Header Ads

ສະຖານທູດລາວ ທີ່ໂຕກຽວ ສະເຫຼີມສະຫຼອງວັນການທູດລາວ ຄົບຮອບ 72 ປີ



ໃນທ່າມກາງບັນຍາກາດທີ່ພະນັກງານ, ນັກການທູດໃນຂະແໜງການຕ່າງປະເທດ ທັງພາຍໃນ ແລະ ຕ່າງປະເທດ ພວມເບີກບານ, ມ່ວນຊື່ນຈັດກິດຈະກໍາສະເຫຼີມສະຫຼອງ ຄົບຮອບ 72 ປີ ວັນການທູດລາວ (ວັນທີ 12 ຕຸລາ 1945 - 12 ຕຸລາ 2017), ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາປະເທດຍີ່ປຸ່ນ ໄດ້ຈັດຕັ້ງການສະເຫຼີມສະຫຼອງ ແລະ ປາຖະກະຖາ ເພື່ອຫວນຄືນມູນເຊື້ອ 72 ປີ ວັນການທູດລາວ ໃນຕອນເຊົ້າຂອງວັນທີ 12 ຕຸລາ 2017, ທີ່ສໍານັກງານສະຖານທູດ ທີ່ໂຕກຽວ ໂດຍເປັນກຽດຂຶ້ນບັນຍາຍຂອງ ທ່ານ ວິໂຣດ ສຸນດາຣາ, ເອກອັກຄະລັດຖະທູດ ແຫ່ງ ສປປ ລາວ ປະຈໍາປະເທດຍີ່ປຸ່ນ ທີ່ມີການເຂົ້າຮ່ວມຂອງບັນດາພະນັກງານສະຖານທູດລາວທຸກທ່ານ.




ໃນພິທີປາຖະກະຖາ, ທ່ານທູດ ວິໂຣດ ສຸນດາຣາ ໄດ້ຍົກໃຫ້ເຫັນເຖິງປະຫວັດຄວາມເປັນມາ, ມູນເຊື້ອການກໍາເນີດ ແລະ ຄວາມໝາຍຄວາມສໍາຄັນຂອງວັນການທູດລາວ ທີ່ຖືເອົາ ວັນປະກາດເອກະລາດ ເທື່ອທໍາອິດຂອງປະເທດລາວ ວັນທີ 12 ຕຸລາ 1945 ທີ່ເປັນເຫດການເຄື່ອນໄຫວທາງດ້ານການທູດທີ່ສໍາຄັນ ເປັນວັນການທູດລາວຢ່າງເປັນທາງການ. ການຕໍ່ສູ້ທາງດ້ານການຕ່າງປະເທດ ກໍ່ຄືການເຄື່ອນໄຫວດ້ານການທູດຂອງບັນດາທ່ານຜູ້ນໍາພັກ ແລະ ລັດ ໃນໄລຍະສະໄໝແຫ່ງການຕໍ່ສູ້ກູ້ຊາດຢ່າງລະອິດລະອ້ຽວ ຈົນຮອດໄລຍະການປົກປັກ ຮັກສາ ແລະ ສ້າງສາພັດທະນາປະເທດຊາດ ໄດ້ເປັນການປະກອບສ່ວນອັນສໍາຄັນຄຽງບ່າຄຽງໄຫຼ່ກັບການຕໍ່ສູ້ທາງດ້ານການທະຫານ ແລະ ການຕໍ່ສູ້ທາງດ້ານການເມືອງ; ທາງດ້ານການຕ່າງປະເທດ ໄດ້ສືບຕໍ່ມີການເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບເປັນກ້າວໆມາ ທີ່ເປັນການຢັ້ງຢືນເຖິງມູນເຊື້ອຄວາມເຂັ້ມແຂງ ແລະ ການຕໍ່ສູ້ບໍ່ຍອມຈໍານົນຂອງຊາດລາວ ເຊິ່ງມູນເຊື້ອດັ່ງກ່າວ ໄດ້ສືບທອດມາເຖິງລູກຫຼານລາວ ແລະ ປະເທດລາວໃນແຕ່ລະຍຸກສະໄໝ ໂດຍພາຍໃຕ້ການນໍາພາຂອງພັກປະຊາຊົນປະຕິວັດລາວ. ທ່ານທູດ ວິໂຣດ ສຸນດາຣາ ຍັງໄດ້ເໜັ້ນໜັກເຖິງຜົນສໍາເລັດ ແລະ ຜົນງານຕ່າງໆຂອງເຄື່ອນໄຫວວຽກງານການທູດກໍ່ຄືຂະແໜງ ການຕ່າງປະເທດ ທີ່ເປັນການປະກອບສ່ວນອັນສໍາຄັນ ເຂົ້າໃນວຽກງານລວມຂອງຊາດ ດ້ວຍການຍົກສູງຖານະບົດບາດຂອງ ສປປ ລາວ ໃນເວທີສາກົນ ແລະ ພາກພື້ນ ໃຫ້ນັບມື້ນັບດີເດັ່ນ, ເຮັດໃຫ້ ສປປ ລາວ ໄດ້ຮັບຄວາມເຊື່ອໝັ້ນຈາກສາກົນ ແລະ ບັນດາປະເທດໃນພາກພື້ນ. ຜົນສໍາເລັດຂອງວຽກງານການທູດທີ່ກ່າວມານັ້ນ ກໍ່ຍ້ອນມີແນວທາງນະໂຍບາຍການຕ່າງປະເທດທີ່ສະຫຼາດສ່ອງໃສ, ຖືກຕ້ອງ ແລະ ສອດຄ່ອງກັບຍຸກສະໄໝ ແລະ ກາລະໂອກາດ.

