Header Ads

ຮອງນາຍົກ ສືບຕໍ່ຊີ້ນຳຂະແໜງການເງິນ 4 ແຂວງພາກ ເໜືອ



ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ​ໄດ້​​ໃຫ້ກຽດເປັນ​ປະທານກອງປະຊຸມ ກ່ຽວກັບການຈັດຕັ້ງ ແລະ ການເຄື່ອນໄຫວຂອງຂະແໜງການເງິນ 4 ແຂວງພາກເໜືອ ມີ ແຂວງຫລວງພະບາງ, ໄຊຍະບູລີ, ຊຽງຂວາງ ແລະ ແຂວງຫົວພັນ ໃນລະ ຫວ່າງວັນທີ 11-12 ຕຸລາ 2017 ທີ່ຫ້ອງວ່າການປົກຄອງແຂວງຫລວງພະບາງ ເພື່ອເປັນການສືບຕໍ່ຈັດຕັ້ງຜັນຂະຫຍາຍ, ເຊື່ອມຊຶມເອກະສານສຳຄັນ ​ໂດຍ​ສະ​ເພາະ​ ໃນສາມຂະແໜງສາຍຕັ້ງ ພາສີ, ສ່ວຍສາອາກອນ ແລະ ຄັງເງິນແຫ່ງຊາດ,

ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ ກ່າວ​ວ່າ: ການ​ສຳ​ມະ​ນາ​ຄັ້ງ​ນີ້, ນອກຈາກໄດ້ສະ​ເໜີເອກະສານ ຈໍານວນ 4 ສະບັບ ກ່ຽວກັບການຈັດຕັ້ງ ແລະ ການເຄື່ອນໄຫວ ຂອງກະຊວງການເງິນ​ແລ້ວ, ພ້ອມທັງ​ໄດ້ຄົ້ນຄວ້າ ແລະ ປະກອບຄໍາຄິດເຫັນໃສ່ 3 ຮ່າງຂໍ້ຕົກລົງ ຂອງກະຊວງການເງິນ ຄື: ຮ່າງຄໍາແນະນໍາກ່ຽວກັບການແບ່ງຄວາມຮັບຜິດຊອບ, ກົນໄກການປະສານ ສົມທົບລະຫວ່າງກະຊວງການເງິນ ແລະ ອົງການປົກຄອງທ້ອງຖິ່ນ; ຮ່າງການຈັດຕັ້ງ ແລະ ການ ເຄື່ອນໄຫວຂອງພະແນກການເງິນແຂວງ ແລະ ນະຄອນຫລວງວຽງຈັນ; ຮ່າງການຈັດຕັ້ງ ແລະ ການເຄື່ອນໄຫວຂອງຫ້ອງການເງິນເມືອງ, ເທດສະບານ ​ແລະ ນະຄອນ. ເພື່ອຮັບຟັງຄວາມຄິດເຫັນ ຈາກ ຫລາຍພາກສ່ວນທີ່ກ່ຽວຂ້ອງ ເພື່ອເປັນບ່ອນອີງໃນການປັບປຸງບັນດານິຕິກໍາ ​ໃຫ້ເປັນເຄື່ອງມືທີ່ສໍາຄັນໃນການຄຸ້ມຄອງ ການປະຕິບັດແຜນງົບປະມານແຫ່ງລັດ ໃຫ້ມີປະສິດທິພາບ ຫລາຍກວ່າເກົ່າ.

ໂອກາດນີ້, ທ່ານ ສົມດີ ດວງດີ ໄດ້ມີຄຳເຫັນຕໍ່ກອງປະຊຸມວ່າ: ການສຳ​ມະ​ນາ​ຄັ້ງ​ນີ້, ແມ່ນມີຄວາມສຳຄັນທີ່ສຸດ ສຳລັບຂະແໜງການເງິນ, ເນື່ອງຈາກວ່າບັນດາພະແນກການທີ່ກ່ຽວຂ້ອງ ໄດ້ປະ ກອບຄຳຄິດຄຳເຫັນ ເພື່ອເປັນບ່ອນອີງ ໃນການປັບປຸງນິຕິກຳ ຂອງຂະແໜງການເງິນ ທີ່ເປັນເຄື່ອງມືສຳ ຄັນໃຫ້ແກ່ການຄຸ້ມຄອງວຽກງານການເງິນ, ງົບປະມານແຫ່ງລັດ,​ ການຈັດຕັ້ງແຜນງົບປະມານແຫ່ງ ລັດໃຫ້ມີປະສິດທິພາບ. ອີງຕາມການປັບປຸງກົດໝາຍສຳຄັນ ຈຳນວນໜຶ່ງເຊັ່ນ: ກົດໝາຍວ່າດ້ວຍລັດຖະບານ, ກົດໝາຍວ່າດ້ວຍການປົກຄອງທ້ອງຖິ່ນ, ກົດໝາຍວ່າດ້ວຍຂະແໜງການເງິນແລະຂະແໜງ ການອື່ນໆທີ່ກ່ຽວຂ້ອງ ​ເຊິ່ງຄະນະຮັບຜິດຊອບການປັບປຸງດັ່ງກ່າວ ຈະໄດ້ສັງລວມບັນດາຄວາມຄິດເຫັນ ເພື່ອຄົ້ນຄວ້າປັບ ປຸງສະເໜີ ຕໍ່ຂັ້ນເທິງພິຈາລະນາຮັບຮອງໃນການຈັດຕັ້ງປະຕິບັດ.

ຂ່າວໃຫ້ຮູ້ຕື່ມວ່າ: ໃນລະຫວ່າງວັນທີ 9-10 ຕຸລາ 2017 ທີ່ສະໂມສອນຫ້ອງວ່າການ ແຂວງ ຈໍາປາສັກ, ກະຊວງການເງິນ ໄດ້ຈັດກອງປະຊຸມກ່ຽວກັບການຈັດຕັ້ງ ແລະ ການເຄື່ອນໄຫວຂອງຂະແໜງການເງິນໃຫ້ 4 ແຂວງພາກໃຕ້ ມີ ແຂວງຈໍາປາສັກ, ສາລະວັນ, ເຊກອງ ແລະ ແຂວງອັດຕະປື ເພື່ອເຊື່ອມຊຶມເອກະສານທັງ 4 ສະບັບ ກ່ຽວກັບວຽກງານການຈັດຕັ້ງ ແລະ ການເຄື່ອນໄຫວຂອງກະຊວງການເງິນ ແລະ ສາມຂະແໜງ ສາຍຕັ້ງພາສີ, ສ່ວຍສາອາກອນ ແລະ ຄັງເງິນແຫ່ງຊາດ, ພ້ອມທັງຄົ້ນຄວ້າ ແລະ ປະກອບຄໍາຄິດເຫັນໃສ່ 3 ຮ່າງຂໍ້ຕົກລົງຂອງກະຊວງການເງິນ ທັງນີ້, ກໍເພື່ອໃຫ້ພະນັກງານ-ລັດຖະກອນຂະແໜງການເງິນທັງ 4 ແຂວງພາກໃຕ້ ມີຄວາມເຂົ້າໃຈໃນການຈັດຕັ້ງປະຕິບັດ ວຽກງານວິ ຊາສະເພາະຕົວ​ຈິງ. 

ຂ່າວ-ພາບ: ກະຊວງການເງິນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.