Header Ads

ຍຶດນໍແຮດ ຊາວຈີນ ມູນຄ່າ 2 ແສນໂດລາ ທີ່ສະໜາມບິນວັດໄຕ


ເຈົ້າໜ້າທີ່ພາສີປະຈຳດ່ານພາສີສາກົນວັດໄຕຮ່ວມກັບເຈົ້າໜ້າທີ່ປ່າໄມ້, ປກສ, ໂດຍການເຂົ້າຮ່ວມຂອງທ່ານ ສົມພິດ ແສງມະນີວົງຮອງຫົວໜ້າກົມພາສີ ກະຊວງການເງິນ ໄດ້ຖະແຫຼງຜົນການຢຶດ ນໍແຮດ ທີ່ຊາວຈີນ 2 ຄົນ ນຳເຂົ້າມາສປປ ລາວ ໂດຍການຜ່ານສາຍການບິນ silkair ລວມນ້ຳ 11.10 ກິໂລກະຣາມ, ຄິດເປັນມູນຄ່າເບື້ອງຕົ້ນເກືອບ 2 ແສນໂດສະຫະລັດ ໃນວັນທີ 24 ຕຸລາ 2017 ນີ້ທີ່ສະໜາມບິນສາກົນວັດໄຕ.


ທ່ານ ບົວສອນ ໄຊຍະສຸກ ຫົວໜ້າດ່ານພາສີສາກົນສະໜາມບິນວັດໄຕກ່າວວ່າ: ໃນຕອນຄໍ່າຂອງວັນທີ 23 ຕຸລາ 2017ໄດ້ຮັບການລາຍງານວ່າຈະມີການລັກລອບນໍາເຂົ້າສິ່ງຂອງຜິດກົດໝາຍປະເພດ ນໍແຮດ ໂດຍຜ່ານສາຍການບິນ silkairline ຖ້ຽວບິນ MI 788 ເຊິ່ງຕົ້ນທາງມາຈາກສິງກະໂປໂດຍມີຈຸດໝາຍປາຍທາງທີ່ແຂວງຫລວງພະບາງໂດຍຜ່ານສະໜາມບິນສາກົນວັດໄຕ ດັ່ງນັ້ນ, ທາງເຈົ້າໜ້າທີ່ພາສີ ຈຶ່ງໄດ້ປະສານສົມທົບກັບບັນດາພາກສ່ວນກ່ຽວຂ້ອງຕິດຕາມຢ່າງໃກ້ຊິດພາຍຫລັງເຄື່ອງບິນມາຮອດສະໜາມບິນສາກົນວັດໄຕ, ຈິ່ງໄດ້ພົບຜູ້ຕ້ອງສົງໄສຈຳນວນ 2 ຄົນ (ສັນຊາດຈີນ) ຜ່ານການກວດກາ ແລະ ສືບສວນສອບສວນເບື້ອງຕົ້ນຜູ້ຕ້ອງຫາ ແລະ ໄດ້ທຳການກວດຄົ້ນກະເປົາພົບເຫັນສິ່ງຂອງຜິດກົດໝາຍປະເພດນໍແຮດ ຈຳນວນ 5 ຊິ້ນລວມນ້ຳໜັກ 11.10 ກິໂລກະຣາມ ແລະ ຈາກການປະເມີນມູນຄ່າເບື້ອງຕົ້ນຈາກອົງການສັດນ້ຳ-ສັດປ່າສາກົນ, ນໍແຮດດັ່ງກ່າວນີ້ມີມູນຄ່າ 1 ກິໂລເທົ່າກັບ 16.000 ໂດລາສະຫະລັດ, ຖ້າຄິດໄລ່ມູນຄ່າລວມທັງໝົດປະມານ 170.000 ໂດລາສະຫະລັດ.


ປັດຈຸບັນທາງເຈົ້າໜ້າພາສີສາກົນປະຈຳສະໜາມບິນວັດໄຕ ໄດ້ຢຶດຂອງກາງປະເພດ ນໍແຮດ ແລະ ກັກຕົວຜູ້ຕ້ອງຫາພ້ອມທັງໄດ້ມອບໃຫ້ເຈົ້າໜ້າທີ່ຕໍາຫລວດສິ່ງແວດລ້ອມ ກະຊວງ ປກສ ເພື່ອທຳການສືບສວນ-ສອບສວນຕາມວິຊາສະເພາະແລະລະບຽບການເພື່ອທໍາການສືບສວນ-ສອບສວນຫາຜູ້ຮ່ວມຂະບວນການມາດໍາເນີນຄະດີຕາມລະບຽບກົດໝາຍຕໍ່ໄປ.

ສ່ວນ ນໍແຮດ ທາງເຈົ້າໜ້າພາສີສາກົນສະໜາມບິນວັດໄຕໄດ້ຢຶດເປັນການຊົ່ວຄາວເພື່ອທຳການສືບສ່ວນສອບສ່ວນດຳເນີນຄະດີທາງພາສີ, ພາຍຫລັງສຳເລັດການດຳເນີນຄະດີທາງພາສີແລ້ວຈະໄດ້ມອບຂອງກາງຈຳນວນດັ່ງກ່າວໃຫ້ພາກສ່ວນກ່ຽວຂ້ອງດຳເນີນການໃນຂັ້ນຕອນຕໍ່ໄປຕາມລະບຽບກົດໝາຍ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.