Header Ads

ກອງປະຊຸມລັດຖະມົນຕີ ວິທະຍາສາດ ແລະ ເຕັກໂນ ໂລຊີອາຊຽນ ຄັ້ງທີ 17



ຄະນະຜູ້ແທນກະຊວງວິທະຍາສາດ ແລະ ເຕັກໂນໂລຊີ ແຫ່ງ ສປປ ລາວ ນຳ​ໂດຍ ທ່ານ ຫຸມພັນ ອິນທະຣາດ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ປະທານຄະນະກຳມະການຮ່ວມມື ດ້ານວິທະຍາສາດ ແລະ ເຕັກໂນໂລຊີອາຊຽນ ຂອງ ສປປ ລາວ, ພ້ອມດ້ວຍຄະນະ​ ໄດ້ເຂົ້າຮ່ວມກອງ​ປະຊຸມລັດຖະມົນຕີ ວິທະຍາສາດ ແລະ ເຕັກໂນໂລຊີ ອາຊຽນຄັ້ງທີ 17(AMMST-17th), ກອງ​ປະຊຸມຄະນະກຳມະການຮ່ວມມືດ້ານວິທະຍາສາດ ແລະ ເຕັກໂນໂລຊີ ອາຊຽນຄັ້ງທີ 73 (ASEAN COST 73rd), ກອງປະຊຸມປີ່ນອ້ອມອື່ນໆ ​ແລະ ງານວາງສະແດງອາທິດວິທະຍາສາດ, ເຕັກໂນໂລຊີ ແລະ ນະວັດຕະກຳຄັ້ງທີ 10 (ASTIW 10th), ​ເຊິ່ງໄດ້ຈັດຂຶ້ນ ແຕ່ວັນທີ 12 ຫາ 20 ຕຸລາ 2017 ທີ່ນະຄອນຫລວງ ເນປີດໍ ສາ​ຫະພາບມຽນມາ.




ໃນກອງປະຊຸມ ລັດຖະມົນຕີວິທະຍາສາດ ແລະ ເຕັກໂນໂລຊີ ອາຊຽນ ຄັ້ງທີ່ 17 ນີ້ ໄດ້ຮັບຟັງການລາຍ​ງານ​ຄວາມ​ຄືບ​ໜ້າ ແລະ ຕີລາຄາການຈັດຕັ້ງປະຕິບັດແຜນປະຕິບັດງານ ດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ ອາຊຽນ 2016-2025 ຫລື ເອີ້ນວ່າ APASTI 2016-2025) ທີ່ໄດ້ຮັບຮອງໃນກອງປະຊຸມລັດຖະມົນຕີ ວິທະຍາສາດ ແລະ ເຕັກໂນໂລຊີ ຄັ້ງທີ 16 ທີ່ນະຄອນຫລວງວຽງຈັນ ສປປ ລາວ ໃນປີ 2015. ກອງປະຊຸມໄດ້ຊົມເຊີຍ ຄວາມພະຍາຍາມສູງຂອງ ບັນດາປະເທດສະມາຊີກ ທີ່ນຳເອົາວິທະຍາສາດ, ເຕັກໂນໂລຊີ ແລະ ນະວັດຕະກຳ ປະກອບສ່ວນປະຕິບັດແຜນງານ ສ້າງປະຊາຄົມເສດຖະກິດອາຊຽນ (AEC Blueprint 2025), ການບັນລຸບັນດາເປົ້າໝາຍພັດທະນາແບບຍືນຍົງ ຂອງອົງການ ສະຫະປະຊາຊາດ (SDG) ແລະ ບັນດາເປົ້າໝາຍ ແລະ ຄາດໝາຍຕ່າງໆ ທີ່ໄດ້ກຳນົດໄວ້ໃນປະຕິບັດແຜນປະຕິບັດງານ APASTI.


