Header Ads

ກະຊວງວິທະຍາສາດ ແລະ ເຕັກໂນໂລຊີ ກຽມສະຫລອງ ວັນວິທະຍາສາດແຫ່ງຊາດ 12 ຕຸລາ.



ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ປະທານສະພາວິທະຍາສາດ ແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນ, ເນື່ອງໃນວັນວິທະຍາສາດແຫ່ງຊາດ 12 ຕຸລາ 2017ນີ້, ໃນວັນທີ 11 ຕຸລາ 2017 ທີ່ ກະຊວງວິທະຍາສາດ ແລະ ເຕັກໂນໂລຊີ ໂດຍກ່າວວ່າ: ຜ່ານມາ ພັກ ແລະ ລັດ ໄດ້ເອົາໃຈໃສ່ຕໍ່ການພັດທະນາວຽກງານວິທະຍາສາດ ແລະ ເຕັກໂນໂລຊີ ຂອງປະເທດລາວຢ່າງຈົດຈໍ່, ເຊິ່ງສະແດງອອກໃນແນວທາງນະໂຍບາຍຂອງພັກ ບັນດາກົດໝາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະນັ້ນ ໄດ້ເລັງໃສ່ການພັດທະນາຊັບພະຍາກອນມະນຸດ ແລະ ການສ້າງພື້ນຖານໂຄງລ່າງ ສໍາລັບການຄົ້ນຄວ້າ-ພັດທະນາ ແລະ ນໍາໃຊ້ຄວາມກ້າວໜ້າທາງວິທະຍາສາດ ແລະ ເຕັກໂນໂລຊີ ເພື່ອຮັບໃຊ້ການພັດທະນາ ຢູ່ປະເທດລາວ.

ກະຊວງວິທະຍາສາດ ແລະ ເຕັກໂນໂລຊີ ໄດ້ຄົ້ນຄວ້າສ້າງ ແລະ ປັບປຸງກົດໝາຍ 8 ສະບັບ ແລະ ນິຕິກໍາລຸ່ມກົດໝາຍ ອີກຈໍານວນໜຶ່ງ ໄດ້ດໍາເນີນກອງປະຊຸມ ນັກວິທະຍາສາດທໍາມະຊາດ ທົ່ວປະເທດ ຄັ້ງທີ l ເຊິ່ງເປັນຄັ້ງປະຫວັດສາດ ຂອງປະເທດລາວສຳເລັດຜົນຢ່າງສະຫງ່າງາມ ໄດ້ດໍາເນີນກອງປະຊຸມວຽກງານວິທະຍາສາດ ແລະ ເຕັກໂນໂລຊີ ສຳເລັດແລ້ວ 2 ຄັ້ງ ແລະ ໄດ້ສ້າງແຜນຍຸດທະສາດການພັດທະນາວິທະຍາສາດ ແລະ ເຕັກໂນໂລຊີ ເຖິງ ປີ 2030, ເຊິ່ງເປັນແຜນ ຍຸດທະສາດການພັດທະນາ ທີ່ສາມາດເຊື່ອມສານກັບ ການພັດທະນາຂອງບັນດາ ກະຊວງຂະແໜງການ ກໍຄື ພາກພື້ນ ແລະ ສາກົນ ໃນໄລຍະໃໝ່ແຫ່ງການພັດທະນາແບບຍືນຍົງ. ໃນດ້ານການບໍລິການວິທະຍາສາດ ແລະ ເຕັກໂນໂລຊີ ເປັນຕົ້ນ ແມ່ນດ້ານຊັບສິນທາງປັນຍາມາດຕະຖານ ແລະ ວັດແທກ ກໍໄດ້ຮັບການປັບປຸງຍົກລະດັບໃຫ້ດີຂຶ້ນ ເພື່ອບໍລິການແກ່ສັງຄົມຢ່າງກວ້າງຂວາງເຖິງຮາກຖານທ້ອງຖິ່ນ ໃນນັ້ນ ໄດ້ໃຫ້ຄໍາປຶກສາ ຮັບຄໍາຮ້ອງຂໍຈົດທະບຽນ ຊັບສິນອຸດສາຫະກໍາ ແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ການແກ້ໄຂຂໍ້ຂັດແຍ່ງຊັບສິນທາງປັນຍາ ໄດ້ທັງໝົດ 2.600 ກວ່າສະບັບ, ໄດ້ສ້າງຕັ້ງຫ້ອງກວດສອບຄຸນນະພາບນໍ້າມັນເຊື້ອໄຟ ປະຈໍາຢູ່ບັນດາດ່ານສາກົນ ເຊິ່ງສາມາດເພີ່ມລາຍຮັບພາສີອາກອນນໍ້າມັນ ແລະ ຮັບປະກັນໃຫ້ສັງຄົມ ໄດ້ຊົມໃຊ້ນໍາມັນທີ່ມີຄຸນນະພາບ ປົກປັນຮັກສາສິ່ງແວດລ້ອມ ກວດສອບກົງເຕີໄຟຟ້ານໍາເຂົ້າມາໃໝ່ ຈໍານວນ 247.000 ກວ່າໜ່ວຍ ແລະ ບໍລິການອຶ່ນໆ. 


ພ້ອມນັ້ນ, ຍັງໄດ້ເພີ່ມທະວີວຽກງານໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ລັດກ່ຽວກັບວຽກງານວິທະຍາສາດ ແລະ ເຕັກໂນໂລຊີ ດ້ວຍຫລາຍຮູບການ ເປັນຕົ້ນ ຈັດງານວາງສະແດງ ແລະ ສ້າງກິດຈະກໍາຕ່າງໆ ໃນໂອກາດສະເຫລີມສະຫລອງວັນລະນຶກທີ່ສໍາຄັນແຫ່ງຊາດ ປັບປຸງຍົກລະດັບຖານຂໍ້ມູນ ແລະ ສ້າງເວັບໄຊ ຂອງກະຊວງໃຫ້ການບໍລິການຫ້ອງສະໝຸດວິທະຍາສາດ ແລະ ເຕັກໂນໂລຊີໜັງສືພີມວິທະຍາສາດ ແລະ ການພັດທະນາວາລະສານເຄື່ອງ ໝາຍການຄ້າ ອອກຮັບໃຊ້ມວນຊົນຢ່າງຕໍ່ເນື່ອງ ຈັດປະຊຸມສໍາມະນາ-ວິຊາການ ແລະ ການປາຖະກະຖາ ກ່ຽວກັບວິທະຍາສາດເຕັກໂນໂລຊີ ແລະ ນະວັດຕະກໍາ ເພື່ອເປັນຂໍ້ມູນຄວາມຮູ້ ໃຫ້ແກ່ນັກວິຊາການນັກຮຽນຮູ້ປັນຍາຊົນ ແລະ ທົ່ວສັງຄົມ ຕື່ມອີກ.

ທີ່ມາ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.