Header Ads

ບໍລິຄຳໄຊ ມີພາຫະນະນຳເຂົ້າບໍ່ຖືກຕ້ອງ 600 ກວ່າຄັນ ປັດຈຸບັນແກ້ໄຂແລ້ວ 127 ຄັນ



ຕາມການລາຍງານຂອງ ກະຊວງການເງິນ ວ່າ : ການແກ້ໄຂບັນຫາພະຫະນະນຳເຂົ້າບໍ່ຖືກຕ້ອງຕາມກົດໝາຍຢູ່ແຂວງບໍລິຄຳໄຊກຳລັງດຳເນີນໄປຢ່າງເຂັ້ມງວດ,ປັດຈຸບັນທົ່ວແຂວງມີພາຫະນະທີ່ກອງກວດກາພາສີແຂວງຂຶ້ນບັນຊີໄວ້ທັງໝົດ 611 ຄັນ ໃນນັ້ນ, ລົດໃຫຍ່ 174 ຄັນ, ລົດຈັກ 473 ຄັນ, ຜ່ານການຈັດຕັ້ງປະຕິບັດວຽກງານຕົວຈິງການແກ້ໄຂຈໍານວນລົດດັ່ງກ່າວສໍາເລັດແລ້ວ 127 ຄັນ, ລົດໃຫຍ່ 18 ຄັນ, ລົດຈັກ 109 ຄັນ, ສາມາດເກັບລາຍຮັບເຂົ້າງົບປະມານແຫ່ງລັດໄດ້ແລ້ວ 10 ຕື້ກວ່າກີບ, ຖ້າທຽບໃສ່ແຜນປີປະຕິບັດໄດ້ 143,48%.
ທ່ານ ຄຳໂກ້ ເກັ່ງວົງພັງ ຫົວໜ້າກອງກວດກາພາສີ ແຂວງບໍລິຄຳໄຊ ໃຫ້ສຳພາດຕໍ່ທິມຂ່າວການເງິນວ່າ: ສະພາບໂດຍລວມການຈັດຕັ້ງປະຕິບັດວຽກງານວິຊາສະເພາະຢູ່ກອງກວດກາພາສີເຫັນວ່າສຳເລັດໂດຍພື້ນຖານຕາມການມອບໝາຍ, ປັດຈຸບັນກອງກວດກາພາສີແຂວງບໍລິຄຳໄຊ ມີພະນັກງານທັງໝົດ 12 ສະຫາຍ, ຍິງ 2 ສະຫາຍ, ການຈັດຕັ້ງປະຕິບັດວຽກງານໄດ້ແບ່ງອອກເປັນ 2 ຈຸງານຄື: 1 ຈຸງານປະຕິບັດໜ້າທີ່ວິຊາສະເພາະ 2 ຈຸງານປະສານສົມທົບກັບອົງການປົກຄອງທ້ອງຖິ່ນ, ແບ່ງອອກເປັນ 2 ຈຸດເຮັດວຽກຄື: 1 ຈຸດກວດກາພາສີປາກຊັນ (ຫ້ອງການກວດກາພາສີແຂວງບໍລິຄຳໄຊ)2 ຈຸດປະສານງານກວດກາພາສີທາງແບ່ງວຽງຄຳ (4 ແຍກໄປຫລັກຊາວ) ແລະ ໃນປີ 2017 ກອງກວດກາພາສີໄດ້ຮັບຕົວເລກມອບໝາຍໃຫ້ຈັດເກັບລາຍຮັບທັງໝົດ 7 ຕື້ກີບ.

