Header Ads

ກວຕ ສະຫລຸບຜົນງານການເຄື່ອນໄຫວວຽກງານ ຂອງກະຊວງໃນໄລຍະ 5 ປີ



ໃນ​ວັນ​ທີ 12 ຕຸລາ 2017 ທີ່​ຫໍ​ປະຊຸມ​ແຫ່ງ​ຊາດ, ກະຊວງ​ວິ​ທະຍາ​ສາດ ​ແລະ ​ເຕັກ​ໂນ​ໂລ​ຊີ (ກວຕ) ໄດ້​ຈັດ​ພິທີສະຫລຸບ​ຜົນງານການເຄື່ອນໄຫວ ວຽກງານຂອງກະຊວງໃນໄລຍະ 5 ປີ ຜ່ານມາ (2011-2015) ​ແລະ ກຳນົດແຜນງານການເຄື່ອນໄຫວ 5 ປີ ຕໍ່ໜ້າ, ໂດຍ​ການ​​ເຂົ້າ​ຮ່ວມ​ຂອງ​ທ່ານ ສອນ​ໄຊ​ ສີ​ພັນ​ດອນ ຮອງ​ນາ​ຍົກ​ລັດຖະມົນຕີ, ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ມີບັນດາພະນັກງານພາຍໃນກະຊວງ ເຂົ້າຮ່ວມ.




ທ່ານ ບໍ່ວຽງຄຳ ວົງດາລາ ກ່າວວ່າ: ໃນໄລຍະ 5 ປີ ຜ່ານມາ ເປັນໄລຍະແຫ່ງການປັບປຸງປ່ຽນແປງຢ່າງໃຫຍ່ຫລວງຮອບດ້ານ ແບບກ້າວກະໂດດ ແລະ ລັກສະນະບຸກທະລຸ ໃນຂະແໜງວິທະຍາສາດ ແລະ ເຕັກໂນໂລຊີຂອງປະເທດເຮົາ ແລະ ເປັນໄລຍະການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IX ຂອງ​ພັກ, ​ແຜນ​ພັດທະນາ​ເສດຖະກິດ​ສັງຄົມ ຄັ້ງ​ທີ VII, ຊຶ່ງ​ປັດຈຸ​ບັນ​ນີ້ ​ກວຕ ​ໄດ້​ຄົ້ນຄວ້າ ​ແລະ ປັບປຸງ ກົດໝາຍ​ໄດ້ 8 ສະບັບ, ນິຕິ​ກຳ​ລຸ່ມ​ກົດໝາຍອີກ​ຈຳນວນ​ໜຶ່ງ ​ແລະ ​ໄດ້​ສ້າງ​ແຜນ​ຍຸດ​ທະ​ສາດ ​ການ​ພັດທະນາ​ວິທະຍາສາດ ​ແລະ ​ເຕັກ​ໂນ​ໂລ​ຊີ​ເຖິງ​ປີ 2030, ຊຶ່ງ​ເປັນ​ແຜນ​ຍຸດ​ທະ​ສາດ​ການ​ພັດທະນາ ທີ່​ສາມາດ​ເຊື່ອມ​ສານ ກັບ​ການ​ພັດທະນາຂອງ​ບັນດາ​ກະຊວງ, ຂະ​ແໜງ​ການ​ກໍ​ຄື​ພາກ​ພື້ນ ​ແລະ ສາກົນ ​ໃນ​ໄລຍະ​ໃໝ່​ແຫ່ງ​ການ​ພັດທະນາ​ແບບ​ຍືນ​ຍົງ.

