Header Ads

ອົງການ ສປຊ ສຳລັບເດັກເຂົ້າພົບປະຢ້ຽມຢາມການນຳຂອງແຂວງສະຫວັນນະເຂດ

ໃນວັນທີ 31 ສິງຫາ 2017 ທີ່ຫ້ອງຮັບແຂກຫ້ອງວ່າການປົກຄອງແຂວງສະຫວັນນະເຂດ, ກົມຮ່ວມມືສາກົນກະຊວງແຜນການ ແລະການລົງທຶນແຂວງ ແລະອົງການສະຫະປະຊາຊາດ ສຳລັບເດັກ (UNICEF) ໄດ້ເຂົ້າພົບປະຢ້ຽມຢາມ ແລະໃຫ້ທິດຊີ້ນຳກ່ຽວກັບການປະຕິບັດແຜນຮ່ວມມືໄລຍະໃໝ່ 2017-2021 ລະຫວ່າງລັດຖະບານລາວ ແລະອົງການຢູນີເຊັບ ເພື່ອແກ້ໄຂບັນຫາຂອງແມ່ຍິງ ແລະເດັກນ້ອຍເຊິ່ງໃຫ້ກຽດຕ້ອນຮັບໂດຍທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມພະແນກການ ແລະພາກສ່ວນກ່ຽວຂ້ອງພາຍໃນແຂວງຈຳນວນໜື່ງ.

ໂອກາດນີ້, ຜູ້ຕາງໜ້າອົງການ ສປຊ ປະຈຳລາວ ກໍ່ໄດ້ລາຍງານໃຫ້ໃຫ້ຮູ້ໂດຍຫຍໍ້ກ່ຽວກັບແຜນການຮ່ວມມືໄລຍະໃໝ່ລະຫວ່າງອົງການ ສປຊ ສຳລັບເດັກ ແລະລັດຖະບານແຫ່ງ ສປປ ລາວ ພ້ອມນີ້ ທັງສອງຝ່າຍຕ່າງກໍ່ໄດ້ມີການປຶກສາຫາລືຮ່ວມກັນໃນບັນຫາສຳຄັນກ່ຽວກັບການຈັດຕັ້ງປະຕິບັດແຜນຮ່ວມມືສະບັບໃໝ່ດັ່ງກ່າວ ຢູ່ແຂວງສະ ຫວັນນະເຂດ ຊຶ່ງແຂວງສະຫວັນນະເຂດ ແມ່ນໜຶ່ງໃນ 7 ແຂວງ ທີ່ອົງການ ສປຊ ສຳລັບເດັກໄດ້ຈັດຕັ້ງປະຕິບັດໂຄງການເພື່ອສົ່ງເສີມການຢູ່ລອດຂອງເດັກ, ການພັດທະນາ ແລະການປົກປ້ອງເດັກຢູ່ແຂວງສະຫວັນນະເຂດໄດ້ຢ່າງໄວວາ ແລະມີປະສິດທິຜົນ.

 ໃນການຈັດຕັ້ງປະຕິບັດນີ້, ທາງອົງການຢູນິເຊັບ ແລະລັດຖະບານ ສປປ ລາວ ໄດ້ສ້າງແຜນງານການຮ່ວມມື 2017-2021 ເພື່ອພັດທະນາເດັກນ້ອຍ ເປົ້າໝາຍແມ່ນຊ່ວຍເຫຼືອເດັກນ້ອຍລາວ ໂດຍສະເພາະເດັກທີ່ຂາດເຂີນທີ່ສຸດ ເຮັດໃຫ້ເຂົາເຈົ້າໄດ້ຮັບສິດໃນການຢູ່ລອດ, ສິດໃນການພັດທະນາ ແລະສິດໃນການປົກປ້ອງ ປີ 2017ນີ້ ແມ່ນປີທຳອິດຂອງແຜນການຮ່ວມມືໄລຍະໃໝ່ ຊຶ່ງທາງອົງການ ສປຊ ຈະໄດ້ສຸມໃສ່ການຊ່ວຍເຫຼືອເດັກນ້ອຍໃນ 7 ແຂວງເປົ້າໝາຍຄື:  ຜົ້ງສາລີ, ບໍ່ແກ້ວ, ຫົວພັນ, ຊຽງຂວາງ, ສະຫວັນນະເຂດ, ສາລະວັນ ແລະອັດຕະປື. ນອກນີ້ ທ່ານຜູ້ຕາງໜ້າອົງການ ສປຊ ປະຈຳລາວ ກໍ່ຍັງໄດ້ຮຽກຮ້ອງມາຍັງແຂວງ ຊ່ວຍໃນການປະງານໃນການຈັດຕັ້ງປະຕິບັດວຽກງານໃນແຜນການຮ່ວມມືໄລຍະໃໝ່ 2017-2021 ໃຫ້ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.

ໃນພິທີ ທ່ານເຈົ້າແຂວງສະຫວັນນະເຂດ ກໍ່ໄດ້ສະແດງຄວາມຊົມເຊີຍຕໍ່ທາງອົງການ ສປຊ ສຳລັບເດັກທີ່ໃຫ້ການຊ່ວຍເຫຼືອເດັກນ້ອຍໃນແຂວງສະຫວັນນະເຂດ ພ້ອມນີ້ທາງແຂວງຍິນດີໃຫ້ການຮ່ວມມືໃນການຈັດຕັ້ງວຽກງານຮ່ວມມກັນ ໂດຍມອບໃຫ້ບັນດາພະແນກການ ແລະຂະແໜງການທີ່ກ່ຽວຂ້ອຂອງໃນແຂວງເປັນເຈົ້າການໃນການຈັດຕັ້ງປະຕິບັດວຽກງານດັ່ງກ່າວເພື່ອໃຫ້ມີຜົນສຳເລັດ.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.