Header Ads

ຖວທ ເຊື່ອມຊຶມມະຕິກອງປະຊຸມຄົບຄະນະ ບໍລິຫານ ງານສູນກາງພັກ ຄັ້ງທີ 5 ສະໄໝທີ X




ອົງຄະນະພັກກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຈັດກອງປະຊຸມເຜີຍແຜ່ເຊື່ອມຊຶມ ມະຕິກອງປະຊຸມຄົບຄະນະ ຄັ້ງທີ 5 ຂອງຄະນະບໍລິຫານງານສູນກາງພັກສະໄໝທີ X ໃນວັນທີ 20 ຕຸລາ 2017, ໂດຍການເຜີຍແຜ່ຂອງ ສະຫາຍ ບໍ່ແສງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງ ຖວທ, ໂດຍມີ ຄະນະພັກກະຊວງ, ເລຂາ-ຮອງເລຂາໜ່ວຍພັກຫ້ອງການ, ກົມກອງອ້ອມຂ້າງກະຊວງ ເຂົ້າຮ່ວມ.




ສະຫາຍ ບໍ່ແສງຄຳ ວົງດາລາ ໄດ້ໃຫ້ຮູ້ວ່າ: ກອງປະຊຸມດັ່ງກ່າວ, ໄດ້ຈັດຂຶ້ນແຕ່ວັນທີ 11-21 ກັນຍາ 2017 ທີ່ນະຄອນຫລວງວຽງຈັນ, ພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນປະຕິວັດລາວ. ກອງປະຊຸມໄດ້ຮັບຟັງບົດລາຍງານຂອງຄະນະເລຂາທິການສູນກາງພັກ ກ່ຽວກັບການຕີລາຄາຜົນການຈັດຕັ້ງປະຕິບັດ ມະຕິກອງປະຊຸມສູນກາງພັກ ຄັ້ງທີ 4 ສະໄໝທີ X, ພ້ອມທັງຮັບຟັງລາຍງານ ເພີ່ມເຕີມຈາກລັດຖະບານ ແລະ ກະຊວງຈຳ ນວນໜຶ່ງ. ພິເສດ ກອງປະຊຸມຍັງໄດ້ຮັບຟັງລາຍງານສະເພາະ ກ່ຽວກັບການຕີລາຄາສະພາບການເຄື່ອນໄຫວນຳພາຂອງພັກ ໃນຂົງເຂດວຽກງານແນວຄິດ-ວັດທະນະທຳ ໃນໄລຍະຜ່ານມາ ແລະ ທິດທາງຕໍ່ໜ້າ.

ກອງປະຊຸມຄັ້ງນີ້, ໄດ້ຄົ້ນຄວ້າປຶກສາຫາລື ແລະ ຕົກລົງເປັນເອກະພາບ ຮັບຮອງເອົາບັນດາເນື້ອໃນຕົ້ນຕໍ ເປັນຕົ້ນແມ່ນ ຜົນການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມສູນກາງພັກ ຄົບຄະນະຄັ້ງທີ 4 ສະໄໝທີ X, ໝາກຜົນຂອງການຜັນຂະຫຍາຍ ແຕ່ລະຂົງເຂດວຽກງານ, ໂດຍສະເພາະແມ່ນຂົງເຂດເສດຖະກິດ ແມ່ນສາມາດບັນລຸການເຕີບໂຕ ຂອງລວມຍອດຜະລິດຕະພັນພາຍໃນລະບັນ 6,83% ແລະ ຫລາຍຕົວເລກຄາດໝາຍ ກໍປະຕິບັດໄດ້ຕາມແຜນ; ຂົງເຂດປ້ອງກັນຄວາມສະຫງົບ ແມ່ນສາມາດເຮັດໃຫ້ສະພາບການ ຢູ່ເຂດຫລໍ່ແຫລມເຂົ້າສູ່ສະພາບປົກກະຕິ, ສະກັດກັ້ນ ແລະ ທັບມ້າງການເຄື່ອນໄຫວມ້າງເພທຳລາຍ ຄວາມສະຫງົບໝັ້ນຄົງໃນສັງຄົມ ຂອງບັນດາອິດທິກຳລັງປໍລະປັກ ແລະ ກຸ່ມຄົນບໍ່ດີຢ່າງທັນການ, ບັນລຸຜົນສຳເລັດໃນການປາບປາມຢາເສບຕິດ ແລະ ອາຊະຍາກຳອື່ນໆຈຳນວນໜຶ່ງ; ການຊີ້ນຳຜັນຂະຫຍາຍແນວທາງ, ແຜນນະໂຍບາຍຂອງພັກ ໃນຂົງເຂດວັດທະນະທຳ-ສັງຄົມ ສືບຕໍ່ໄດ້ຮັບການເອົາໃຈໃສ່ຢ່າງຕໍ່ເນື່ອງ ແລະ ສາມາດບັນລຸໄດ້ຕາມເປົ້າໝາຍເປັນກ້າວໆ; ວຽກງານການຕ່າງປະເທດ ກໍໄດ້ມີການເຄື່ອນໄຫວຢ່າງແຂງແຮງ ສາມາດຊຸກຍູ້ໃຫ້ມີຂໍ້ຕົກລົງຮ່ວມມືສອງຝ່າຍ, ຫລາຍຝ່າຍ ແລະ ອື່ນໆ.


ກອງປະຊຸມຍັງໄດ້ກຳນົດທິດທາງແຜນການຕໍ່ໜ້າ ໃນແຕ່ລະຂົງເຂດວຽກງານ ແລະ ສືບຕໍ່ຜັນຂະຫຍາຍມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 4-5 ສະໄໝທີ X ໂດຍເອົາການເຄື່ອນໄຫວນີ້ ຕິດພັນກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ກໍຄືການກະກຽມ ເນື້ອໃນກອງປະຊຸມຄົບຄະນະ ຄັ້ງທີ 6 ຂອງຄະນະບໍລິຫານງານສູນກາງພັກສະໄໝທີ X ແລະ ອື່ນໆ.


ພາບ ແລະ ຂ່າວ : ຂປລ 


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.