ນອກນັ້ນ, ໃນຕອນທ້າຍຂອງການປາຖະກະຖາ, ທ່ານທູດ ຍັງໄດ້ຍົກໃຫ້ເຫັນສິ່ງທ້າທາຍ ແລະ ກາລະໂອກາດຂອງວຽກງານການພົວພັນຕ່າງປະເທດ ໃນສະພາບການທີ່ພາກພື້ນ ແລະ ສາກົນພວມມີການຜັນປ່ຽນຢ່າງເລິກເຊິ່ງ, ສະຫຼັບຊັບຊ້ອນ ແລະ ສັບສົນ ໂດຍສະເພາະຍັງມີອິດທິກໍາລັງປໍລະປັກທີ່ຍັງສືບຕໍ່ນໍາໃຊ້ນະໂຍບາຍຫັນປ່ຽນໂດຍສັນຕິເຂົ້າໃນຫຼາຍພາກພື້ນຂອງໂລກ ລວມທັງ ສປປ ລາວເຮົາ ເຊິ່ງບັນດາສິ່ງທ້າທາຍດັ່ງກ່າວ ໄດ້ຮຽກຮ້ອງໃຫ້ຂະແໜງການຕ່າງປະເທດຕ້ອງສືບຕໍ່ບຸກບືນຂຶ້ນຢ່າງແຂງແຮງກວ່າເກົ່າຕາມແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກເຮົາ ໂດຍທ່ານທູດໄດ້ແນະນໍາໃຫ້ແກ່ພະນັກງານ ແລະ ນັກການທູດລຸ້ນໜຸ່ມນ້ອຍ ຈົ່ງໄດ້ຮໍ່າຮຽນເອົາແບບຢ່າງນັການທູດທີ່ດີເດັ່ນ ເຊັ່ນ ປະທານ ໄກສອນ ພົມວິຫານ ແລະ ປະທານ ສຸພານຸວົງ ກໍ່ຄືແບບຢ່າງຂອງການເຄື່ອນໄຫວການທູດທີ່ສະຫຼາດສ່ອງໄສ ແລະ ດີເດັ່ນຂອງບັນດາທ່ານຜູ້ນໍາພັກ-ລັດລຸ້ນກ່ອນໆ ເພື່ອເສີມຂະຫຍາຍມູນເຊື້ອອັນດີງາມດັ່ງກ່າວ ໃນພາລະກິດການທູດສະໄໝໃໝ່ທີ່ຍັງມີສິ່ງທ້າທາຍນາໆປະການ ພ້ອມທັງຝາກຄະຕິເຕືອນໃຈຂອງທ່ານນາຍົກລັດຖະມົນຕີ ທອງລຸນ ສີສຸລິດ ທີ່ໄດ້ກ່າວໄວ້ສໍາລັບນັກການທູດລາວວ່າ ໃຫ້ມີຄວາມເຂັ້ມແຂງທາງດ້ານຈິດໃຈ, ໃຫ້ມີພິກໄຫວທາງການກະທໍາ, ໃຫ້ເປັນແກນນໍາທາງໜ້າທີ່ ແລະ ໃຫ້ມີຄວາມໂອບເອື້ອອາລີທາງວາຈາສິນ; ພ້ອມທັງຮຽກຮ້ອງໃຫ້ເອົາໃຈໃສ່ ຈັດຕັ້ງປະຕິບັດເນື້ອໃນກອງປະຊຸມວຽກງານການຕ່າງປະເທດຄັ້ງທີ 13 ຕາມຄໍາຂວັນ: ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ, ລົງເລິກຍົກສູງຄວາມສາມາດ, ລັກສະນະນໍາພາ ແລະ ຄວາມເປັນເຈົ້າການຂອງພະນັກງານໃນຂະແໜງການຕ່າງປະເທດຕໍ່ການປະຕິບັດແນວທາງນະໂຍບາຍການຕ່າງປະເທດ.

ການປາຖະກະຖາດັ່ງກ່າວ ເຕັມໄປດ້ວຍຄວາມໝາຍເລິກເຊິ່ງທາງດ້ານເນື້ອໃນ ໂດຍໃນຕອນບ່າຍຂອງວັນດຽວກັນ, ສະຖານທູດ ຍັງໄດ້ຈັດກິດຈະກໍາແຂ່ງຂັນກິລາສາມັກຄີມິດ ຕະພາບພາຍໃນລະຫວ່າງພະນັກງານສະຖານທູດດ້ວຍກັນ ຢ່າງເບີກບານມ່ວນຊື່ນ, ຟົດຟື້ນ ແລະ ເຕັມໄປດ້ວຍໄມຕີຈິດມິດຕະພາບ ເຊິ່ງເຮັດໃຫ້ການສະເຫຼີມສະຫຼອງວັນການທູດລາວ ທີ່ສະຖານທູດລາວ ທີ່ໂຕກຽວໃນປີນີ້ສໍາເລັດລົງດ້ວຍຜົນສໍາເລັດອັນຈົບງາມ.

ພາບ ແລະ ຂ່າວ: ກະຊວງການຕ່າງປະເທດ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.