Header Ads

ສໍ້ໂກງຊັບພີ່ນ້ອງ 100 ກວ່າລ້ານກີບ ຖືກຈັບດຳເນີນຄະດີທັງສາມຄົນທີ່ ບ້ານທ້າວແກ່ນ ເມືອງແກ່ນທ້າວ ແຂວງໄຊຍະບູລີ



ຕາມການລາຍງານຂ່າວຂອງ ນສພ ຄວາມສະຫງົບ ວ່າ : ປັດຈຸບັນສະພາບກຸ່ມຄົນບໍ່ດີທີ່ຕົວະຍົວະຫຼອກລວງເອົາຊັບຂອງຄົນອື່ນມາເປັນຂອງຕົວເອງແມ່ນມີຫຼາຍຮູບການ ຫຼາຍວິທີການບາງຄັ້ງແອບແຝງມາແບບຊັກຊວນເຮັດທຸລະກິດການປ່ອຍເງິນກູ້ແບບດອກເບ້ຍສູງ ແລະ ວິທີອື່ນໆ ເພື່ອຫາວິທີໃຫ້ເຫຍື່ອຫຼົງເຊື່ອ ແລ້ວຕົກລົງຈ່າຍເງິນຄ່າມັດຈຳລ່ວງໜ້າ ຈາກນັ້ນກໍຫາຍມິດໄປໂດຍພວກເຂົາບໍ່ຄຳ ນຶງຜົນກະທົບທີ່ຈະຕາມມາ ບາງກຸ່ມຫຼອກລວງກະທັງພີ່ນ້ອງຂອງຕົນເອງ ຄືດັ່ງຄະດີໃນເດືອນກັນຍາ 2017 ເຈົ້າ ໜ້າທີ່ ປກສ ເມືອງນາຊາຍທອງ ນະຄອນຫຼວງວຽງຈັນ ຕິດຕາມຈັບຕົວ ທ້າວ ສັນຕິພາບ ອາຍຸ 42 ປີ, ນາງ ກອງຄັບ ( ຜົວ-ເມຍ ) ອາຍຸ 38 ປີ ແລະ ນາງ ນິດຖາພອນ ( ນ້ອງເມຍ ) ອາຍຸ 34 ປີ ທັງສາມຢູ່ບ້ານທ້າວແກ່ນ ເມືອງແກ່ນທ້າວ ແຂວງໄຊຍະບູລີ ພວກກ່ຽວໄດ້ຕົວະຍົວະໃຫ້ພີ່ນ້ອງໂອນເງິນໃຫ້ເພື່ອແລ່ນເອກະສານກູ້ຢືມເງິນ ເສຍຫາຍ 100 ກວ່າລ້ານກີບ.


ເຈົ້າໜ້າທີ່ໜ່ວຍງານສືບສວນ-ສອບ ສວນຄະດີອາຍາ ປກສ ເມືອງນາຊາຍທອງ ໃຫ້ຮູ້ວ່າ: ໃນເບື້ອງຕົ້ນທ້າວ ສະ ຫວັດ ( ຜູ້ເສຍຫາຍ ) ໄດ້ແຈ້ງຄວາມເຈົ້າໜ້າທີ່ ປກສ ແຂວງໄຊຍະບູລີ ວ່າ ພວກກ່ຽວທັງສາມໄດ້ສໍ້ໂກ້ງຊັບ 100 ກວ່າລ້ານກີບຈາກພີ່ນ້ອງພວກເຂົາ, ຈາກການເກັບກຳຂໍ້ມູນຕ່າງໆຈຶ່ງໄດ້ປະສານສົມທົບກວດກາເປົ້າໝາຍຕົວຈິງ ສືບຮູ້ວ່າ ພວກກ່ຽວໄດ້ເຊົ່າອາພັດເມັ້ນຢູ່ບ້ານສີບູນເຮືອງ ເມືອງຈັນທະບູລີ ຮອດວັນ ທີ 19 ກັນຍາ 2017 ຈຶ່ງເຂົ້າກັກຕົວພວກກ່ຽວຢູ່ຮ້ານອາຫານແຫ່ງໜຶ່ງເຂດເມືອງນາຊາຍທອງ ມາສອບສວນ.

