Header Ads

12 ຕຸລາ ວັນແຫ່ງຊາດຕ້ານຢາເສບຕິດ ປີນີ້ຄົບຮອບ 16 ປີ (ວັນທີ 12 ຕຸລາ 2001-12 ຕຸລາ 2017)



ວັນທີ 12 ຕຸລາ ຂອງທຸກປີ ເປັນວັນແຫ່ງຊາດຕ້ານຢາເສບຕິດ. ດັ່ງນັ້ນ, ຄະນະກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ (ກຄສ) ໄດ້ຖະແຫຼງການເນື່ອງໃນວັນດັ່ງກ່າວ. ປີນີ້ຄົບຮອບ 16 ປີ (ວັນທີ 12 ຕຸລາ 2001-12 ຕຸລາ 2017) ເພື່ອຫວນຄືນມູນເຊື້ອຄວາມເປັນມາຂອງວັນແຫ່ງຊາດຕ້ານຢາເສບຕິດ ແລະ ວຽກງານສະກັດກັ້ນ, ແກ້ໄຂບັນຫາຢາເສບຕິດ ເພື່ອບໍ່ໃຫ້ສັງຄົມຕົກເປັນທາດຂອງຢາບ້າ ແລະ ຢາເສບຕິດປະເພດຕ່າງໆ.

ທ່ານ ກຸ ຈັນສີນາ ປະທານ ກຄສ ກ່າວໃນວັນທີ 11 ຕລາ 2017 ວ່າ: ໃນຊຸມປີຜ່ານມາ, ພັກ-ລັດ ໄດ້ເອົາໃຈໃສ່ ແລະ ໃຫ້ຄວາມສຳຄັນຕໍ່ວຽກງານສະກັດກັ້ນ ແລະ ແກ້ໄຂບັນຫາຢາເສບຕິດຢ່າງຈົດຈໍ່ ສະເໜີຕົ້ນສະເໜີປາຍຕະຫຼອດມາ, ເຊິ່ງສະແດງອອກໃນການປະກາດໃຊ້ນິຕິກຳທີ່ສໍາຄັນຫຼາຍສະບັບ ເຊັ່ນ: ສະພາແຫ່ງຊາດ ໄດ້ຮັບຮອງເອົາກົດໝາຍ ວ່າດ້ວຍຢາເສບຕິດ, ລັດຖະບານຮັບຮອງເອົາແຜນແມ່ບົດແຫ່ງຊາດ ເພື່ອຄວບຄຸມ, ສະກັດກັ້ນ ແລະ ຕ້ານຢາເສບຕິດໃນແຕ່ລະໄລຍະ
ໃນໄລຍະຜ່ານມາ, ເຈົ້າໜ້າທີ່ຕຳຫຼວດ ແລະ ພາກສ່ວນທີ່ກ່ຽວຂ້ອງໄດ້ມ້າງຄະດີ, ກັກຕົວຜູ້ຖືກຫາ, ຢຶດຂອງກາງຢາເສບຕິດ, ສານເຄມີຕົ້ນ, ພາຫະນະ, ອຸປະກອນຜະລິດຢາເສບຕິດ, ເງິນສົດ, ວັດຖຸມີຄ່າ, ອາວຸດປະເພດຕ່າງໆໄດ້ຫຼາຍສົມຄວນ ສະແດງອອກນັບຕັ້ງແຕ່ປີ 2013 ມາເຖິງປັດຈຸບັນ, ສປປ ລາວ ໄດ້ຮ່ວມມືກັບບັນດາປະເທດໃກ້ຄຽງທີ່ມີຊາຍແດນຮ່ວມກັນ ຄື: ສປ ຈີນ, ສສ ຫວຽດນາມ, ກຳປູເຈຍ, ໄທ, ແລະ ມຽນມາ ເພື່ອປະຕິບັດໂຄງການແມ່ນໍ້າຂອງປອດໄພ ສາມາດມ້າງຄະດີໄດ້ 125.274 ເລື່ອງ, ຈັບກຸມຜູ້ຖືກຫາໄດ້ 168.591 ຄົນ, ຢຶດຢາບ້າໄດ້ 363.950.871 ເມັດ, ສານເຄມີຕົ້ນ 270 ໂຕນ, ຢາໄອສ໌ 13.309 ກິໂລກຼາມ, ເຮໂຣອິນ 7.553 ກິໂລກຼາມ, ຝິ່ນດິບ 14.426 ກິໂລກຼາມ ແລະ ຄັນຊາ 19.502 ກິໂລກຼາມ.

ນອກນັ້ນ, ຍັງໄດ້ດຳເນີນການສຶກສາອົບຮົມ ແລະ ໂຄສະນາເຜີຍແຜ່ຜົນລະບຽບກົດໝາຍ ແລະ ຜົນຮ້າຍຂອງຢາເສບຕິດຢ່າງກວ້າງຂວາງ ເພື່ອປູກຈິດສຳນຶກໃຫ້ຄົນໃນສັງຄົມໄດ້ຮັບຮູ້, ເຂົ້າໃຈລະບຽບກົດໝາຍ ແລະ ຜົນຮ້າຍຂອງຢາເສບຕິດ ເຊິ່ງແຕ່ລະປີໄດ້ມີຜູ້ເຂົ້າຮ່ວມປະມານ 150.000-200.000 ຄົນ, ພ້ອມທັງໃຫ້ການບໍາບັດປິ່ນປົວຜູ້ຕິດຢາເສບຕິດ ເພື່ອຊ່ວຍກອບກູ້ເອົາຜູ້ໄດ້ຮັບເຄາະຮ້າຍຈາກຢາເສບຕິດປະເພດຕ່າງໆນັ້ນ, ຍາດແຍ່ງເອົາການຊ່ວຍເຫຼືອທຶນຈາກສາກົນ ມາສົມທົບກັບງົບປະມານພາຍໃນ ເພື່ອກໍ່ສ້າງ ແລະ ປັບປຸງສູນປິ່ນປົວຜູ້ຕິດຢາເສບຕິດເປັນຂອງລັດ ໄດ້ 17 ແຫ່ງ, ເອກະຊົນ 3 ແຫ່ງ, ດຳເນີນການປິ່ນປົວດ້ວຍການໃຫ້ຄໍາປຶກສາແກ່ຜູ້ຕິດຢາເສບຕິດ ແລະ ພໍ່ແມ່ຜູ້ປົກຄອງຢູ່ໂຮງໝໍເມືອງຂອງແຂວງ ໄດ້ 13 ແຫ່ງ ແລະ ໃນແຕ່ລະປີ, ບັນດາສູນດັ່ງກ່າວ ສາມາປິ່ນປົວຄົວປ່ວຍສະເລ່ຍໄດ້ປະມານ 2.000-3.000 ຄົນ; ພ້ອມນັ້ນ, ຍັງໄດ້ສົມທົບກັບພາກສ່ວນທີ່ກ່ຽວຂ້ອງຂັ້ນຕ່າງໆ ເພື່ອປະຕິບັດວຽກງານ 3 ສ້າງ, ມາຮອດປັດຈຸບັດມີບ້ານປອດຢາເສບຕິດ ໂດຍພື້ນຖານແລ້ວປະມານ 70% ຂອງຈໍານວນບ້ານທັງໝົດໃນທົ່ວປະເທດ ແລະ ມີໂຮງຮຽນປອດຢາເສບຕິດປະມານ 80% ຂອງຈຳນວນໂຮງຮຽນມັດທະຍົມທັງໝົດ.

ທີ່ມາ: ປກສ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.