ທ່ານ ຫົວໜ້າກອງກວດກາພາສີ ແຂວງບໍລິຄຳໄຊ ເປີດເຜີຍຕື່ມອີກວ່າ: ສຳການແກ້ໄຂບັນຫາການນໍາເຂົ້າລົດບໍ່ຖືກຕ້ອງຂອງແຂວງບໍລິຄຳໄຊ ເຊິ່ງພາຍຫລັງທີ່ໄດ້ຮັບແຈ້ງການຂອງຫ້ອງການສໍານັກງານາຍົກລັດຖະມົນຕີ ສະບັບເລກທີ 142/ຫສນຍ.ກລຂ ລົງວັນທີ 25 ມັງກອນ 2017 ວ່າດ້ວຍການແກ້ໄຂລົດນຳເຂົ້າບໍ່ຖືກຕ້ອງໃນຂອບເຂດທົ່ວປະເທດ ແລະ ແຈ້ງການເພີ່ມເຕີມ ສະບັບເລກທີ 2269/ກງ ແລະ ແຈ້ງການແນະນຳ ສະບັບເລກທີ 0095/ກງ ວ່າດ້ວຍການແກ້ລົດນຳເຂົ້າບໍ່ຖືກຕ້ອງທາງແຂວງກໍ່ໄດ້ຮີບຮ້ອນໃນການແຕ່ງຕັ້ງຄະນະຮັບຜິດຊອບໃນການແກ້ໄຂພາຫະນະບໍ່ຖືກຕ້ອງຂັ້ນແຂວງໂດຍແມ່ນທ່ານຮອງເຈົ້າແຂວງເປັນຫົວໜ້າຄະນະ, ມີພະນັກງານຂະແໜງການກ່ຽວຂ້ອງເປັນຄະນະ ແລະ ໄດ້ເຮັດແຈ້ງການໃຫ້ເຈົ້າຂອງພາຫະນະທີ່ນໍາລົດເຂົ້າບໍ່ຖືກຕ້ອງເຂົ້າມາຂຶ້ນບັນຊີເຮັດບົດບັນທຶກປົດປ້າຍ ແລະ ໃຫ້ມາເສຍພາສີຕາມລະບຽບການ.

ມາຮອດປັດຈຸບັນ ການແກ້ໄຂບັນຫາພາຫະນະນຳເຂົ້າບໍ່ຖືກຕ້ອງຕາມກົດໝາຍຢູ່ແຂວງບໍລິຄໍາໄຊ, ເຊິ່ງກອງກວດກາພາສີແຂວງຂຶ້ນບັນຊີໄວ້ທັງໝົດ 611 ຄັນ ໃນນັ້ນ, ເປັນລົດໃຫຍ່ 174 ຄັນ, ລົດຈັກ 473 ຄັນ, ມາດຮອດປັດຈຸບັນການແກ້ໄຂຈໍານວນລົດດັ່ງກ່າວສໍາເລັດແລ້ວ 127 ຄັນ, ຍັງບໍ່ທັນແກ້ໄຂຈຳນວນ 484 ຄັນ, ແກ້ໄຂລົດໃຫຍ່ 18 ຄັນ, ຍັງບໍ່ໄດ້ແກ້ໄຂ 156 ຄັນ ແລະ ໄດ້ແກ້ໄຂລົດຈັກແລ້ວ 109 ຄັນ, ຍັງບໍ່ທັນແກ້ໄຂຈໍານວນ 328 ຄັນ, ສ່ວນການຈັດເກັບລາຍຮັບເຂົ້າງົບປະມານແຫ່ງລັດພຽງ 9 ເດືອນ, ສາມາດເກັບລາຍຮັບໄດ້ທັງໝົດ 10 ຕື້ກວ່າກີບ, ຖ້າທຽບໃສ່ແຜນການປີປະຕິບັດໄດ້ 143,48% ລື່ນແຜນການ 43,48%, ສົມທຽບໃສ່ໄລຍະດຽວກັນ 09 ເດືອນຂອງສົກປີຜ່ານມາປະຕິບັດໄດ້ 6 ຕື້ກວ່າກີບ, ເທົ່າກັບ 166,67% ເພີ່ມຂຶ້ນ 66,67%.

ທັງນີ້, ສາເຫດການເກັບລາຍຮັບເພີ່ມຂຶ້ນຍ້ອນການແກ້ໄຂພາຫະນະນຳເຂົ້າບໍ່ຖືກຕ້ອງຂອງພໍ່ແມ່ປະຊາຊົນ,ພະນັກງານລັດຈຳນວນໜຶ່ງ, ການເສຍພາສີປ່ຽນກຳມະສິດການນຳໃຊ້ພາຫະນະບໍ່ຖືກເປົ້າໝາຍ, ກວດກາຈັບກຸມສິນຄ້າລັກລອບໜີພາສີ, ການເຄື່ອນຍ້າຍສິນຄ້າບໍ່ມີເອກະສານຕິດຕາມຈາກຂະໜງການກ່ຽວຂ້ອງ ແລະ ອື່ນໆ.

ຂ່າວ-ພາບ: ກະຊວງການເງິນ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.