ຜ່ານສອບສວນ ພວກກ່ຽວທັງສາມ ໄດ້ສາລະພາບວ່າ: ເດືອນສິງຫາ 2017 ແມ່ນໄດ້ພາກັນໄປເຊົ່າອາພັດເມັ້ນຢູ່ ບ້ານສີບຸນເຮືອງ ເມືອງຈັນທະບູລີ ນະຄອນຫຼວງວຽງຈັນ, ມາວັນທີ 31 ສິງຫາ 2017 ທ້າວ ສະຫວັດ ອາຍຸ 48 ປີ ຢູ່ ບ້ານສີສະຫວາດ ເມືອງປາກລາຍ ແຂວງ ໄຊຍະບູລີ ( ພີ່ນ້ອງ ) ໂທລະສັບມາຫາ ທ້າວ ສັນຕິພາບ ເພື່ອມາຖາມໜີ້ ທີ່ທ້າວ ສັນຕີພາບ ຄ້າງຢູ່ 5.000 ບາດ, ແຕ່ ທ້າວ ສັນຕິພາບ ໄດ້ເວົ້າວ່າ: ດຽວນີ້ກຳລັງແລ່ນເອົາເງິນກູ້ນຳຄົນຕ່າງ ປະເທດ ດອກເບ້ຍ 3,2% ຕໍ່ປີ, ຈາກນັ້ນ ທ້າວ ສະຫວັດ ໄດ້ເວົ້່າວ່າ: ປັດຈຸບັນ ເຂົາເຈົ້າຍັງໃຫ້ກູ້ຢູ່ບໍເພາະຢາກໄດ້. ຈາກນັ້ນ, ທ້າວ ສັນຕິພາບ ໄດ້ບອກວ່າ ຍັງໃຫ້ກູ້ຢູ່ຖ້າບໍ່ເຊື່ອແມ່ນໃຫ້ຖາມນາງ ນິດຖາພອນ.

ພາຍຫຼັງນາງ ນິດຖາ ພອນ ເວົ້າລາຍອຽດໃຫ້ຟັງພ້ອມທັງບອກວ່າຖ້າຢາກຢືມແມ່ນໃຫ້ໂອນເງິນມາກ່ອນ ຈຳນວນ 17.150.000 ກີບ ເພື່ອໄປເຮັດປະກັນໄພນຳຜູ້ໃຫ້ກູ້, ພາຍຫຼັງໂອນເງິນເຂົ້າບັນຊີແລ້ວໄດ້ປະມານ 2 ຊົ່ວ ໂມງ, ທ້າວ ສັນຕິພາບ ໄດ້ໂທ ລະສັບບອກ ໃຫ້ທ້າວ ສະຫວັດ ໂອນເງິນ ຈຳນວນ 50.000.000 ກີບ ຕື່ມອີກ ເພື່ອເສຍຄ່າທຳນຽມເງິນກູ້, ແລ້ວຈຶ່ງ ຈະໂອນເງິນ ຈຳນວນ 100.000 ໂດລາສະຫະລັດ ຄືນໃຫ້ທ້າວ ສະຫວັດ ພາຍຫຼັງເສຍຄ່າທຳນຽມ, ຈາກນັ້ນ ທ້າວ ສັນ ຕິພາບ ກໍຂາດການຕິດຕໍ່.

ມາວັນທີ 1 ກັນຍາ 2017 ທ້າວ ສັນຕິພາບ ໄດ້ສົ່ງຂໍ້ຄວາມຫາທ້າວ ສະຫວັດ ວ່າ: ມີ ຂ່າວດີມີໂຄງການໃໝ່ຢູ່ແຂວງຄຳມ່ວນ ໂດຍແມ່ນບໍລິສັດນ້ອງເມຍເປັນຄົນຮັບປະກັນ, ເປັນໂຄງການໄຟຟ້າສຸລະ ເຊວ ບໍລິສັດຂອງຄົນຄົນຕ່າງປະເທດເຊິ່ງບໍລິສັດຕ້ອງການເງິນຄໍ້າປະກັນ ຈຳນວນ 400. 000 ໂດລາ ສະຫະລັດ, ໃນ ມູນຄ່າໂຄງການທັງໝົດຈຳນວນ 19.000.000 ໂດລາສະຫະລັດ ຈຶ່ງໄດ້ຊັກຊວນກັນ ຮ່ວມລົງທຶນນຳກັນ ແລ້ວທ້າວ ສັນຕິພາບ ບອກໃຫ້ທ້າວ ສະຫວັດ ໂອນເງິນມາໃຫ້ກ່ອນ 100.000.000 ລ້ານ ກີບເພື່ອແລ່ນເອກະສານຈາກນັ້ນ ທ້າວ ສະຫວັດ ໄດ້ໂອນເງິນໃຫ້ຄົບຕາມຈຳນວນ, ມາວັນທີ 2 ກັນຍາ ທ້າວ ສັນຕິພາບ ໄດ້ໂທລະສັບມາຫາທ້າວ ສະ ຫວັດ ບອກໃຫ້ໂອນເງິນມາອີກຈຳນວນ 60.000 ບາດ ເຂົ້າບັນຊີຂອງນາງ ກອງຄັບ (ເມຍ) ແລະ ຄ່ານາຍໜ້າ 50.000 ບາດ, ມາວັນທີ 18 ກັນຍາ 2017 ຖືກເຈົ້າໜ້າທີ່ ປກສ ເມືອງນາຊາຍທອງ ເຂົ້າກັກຕົວກ່ອນ.

