Header Ads

ລັດອານຸມັດ ເງິນ 164 ຕື້ກີບ ສ້າງທາງເມືອງຊົນບູລີ



ລັດຖະບານໄດ້ອະນຸມັດງົບປະມານຈຳນວນ 164 ຕື້ກວ່າກີບ ແກ່ແຂວງສະຫວັນນະເຂດ ເພື່ອສ້າງເສັ້ນທາງດິນແດງຕັດຕາຜ້າຈຸດສຸມຕັ່ງຫວາຍ-ລຳທວາຍລວມໄລຍະທາງ 60 ກວ່າກິໂລແມັດ ຢູ່ເມືອງຊົນບູລີ ແລະກໍ່ສ້າງຂົວເບຕົງອັດແຮງ 1 ແຫ່ງ.

ເພື່ອກ້າວສູ່ການກໍ່ສ້າງຢ່າງເປັນທາງການໃນວັນທີ 3 ຕຸລາຜ່ານມາ ທາງແຂວງສະຫວັນນະເຂດໄດ້ມີພິທີເຊັນສັນຍາໂຄງການກໍ່ສ້າງຈັດຂຶ້ນທີ່ຫ້ອງປະຊຸມພະແນກໂຍທາທິການ ແລະຂົນສົ່ງແຂວງ ລະຫວ່າງທ່ານ ປະສົງສິນ ຈະເລີນສຸກ ຫົວໜ້າພະແນກໂຍທາທິການ ແລະຂົນສົ່ງແຂວງ, ທ່ານ ລຳພັນ ພັນພົມຊະນະ ຮອງຫົວໜ້າພະແນກແຜນການ-ການລົງທຶນແຂວງ ແລະທ່ານ ແກ້ວອຸດອນ ສາລີບົວພັນ ຫົວໜ້າບໍລິສັດເອສ໌ພີພັດທະນາກໍ່ສ້າງຄົບວົງຈອນຈຳກັດຜູ້ດຽວ ໂດຍມີທ່ານຮອງເຈົ້າແຂວງສະຫວັນນະເຂດ ແລະຕາມໜ້າພະແນກການກ່ຽວຂ້ອງເຂົ້າຮ່ວມ.


ທ່ານ ສົມສີ ຜ່ອງສີ ຮອງຫົວໜ້າຂະແໜງຄຸ້ມຄອງທາງບົກ ໄດ້ໃຫ້ຮູ້ວ່າ: ໂຄງການດັ່ງກ່າວນີ້ຈະດຳເນີນການກໍ່ສ້າງທາງດິນແດງຕັດຕາຜ້າຈຸດສຸມຕັ່ງຫວາຍ-ລຳທວາຍ, ເຂດເມືອງຊົນນະບູລີ ແລະກໍ່ສ້າງຂົວເບຕົງອັດແຮງຈຳນວນ 1 ແຫ່ງ, ເສັ້ນທາງມີລວງຍາວ 65 ກິໂລແມັດ, ລວງກວ້າງຂອງໜ້າທາງ 6,5 ກິໂລແມັດ, ລວມມູນຄ່າ 164,02 ຕື້ກວ່າກີບ, ໄດ້ສະເໜີເຂົ້າແຜນສະພາຮັບຮອງໃນປີ 2017, ການຈັດຕັ້ງປະຕິບັດໂຄງການກຳນົດເວລາແມ່ນ 5 ປີ (2017-2022).

