Header Ads

ແຈ້ງການ ເຖິງສະມາຊິກ ບໍລິສັດ ພີເອັສ PS ທີ່ເສຍຜົນປະໂຫຍດ ໃຫ້ເຂົ້າໄປແຈ້ງຕໍ່ເຈົ້າໜ້າທີ່ດ່ວນ!



ກະຊວງປ້ອງກັນສະຫງົບກົມໃຫຍ່ຕໍາຫຼວດ
ແຈ້ງການເລກທີ 43/ຕຫຼ, ວັນທີ 21 ກັນຍາ 2017
ເຖິງ: ພໍ່ແມ່ປະຊາຊົນ, ຊາວຄ້າຂາຍ,​ພະນັກງານ, ທະຫານ, ຕໍາຫຼວດ,​ ຄູບາ, ອາຈານ ທີ່ໄດ້ ເອົາເງິນໃຫ້ບໍລິສັດ ພີເອັສ ສົ່ງເສີມ ກະສິກໍາ ຂາອອກ-ຂາເຂົ້າ ຈຳກັດຜູ່ດຽວ, ໃນຂອບເຂດທົ່ວປະເທດ
ເລື່ອງ: ໃຫ້ເຂົ້າໄປແຈ້ງຄວາມ ຫຼື ລາຍງານຜົນເສຍຫາຍຂອງຕົນ ກັບເຈົ້າໜ້າທີ່ຕໍາຫຼວດ

ອີງຕາມ: ກົດໝາຍວ່າດ້ວຍການດຳເນີນຄະດີອາຍາ ແຫ່ງ ສປປລາວ ແລະ ກົດໝາຍອາຍາ ມາດຕາ 20
ອີງຕາມ: ຂໍ້ຕົກລົງຂອງຄະນະສະເພາະກິດ ດຳເນີນການສອບສວນ-ສືບສວນ ແລະ ຮັກສາຄວາມສະຫງົບ ບໍລິສັດ ພີເອັສ, ຂອງທ່ານຮອງ ລັດຖະມົນຕີ ກະຊວງປ້ອງກັນຄວາມສະຫງົບ, ຮອງຫົວໜ້າຄະນະຄົ້ນຄວ້າແກ້ໄຂບັນຫາ ບໍລິສັດ ພີເອັສ ເລກທີ 1739/ປກສ ລົງວັນທີ 19 ກັນຍາ 2017
ອີງຕາມ: ຄໍາສັ່ງ ເປີດການສອບສວນ-ສອບສວນ ຕໍ່ບໍລິສັດ ພີເອັສ ຂອງຕໍາຫຼວດເສດຖະກິດ ເລກທີ 180, 181, 182, 183, 183, 184, 185, 186, 187, 188, 189/302 ລົງວັນທີ 12/9/2017
ອີງຕາມ: ສະພາບຄວາມເປັນຈິງ ຂອງການດຳເນີນການ ສອບສວນ-ສືບສວນ ເອົາຄໍາໃຫ້ການ ຂອງຜູ້ຖືກເສຍຫາຍ ຕາມກົດໝາຍ

ຜ່ານການ ສືບສວນ-ສອບສວນ, ເກັບຂໍ້ມູນຫຼັກຖານ ແລະ ໄດ້ເອົາຄໍາໃຫ້ການຂອງ ຜູ່ເສຍຫາຍຈໍານວນໜື່ງ, ແຕ່ຍ້ອນວ່າມີຜູ້ເສຍຫາຍ ຈຳນວນຫຼາຍໃນຂອບເຂດທົ່ວປະເທດ ຍັງບໍ່ທັນໄດ້ເຂົ້າໄປລາຍງານ ແລະ ແຈ້ງຄວາມນໍາເຈົ້າໜ້າທີ່ຕຳຫຼວດ. ເພື່ອປົກປ້ອງຜົນປະໂຫຍດ ຂອງຜູ່ຖືກເສຍຫາຍ ແລະ ເພື່ອຮັບປະກັນການດຳເນີນຄະດີໃຫ້ຖືກຕ້ອງຕາມກົດໝາຍ ຮອງຫົວໜ້າກົມໃຫຍ່ຕຳຫຼວດ ຫົວໜ້າຄະນະສະເພາະກິດການດຳເນີນຄະດີຕໍ່ກັບບໍລິສັດ ພີເອັສ ຈິ່ງອອກແຈ້ງການດັ່ງນີ້:

1. ໃຫ້ຜູ່ຖືກເສຍຫາຍທີ່ໄດ້ຂຽນຄຳຮ້ອງຟ້ອງ ຕໍ່ບໍລິສັດພີເອັສແລ້ວ ແຕ່ຍັງບໍ່ທັນໄປລາຍງານ (ໃຫ້ປາກຄຳ) ກັບເຈົ້າໜ້າທີ່ຕຳຫຼວດ ຢູ່ກົມຕຳຫຼວດເສດຖະກິດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ແມ່ນໃຫ້ຮີບຮ້ອນເອົາເອກະສານ ຫຼັກຖານທັງໝົດເຂົາໄປພົບເຈົ້າໜ້າທີ່ສອບສວນດ່ວນເພື່ອຈະທ້ອນໂຮມ ແລະ ບັນທຶກເອົາຄຳໃຫ້ການປະກອບໃສ່ສຳນວນຄະດີໃຫ້ທັນເວລາ

2. ໃຫ້ຜູ່ຖືກເສຍຫາຍທີ່ຍັງບໍ່ໄດ້ຂຽນຄຳຮ້ອງຟ້ອງ ຫຼື ແຈ້ງຄວາມຜິດ ຕໍ່ບໍລິສັດພີເອັສ ໃຫ້ຮີບຮ້ອນຂຽນຄຳຮ້ອງ ຫຼື ເຂົ້າແຈ້ງຄວາມພ້ອມດ້ວຍເອກະສານຫຼັກຖານໂດຍກົງກັບຄະນະສະເພາະກິດດຳເນີນຄະດີ ຕໍ່ບໍລິສັດ ພີເອັສ ຢູ່ກົມຕຳຫຼວດເສດຖະກິດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ

ກໍລະນີຜູ້ເສຍຫາຍ ຢູ່ຕ່າງເມືອງຕ່າງແຂວງ ກໍ່ສາມາດຂຽນຄຳຮ້ອງຟ້ອງ, ເຂົ້າໄປແຈ້ງຄວາມພ້ອມດ້ວຍເອກະສານຫຼັກຖານ ກັບເຈົ້າໜ້າທີ່ຕຳຫຼວດ ຢູ່ກອງບັນຊາການ ປກສ ເມືອງ ຫຼື ຫ້ອງການຕຳຫຼວດ ຂອງກອງບັນຊາການ ປກສ ແຂວງ, ນະຄອນຫຼວງ, ຂອງຕົນອາໄສຢູ່ໄດ້.

3. ກຳນົດເວລາຮັບບັນທຶກຄຳໃຫ້ການ, ຮັບຄຳຮ້ອງຟ້ອງ ແລະ ຮັບແຈ້ງຄວາມ ແມ່ນບໍ່ໃຫ້ກາຍວັນທີ 30/11/2017 ເພື່ອໃຫ້ເຈົ້າໜ້າທີ່ ຮັບແຈ້ງຄວາມໄດ້ສັງລວມສົ່ງໃຫ້ຄະນະສະເພາະກິດດຳເນີນຄະດີ, ແລ້ວສັງລວມເຂົ້າໃນບົດສະຫຼຸບຄະດີທັນຕາມເວລາ

ດັ່ງນັ້ນ, ຈິ່ງແຈ້ງການມາຍັງພໍ່ແມ່ປະຊາຊົນ, ຊາວຄ້າຂາຍ, ພະນັກງານ,​ທະຫານ, ຕຳຫຼວດ, ຄູບາ, ອາຈານ ທີ່ໄດ້ເອົາເງິນໄປໃຫ້ບໍລິສັດ ພີເອັສ ໃນຂອບເຂດທົ່ວປະເທດ ເພື່ອຊາບ ແລະ ຈັດຕັ້ງປະຕິບັດຕາມແຈ້ງການຢ່າງເຂັ້ມງວດ.

ຮອງຫົວໜ້າກົມໃຫຍ່ຕຳຫຼວດ
ຫົວໜ້າຄະນະສະເພາະກິດດຳເນີນຄະດີຕໍ່ບໍລິສັດພີເອັສ
ພອ ປອ ເພັງສະຫວັນ ທິບພະວົງໄຊ

ຕິດຕໍ່ພົວພັນເພີ່ມເຕີມ
ພັທ ປອ ພັນໄຊ ທຳມະສິດ: 020 76241515
ພັທ ປອ ສີສະຫວັດ ສັງສິນໄຊ: 020 99961156
ຮອ ທອງວຽງ ໄຊຍະຈັນ: 020 95333434
ຮທ ຊາຍຟອງ ສົມພະວົງ: 020 77717176




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




loading...

No comments

Powered by Blogger.