ນອກນີ້, ພວກກ່ຽວຍັງສາລະພາບ ອີກວ່າ: ເຄີຍເຄື່ອນໄຫວສໍ້ໂກງຊັບຂອງພົນລະເມືອງມາຫຼາຍຄັ້ງເຊິ່ງໃນເດືອນ ພຶດສະພາ 2017 ທ້າວ ສັນຕິພາບ ໄປຊື້ລົດໂຕໂຢຕ້າ ຟໍຈູເນີ ມູນຄ່າ 46. 000 ໂດລາ ຈ່າຍກ່ອນ 35% ອອກຊື່ ນາງ ບົວຮອງ ຢູ່ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ, ໂດຍເຂົ້າໄຟແນັນນຳບໍລິສັດ ແສງອາລີ ເຊົ່າສິນເຊື່ອ ຈາກນັ້ນໄດ້ເອົາລົດຄັນດັ່ງ ກ່າວ ໄປຈຳນຳທ້າວ ເພັດ ຢູ່ບ້ານໜອງ ພະຍາ ເມືອງໄຊທານີ ຈຳນວນ 500. 000 ບາດ ແລະ ບໍ່ຈ່າຍໄຟແນັນອີກ, ມາເດືອນກໍລະກົດ ພວກກ່ຽວທັງສາມໄດ້ພາກັນໄປດາວລົດໃໝ່ປາລາໂດ່ ສີ ຂາວ ຢູ່ຮ້ານນາງ ມະນີວົງ ໃນລາຄາ 86.500 ໂດລາສະຫະລັດ ໂດຍທ້າວ ສັນຕິພາບ ຂຽນເຊັກເງິນສົດທະນາຄານ ກຸງສີ ອະຍຸດທະຍາ ສາຂານະຄອນຫຼວງວຽງຈັນ ໂດຍເເມ່ນນາງກອງຄັບເປັນຜູ້ເຊັນເຊັກຄໍ້າໄວ້ ໂດຍຕົກລົງຈ່າຍນຳ ບໍລິສັດອາທິດລະ 100.000 ບາດ, ຈາກນັ້ນ ໄດ້ເອົາລົດໄປຈຳນຳນາງ ນ່າ ຈຳນວນ 30.000 ໂດລາສະຫະລັດ ສ່ວນ ເຊັກເງິນທີ່ຂຽນນັ້ນແມ່ນບໍ່ມີເງິນເປັນໃບເຊັກປອມ.

ໃນຕົ້ນເດືອນກັນຍາ ທ້າວ ສັນ ຕິພາບ ໄດ້ໄປຊື້ລົດກະບະ ຣີໂວ ສີສົ້ມ ໝາຍເລກທະບຽນ ຮຮ 6677 ກຳແພງນະຄອນ ຢູ່ຮ້ານເຂດໄຟແດງດົງນາໂຊກ ໃນລາຄາ 42.000 ໂດລາສະ ຫະລັດ, ໂດຍອອກຊື່ນາງ ເຂັມພອນ ແຕ່ເງິນບໍ່ພໍ ຈຶ່ງເຂົ້າໄຟເເນັນຢູ່ບໍລິສັດ ສີສົມບັດ ເຊົ່າສິນເຊື່ອຈຳນວນ 35% ຜ່ານມາທ້າວ ສັນຕິພາບ ໄດ້ຈ່າຍງວດໄຟແນັນ ພຽງ 1 ຄັ້ງ ເຫຼືອນັ້ນແມ່ນບໍ່ຈ່າຍເລີຍ ແລະ ຍັງເອົາຣີໂວນັ້ນໄປໃຫ້ ທ້າວ ອູດ ໄປຈຳນຳຄົນຈີນ ໃນລາຄາ 30.000 ໂດລາ.

ທີ່ມາ: ນສພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.