ກອງປະຊຸມຍັງໄດ້ຄົ້ນຄ້ວາ, ປຶກສາຫາລືແລກປ່ຽນຄຳຄິດເຫັນຢ່າງສ້າງສັນ ແລະ ໄດ້ຕົກລົງຮັບຮອງ​ເອົາ ບາງບັນຫາທີ່ສຳຄັນດັ່ງນີ້: ໄດ້ຮັບຮອງ​ເອົາຖະແຫລງການວ່າດ້ວຍນະວັດຕະກຳ ອາຊຽນ (ASEAN Declaration on Innovation) ເພື່ອສະເໜີພິຈາລະນາຮັບຮອງ ໃນກອງປະຊູມສຸດຍອດ ອາຊຽນ ຄັ້ງທີ 31, ໃນເດືອນພະຈິກ 2017 ທີ່ປະເທດຟີລິບປີນ, ໄດ້ຕົກລົງຮັບຮອງເອົາບັນດາໂຄງການຕ່າງໆ ທີ່ນຳໃຊ້ກອງທຶນວິທະຍາສາດ, ເຕັກໂນໂລຊີ ແລະ ນະວັດຕະກຳ ອາຊຽນ (ASTIF) ຈຳນວນ 12 ໂຄງການ, ໃນນັ້ນ ສປປ ລາວ ສາມາດຍາດໄດ້ 1 ໂຄງການ; ກອງປະຊຸມໄດ້ສະ​ແດງ​ຄວາມ​ຍີ​ນດີ​ ​ແລະ ຊົມ​ເຊີຍຕໍ່ການສະເໜີ ຈາກປະເທດມາເລເຊຍ, ອິນໂດເນເຊຍ ແລະ ສິງກະໂປ ທີ່ຈະປະກອບສ່ວນງົບປະມານ ປະເທດລະ 1 ລ້ານໂດລາສະຫະລັດ ເຂົ້າໃນການປະຕິບັດ APASTI, ເຊິ່ງມີສອງປະເທດ ໄດ້ປະກອບສ່ວນໄປແລ້ວ ເຊັ່ນ: ປະເທດໄທ ແລະ ຟີລິບປີນ ປະເທດລະ 1 ລ້ານໂດລາສະຫະລັດ. ກອງປະຊຸມຄັ້ງນີ້, ໄດ້ຮັບຮູ້ຂໍ້ສະເໜີຟື້ນຟູຄືນບັນດາເຄືອຄ່າຍ ການນຳໃຊ້ ນິວເຄຣຍຂະໜາດໃຫຍ່ ແລະ ຊີໂກຣຕອນ (Synchroton) ຂອງອາຊຽນ ແລະ ເຄືອຄ່າຍສູນຄົ້ນຄ້ວາຄວາມປອດໄພ ພະລັງງານນິວເຄຣຍ ອາຊຽນ ​ແລະ ການສ້າງຕັ້ງສູນ ASEAN Hydroin formatics and Climate Data Centre (AHC) ນຳ​ອີກ​. ກອງປະຊຸມລັດຖະມົນຕີຄັ້ງນີ້ໄດ້ສະແດງຄວາມຍີນດີ ທີ່ໄດ້ກຳນົດເອົາປີ 2018 ເປັນປີແຫ່ງນະວັດຕະກໍາ ອາຊຽນ-ຈີນ ແລະ ການໃຫ້ຄໍາໜັ້ນສັນຍາຂອງປະເທດອີນເດຍ ທີ່ຈະເພີ່ມງົບປະມານເຂົ້າກອງທຶນພັດ ທະນາວິທະຍາສາດ ແລະ ເຕັກໂນໂລຊີ ອາຊຽນ-ອີນເດຍ ຈາກ 1 ລ້ານໂດລາສະຫະລັດ ເປັນ 5 ລ້ານໂດລາສະຫະລັດ, ກອງປະຊຸມໃນຄັ້ງນີ້ຍັງໄດ້ຮັບຮອງເອົາແຜນປະຕິບັດງານດ້ານວິທະຍາສາດ ແລະ ເຕັກໂນໂລຊີ ອາຊຽນ-ຣັດເຊຍ ແຕ່ປີ 2016-2025 ແລະ ​ເຫັນ​ດີສືບຕໍ່ຈັດຕັ້ງປະຕິບັດແຜນງານສົ່ງເສີມທຶນຄົ້ນຄ້ວາ ອາຊຽນ-ອາ ເມລິກາ.

ພິ​ເສດ ທ່ານ ຫຸມພັນ ອິນທະຣາດ ໄດ້ຮັບກຽດຂຶ້ນຕັດ​ແຖບ​ຜ້າ​​ຮ່ວມ​ກັບ ​ທ່ານ​ລັດຖະມົນຕີ ​ແລະ ​ຮອງ​ລັດ ຖະມົນຕີກະຊວງ​ສື​ກສາສະຫະພາບ​ມຽນມາ ໃນ​ພິທີເປີດງານວາງສະແດງ ອາທິດວິທະຍາສາດ, ເຕັກໂນໂລຊີ ແລະ ນະວັດຕະກຳຄັ້ງທີ 10 ຂອງບັນດາປະເທດສະມາຊິກອາຊຽນ.

 ຂ່າວ: ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.