ທຳ​ອິດ ​ແລະ ເປັນພິທີ່ມີຄວາມໝາຍຄວາມສໍາຄັນ ເປັນແຜນຍຸດທະສາດທີ່ຍາວນານຂອງເຮົາ ແລະ ທ່ານ​ໄດ້ຮຽກຮ້ອງ 3 ບັນຫາ​​ເຊັ່ນ : ໜຶ່ງ: ຮຽກຮ້ອງ​ໃຫ້ຄະນະກໍາມະການຮັບຜິດຊອບຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ຢູ່ຂັ້ນຮາກຖານບ້ານການເຮັດວຽກຕ້ອງມີແຜນການ, ພ້ອມທັງມີການແບ່ງວຽກໃຫ້ກັນຮັບຜິດຊອບຢ່າງລະອຽດ, ມີການຕິດຕາມກວດກາ, ມີການສະຫຼຸບ ຖອດຖອນບົດຮຽນແຕ່ລະຂັ້ນຕອນ,ລາຍງານ ແລະ ຂໍທິດຊີ້ນໍາຈາກຂັ້ນເທິງເປັນແຕ່ລະໄລຍະ.


- ສອງ: ອົງການແນວລາວສ້າງຊາດຕ້ອງເປັນເຈົ້າການໃນການປະສານງານກັບບັນດາອົງການຈັດຕັ້ງພັກ - ລັດ ແລະ ອົງການຈັດຕັ້ງມະຫາຊົນຂັ້ນຂອງຕົນ ເພື່ອຄົ້ນຄ້ວາປຶກສາຫາລື ມີຄວາມເປັນເອກະພາບ ແລະ ສະເໜີຕໍ່ອົງການຈັດຕັ້ງທີ່ກ່ຽວຂ້ອງ ເພື່ອເປັນບ່ອນອີງອັນຈະແຈ້ງໃນການຈັດຕັ້ງປະຕິບັດຂະບວນການສ້າງຄອບຄົວ, ບ້ານສາມັກຄີປອງດອງຂອງແນວລາວສ້າງຊາດ ແລະ ພ້ອມກັນກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຈັດຕັ້ງປະຕິບັດໃຫ້ຖືກຕາມບັນດານິຕິກໍາກ່ຽວກັບການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ.
- ສາມ: ຮຽກຮ້ອງບັນດາຜູ້ແທນກອງປະຊຸມຈົ່ງສືບຕໍ່ຮັກສາມູນເຊື້ອຂອງຄອບຄົວ - ບ້ານສາມັກຄີໃນປີຕໍ່ໆໄປໃຫ້ກາຍເປັນຄອບຄົວສາມັກຄີ, ບ້ານສາມັກຄີ, ເມືອງສາມັກຄີໃນຕໍ່ໜ້າ.




​​ໂດຍ : ຊ.ສະຫວັດ/ອົງການແນວລາວສ້າງຊາດຫຼວງພະບາງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.