 ໂດຍລວມແລ້ວທາງດັ່ງກ່າວມີ 4 ເສັ້ນທາງຄື: ເສັ້ນທາງຕາຜ້າຕັ່ງຫວາຍ-ລຳທວາຍ, ມີລວງຍາວ 19 ກິໂລແມັດ, ເສັ້ນທາງແຕ່ຈຸດສຸມຕັ່ງຫວາຍ-ລຳທວາຍຫາຈຸດສຸມນາມີໄຊ, ລວງຍາວ 17 ກິໂລແມັດ, ເສັ້ນທາງຕາຜ້າຈຸດສຸມນາມີໄຊ, ລວງຍາວ 21 ກິໂລແມັດ, ເສັ້ນທາງແຕ່ຈຸດສຸມນາມີໄຊຫາຊາຍແດນເມືອງພີນ, ລວງຍາວ 8 ກິໂລແມັດ, ມີລວງຍາວລວມທັງໝົດ 65 ກິໂລແມັດ, ມີຂົວເບຕົງອັດແຮງຈຳນວນ 1 ແຫ່ງ, ຍາວ 25 ແມັດ, ການອອກແບບເປັນເສັ້ນທາງຊົນນະບົດ, ເປັນທາງປະເພດ V, ເສັ້ນທາງແມ່ນໄດ້ຜ່ານ 2 ກຸ່ມບ້ານ, ລວມມີ 18 ບ້ານ ແລະ2 ຈຸດສຸມຄື: ຈຸດສຸມຕັ່ງຫວາຍ-ລຳທວາຍ ແລະຈຸດສຸມນາມີໄຊ, ລວມມີ 2.810 ຄອບຄົວ, ພົນລະເມືອງປະມານ 14.600 ຄົນ, ເຊິ່ງເສັ້ນທາງສາຍນີ້ໄດ້ກາຍເປັນປັດໄຈໜື່ງທີ່ສຳຄັນຕົ້ນຕໍຂອງການພັດທະນາເສດຖະກິດ-ສັງຄົມ, ມັນກະທົບໂດຍກົງຕໍ່ການດຳລົງຊີວິດ, ການໄປມາຫາສູ່ຂອງປະຊາຊົນຢູ່ໃນຂົງເຂດດັ່ງກ່າວ ເພື່ອຊື້-ຂາຍແລກປ່ຽນສິນຄ້າ.


ຍ້ອນເສັ້ນທາງດັ່ງກ່າວ ເປັນເສັ້ນທາງລະຫວ່າງບ້ານຫາຈຸດສຸມ, ຈຸດສຸມຫາເມືອງ, ເມືອງຫາແຂວງຫາທາງຫຼວງແຫ່ງຊາດເລກໝາຍທີ 9, ຖ້າຫາກວ່າໄດ້ຮັບການກໍ່ສ້າງຈະເປັນການຕອບສະໜອງໃນດ້ານວຽກງານການຄົມມະນາຄົມຂົນສົ່ງ, ວຽກງານດ້ານກະສິກຳ, ດ້ານປ້ອງກັນຊາດ, ປ້ອງກັນຄວາມສະຫງົບ, ຕອບສະໜອງວຽກງານດ້ານການບໍລິການ, ການຄ້າ, ການທ່ອງທ່ຽວ ແລະການເຊື່ອມໂຍງບັນດາປະເທດໃນກຸ່ມອາຊຽນ ເພື່ອເຮັດໃຫ້ການສັນຈອນໄປມາມີຄວາມສະດວກວ່ອງໄວປອດໄພ ອັນໄດ້ສ້າງເງື່ອນໄຂອຳນວຍຄວາມສະດວກ ເຮັດໃຫ້ປະຊາຊົນບັນດາເຜົ່າ ໄດ້ເຂົ້າເຖິງການສຶກສາ, ສາທາລະນະສຸກ ແລະໄດ້ຮັບການພັດທະນາຢ່າງສົມສ່ວນ ຄຽງຄູ່ກັນນັ້ນ ກໍ່ຍັງໄດ້ເປັນທ່າແຮງອັນພົ້ນເດັ່ນ ເພື່ອກະຕຸກຊຸກຍູ້ໃຫ້ແກ່ການປະຕິບັດແຜນພັດທະນາເສດຖະກິດ-ສັງຄົມຂອງເມືອງ ກໍ່ຄືແຂວງໃຫ້ບັນລຸຕາມເປົ້າໝາຍທີ່ວາງໄວ້.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com






loading...

No comments

Powered by Blogger.