ທ່ານ ບໍ່ວຽງຄຳ ວົງດາລາ ກ່າວ​ຕື່ມ​ວ່າ: ດ້ານ​ວຽກ​ງານການ​ພົວພັນ ຮ່ວມ​ມືທາງ​ດ້ານວິທະຍາ ສາດ ​ແລະ ​ເຕັກ​ໂນ​ໂລ​ຊີ​ ກັບ​ຕ່າງປະ​ເທດ ໄດ້​ມີ​ການ​ຂະຫຍາຍຕົວ​ຢ່າງ​ກວ້າງຂວາງ​ ເປັນ​ຕົ້ນ​ແມ່ນ ການ​ຮ່ວມ​ມື​ສອງ​ຝ່າຍ​ກັບ ສສ ຫວຽດນາມ, ສປ ຈີນ, ​ໄທ, ຍີ່ປຸ່ນ, ກຳປູ​ເຈຍ ​ແລະ ມາ​ເລ​ເຊຍ. ນອກຈາກ​ນີ້​, ຍັງ​ມີ​ການ​ຮ່ວມ​ມື​ຫລາຍ​ຝ່າຍ​ ໃນ​ກອບ​ອາ​ຊຽນ, ອົງການ​ຄົ້ນຄວ້າ-ພັດທະນາ​ວິທະຍາສາດ ​ ຂອງ​ພາກ​ພື້ນ​ອາຊີ, UNESCO, IAEA, ISO, WIPO, FAO, APCTT ​ແລະ ອົງການ​ຈັດ​ຕັ້ງ​ອື່ນໆ. ຄຽງ​ຄູ່​ກັບ​ຜົນງານດັ່ງກ່າວ, ຂະ​ແໜງວິທະຍາສາດ ​ແລະ ​ເຕັກ​ໂນ​ໂລ​ຊີ​ ​ຍັງ​ມີ​ບັນຫາ​ຄົງ​ຄ້າງ ​ແລະ ທ້າ​ທາຍ​ຈຳນວນ​ໜຶ່ງ ທີ່​ຈະ​ຕ້ອງ​ໄດ້​ແກ້​ໄຂ​ຜ່ານ​ຜ່າ ​ເປັນ​ຕົ້ນ​ການ​ປັບປຸງ​ການ​ຈັດ​ຕັ້ງ ​ແລະ ພັດ ທະນາ​ບຸກຄະລາ​ກອນ​ໃຫ້​​ເຂັ້ມ​ແຂງ, ສືບ​ຕໍ່​ນຳ​ໃຊ້​ ເຕັກ​ໂນ​ໂລ​ຊີ​ທີ່​ທັນ​ສະ​ໄໝ​ ເຂົ້າ​ໃນ​ການ​ຜະລິດ​ສິນຄ້າ ​ແລະ ຫັນ​ເປັນ​ທັນ​ສະ​ໄໝ​ຢູ່​ໃນ​ປະ​ເທດ​ເຮົາ.

​ໃນ​​ໂອກາດ​ດຽວ​ກັນ, ກໍ​ໄດ້​ມີ​ພິທີ​ປະດັບ​ຫລຽນ​ໄຊ​ແຮງ​ງານ,​ ຫລຽນ​ກາ​ແຮງ​ງານ ແລະ ​ໃບ​ຍ້ອງຍໍ​ ໃຫ້​ແກ່​ບັນດາພະນັກ​ງານ​ຜູ້​ທີ່​ມີ​ຜົນງານ​ດີ​ເດັ່ນ ​ແລະ ຫ້າວຫັນ​ຕໍ່​ວຽກ​ງານ ມີ ຫລຽນ​ໄຊແຮງ​ງານຊັ້ນ I ຈຳນວນ 13 ທ່ານ ​ແລະ 1 ກົມ, ຫລຽນ​ໄຊ ​ແຮງ​ງານຊັ້ນ II ຈຳນວນ 28 ທ່ານ ​ແລະ 4 ກົມ, ຫລຽນ​ໄຊ ​ແຮງ​ງານຊັ້ນ III ຈຳນວນ 26 ທ່ານ ​ແລະ 4 ກົມ, ຫລຽນ​ກາ​ແຮງ​ງານຈຳນວນ 33 ທ່ານ ​ແລະ 3 ກົມ​ກອງ, ໃບ​ຍ້ອງຍໍ​ຂັ້ນ​ລັດຖະບານ ຈຳນວນ 39 ທ່ານ ​ແລະ 1 ກົມ​ກອງ.

ຂ່າວ: ມະນີ​ທອນ, ພາບ: ສະຫວາດ (ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.