Header Ads

ປະຫວັດຫຍໍ້ ໝໍລຳແຫ່ງຊາດ ທ່ານສະໝານ ສຸວັນນະສີ



ສີລະປິນແຫ່ງຊາດ ສາຂາການສະແດງ ທີ່ຮູ້ຈັກກັນດີ ວ່າ ໝໍລໍາແຫ່ງຊາດ ທ່ານ ສະໝານ ສຸວັນນະສີ ເກີດເມື່ອ ວັນທີ 20 ຕຸລາ 1935. ກຳເນີດ ທີບ້ານ ວັງຕໍ່,​ ຕໍາບົນບ້ານຄໍ້,​ ອຳເພີເມືອງ,​ແຂວງໜອງຄາຍ ປະເທດໄທ.  ເປັນລູກຊາຍຂອງ ທ່ານນາງ ເຄນ ສຸວັນນະສີ.

ທ່ານໄດ້ເຖິງແກ່ມໍລະນະກຳ ໃນເວລາ 3:10 (ຕອນເຊົ້າ) ວັນທີ 10 ກັນຍາ 2017, ລວມອາຍຸໄດ້ 82 ປີ.

ປະຫວັດໂດຍສັງເຂບຂອງ ອາຈານ ສະໝານ ສຸວັນນະສີ ມີດັ່ງນີ້

ການສຶກສາແມ່ນ ຈົບປະຖົມ ທີ່ໂຮງຮຽນ ບ້ານວັງຕໍ ຢູ່ແຫ່ງນີ້ ທ່ານໄດ້ຮຽນລຳ ກັບ ຄູ ອິນຕາ, ຮຽນເປົ່າແຄນ ກັບຄູ ທອງອິນ, ຈົນສາມາດເປັນໝໍລໍາ ແລະ ໝໍແຄນ. ເຊິ່ງ ທ່ານສະໝານ ແມ່ນຄົນທີ່ສະຫຼຽວສະຫຼາດ ແລະ ຮຽນຮູ້ ໄດ້ໄວ້. ຈາກນັ້ນ, ຜູ່ກ່ຽວ ແມ່ນໄດ້ ຈັດລາຍການວິທະຍູກະຈາຍສຽງ ວບ.ກ 12 ຂອນແກ່ນ. 

ໃນປີ ຄສ 1960 ຫາ 1963 ໄດ້ ຮ່ວມກັບ ຄູຄຣອບ ຈັນດາວົງ ອາດີດ ສສ ສະກົນນະຄອນ ຜະລິດຢາສະໝຸນໄພ ອອກຈໍາໜ່າຍ. ເມື່ອງ ຄູຄຣອບ ຖືກຈັບ ແລະ ຮັບໂທດປະຫານຊີວິດ,  ທ່ານສະໝານ ຈິ່ງໜີອອກຈາກປະເທດໄທ ມາສູ່ປະເທດລາວ. 

ຍ້ອນຄວາມຮັກໃນສີລະປິນ ທ່ານສະໝານ ຈິ່ງໄດ້ສຶກສາຮໍາຮຽນບົດກອນບົດລໍາ ທ້ອງຖິ່ນຂອງລາວ ຈົນມີຄວາມສາມາດຂຽນ ແລະ ຂັບລຳໄດ້ຢ່າງປານີດ.

ທ່ານສະໝານ ສຸວັນນະສີ ແມ່ນເປັນທີ່ຮັກ ແລະ ເຄົາລົບ ໃນວົງການ ບັນເທີງ,​ ສາສະໜາ ແລະ ສັງຄົມ ຖືເປັນ ອາຈານ ຜູ່ສຳຄັນ ໃນວົງການ ຂັບລຳຂອງລາວ. ທ່ານຍັງໄດ້ເປັນພິທີກອນ ຈັດລາຍການ ເຂົ້າໜຽວສຽງແຄນ ຂອງ ສະຖານີວິທະຍຸກະຈາຍສຽງແຫ່ງຊາດ. ແລະ ໄດ້ຮັບກຽດ ປະດັບນາມມະຍົດ ເປັນ ສີລະປິນແຫ່ງ ຊາດ ຂອງ ສາທາລະນະລັດປະຊາທິປະໄຕ ປະຊາຊົນລາວ.

ເວົ້າໄດ້ວ່າ ທ່ານສະໝານ ສຸວັນນະສີ ແມ່ນບຸກຄົນສຳຄັນທີ່ ປະກອບສ່ວນຮັກສາວັດທະນະທຳຂອງ ສອງຝັ່ງແມ່ນໍ້າຂອງ, ດິນແດນເຂົ້າໜຽວສຽງແຄນ. ຈົນໄດ້ຮັບການເຊີດຊູ ທັງຢູ່ ລາວ ແລະ ໄທ ໃນນາມເປັນ
ນັກສະແດງ, ໝໍລຳ, ນັກດົນຕີທີ່ດີເດັ່ນ.

ທ່ານໄດ້ຈາກພວກເຮົາໄປ ໃນເຊົ້າວັນທີ 10 ກັນຍາ 2017,​ ແຕ່ຄຸນງາມຄວາມດີ ແລະ ຜົນງານຂອງ ໝໍລະແຫ່ງຊາດ ສະໝານ ສຸວັນນະສີ ຍັງຄົງຈະຖືກຈົດຈໍາ, ກ່າວເຖິງ ແລະ ຖືກອານຸຊົນ ຄົນລຸ້ນຫຼັງໄດ້ຮຽນຮູ້ ແລະ ຖ່າຍທອດ ເອົາຜົນງານຂອງທ່ານຕະຫຼອດໄປ.

ພິທີບໍາເພັນກຸສົນຂອງ ທ່ານສະໝານ ສຸວັນນະສີ ແມ່ນຢູ່ທີ່ເຮືອນຂອງຜູ່ກ່ຽວເອງ,​ ບ້ານອຸດົມຜົນ,​ ເມືອງໄຊທານີ,​ ນະຄອນຫຼວງວຽງຈັນ.


ຂໍ້ມູນຈາກ:​ https://i-culture.rmu.ac.th
ແລະ 1624
ຮຽບຮຽງໂດຍ: ຮັກລາວ ໂທລະໂຄ່ງ





------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.