Header Ads

ລັດຖະບານລາວຕັດສິນໃຈຊື້ຮຸ້ນບີລາຍ 78% ມູນຄ່າ 22 ລ້ານໂດລາເດິນໜ້າພັດທະນາການບໍລິການດ້ານໂທລະຄົມມະນາຄົມ



ນະຄອນຫຼວງວຽງຈັນ : ລັດຖະບານລາວຕັດສິນໃຈເຂົ້າໄປຊື້ຮຸ້ນບີລາຍ 78% ມູນຄ່າ 22 ລ້ານໂດລາພັດທະນາການບໍລິການດ້ານໂທລະຄົມມະນາຄົມ ພາຍຫລັງບໍລິສັດດັ່ງກ່າວພວມປະເຊີນໜ້າສິ່ງທ້າທາຍກັບຄູ່ແຂ່ງຍັກໃຫຍ່ເຊັ່ນ: ລາວໂທລະຄົມ, ໂທລະຄົມລາວ ແລະ ຢູນິເທວ ເຊິ່ງອາດເປັນຕົ້ນເຫດເຮັດການດໍາເນີນທຸລະກິດກະຕຸກກະຕັກ ຫລື ຂາດສະພາບຄ່ອງ.



ຫລ້າສຸດໃນວັນທີ 27 ຕູລາ 2017 ທີ່ໂຮງແຮມຄຣາວພາຊານະຄອນຫລວງວຽງຈັນ ໄດ້ລົງສັນຍາຊື້-ຂາຍຮຸ້ນລະຫວ່າງລັດຖະບານແຫ່ງສປປລາວກັບບໍລິສັດວິມເປວຄອມລາວຈຳກັດ, ໂດຍທ່ານສີລາວຽງແກ້ວຮອງລັດຖະມົນຕີກະຊວງການເງິນຕາງໜ້າລັດຖະບານກັບທ່ານລິຊາເຈມ (RICHARD JAMES) ອຳນວຍການກຸ່ມການເງິນບໍລິສັດວິມເປວຄອມລາວຈຳກັດ, ໂດຍການເຂົ້າຮ່ວມເປັນສັກຂີພິຍານຂອງທ່ານນາງທິບພະກອນຈັນທະວົງສາຮອງລັດຖະມົນຕີກະຊວງການເງິນ, ມີຮອງລັດຖະມົນຕີ, ຫົວກົມ ຮອງກົມ, ຫົວໜ້າພະແນກແລະບັນດາແຂກທີ່ຖືກເຊີນເຂົ້າຮ່ວມ.



ທ່ານພູຂົງຈິດຮູບໂລກຫົວໜ້າກົມແຜນການແລະການຮ່ວມມືກະຊວງໄປສະນີ, ໂທລະຄົມມະນາຄົມແລະການສື່ສານໄດ້ລາຍງານວ່າ: ໂດຍປະຕິບັດຕາມກົດໝາຍວ່າດ້ວຍວິສາຫະກິດແລະລະບຽບການຕ່າງໆຂອງສປປລາວຂາຮຸ້ນຝ່າຍຕ່າງປະເທດກໍ່ຄືບໍລິສັດ ວິມເປວຄອມ ໂຮນດິ່ງ ລາວບີວີ ໃນກິດຈະການບໍລິສັດ ວິມເປວຄອມລາວ ຈຳກັດ ໄດ້ສະເໜີຂາຍຮຸ້ນທີ່ຕົນເອງຖືຮຸ້ນ 78% ໃຫ້ລັດຖະບານແຫ່ງສປປ ລາວ ໃນນາມຄູ່ຮວມທຶນເປັນບູລິມະສິດທຳອິດ, ລັດຖະບານຕັດສິນໃຈຊື້ຮຸ້ນດັ່ງກ່າວໂດຍມີກະຊວງການເງິນເປັນເຈົ້າການສົມທົບກັບບັນດາກະຊວງທີ່ກ່ຽວຂ້ອງແລະເຈລະຈາກັບນັກລົງທຶນສະຫະພັນຣັດເຊຍເພື່ອສະເໜີຂໍຊື້ຮຸ້ນຝ່າຍຕ່າງປະເທດກໍ່ຄືບໍລິສັດ ວິມເປວຄອມ ໂຮນດິ່ງ ລາວບີວີ ໃນກິດຈະການບໍລິສັດ ວິມເປວຄອມລາວ ຈຳກັດ78%ໃນລາຄາການຊື້-ຂາຍຮຸ້ນແມ່ນ 22 ລ້ານໂດລາສະຫະລັດແລະພາຍໃຕ້ເງື່ອນໄຂບໍລິສັດ ບໍ່ມີໜີ້ສິນ ແລະ ການຊຳລະແບ່ງອອກເປັນ 02 ງວດຄື: ງວດທຳອິດຊຳລະ 13 ລ້ານໂດລາສະຫະລັດພາຍໃນ 60 ວັນນັບແຕ່ມື້ເຊັນສັນຍາແລະງວດທີສອງຈຳນວນ 9 ລ້ານໂດລາສະຫະລັດກຳນົດ 120 ວັນແລະ ໃນອີກສອງສາມເດືອນຂ້າງໜ້າພາຍຫລັງຊໍາເງິນທັງສອງງວດສຳເລັດໃຫ້ແກ່ຜູ້ຂາຍຮຸ້ນກໍ່ຄືບໍລິສັດ ວິມເປວຄອມ ໂຮນດິ່ງ ລາວບີວີ ໃນກິດຈະການບໍລິສັດ ວິມເປວຄອມລາວ ຈຳກັດ ລັດຖະບານກໍ່ຄືກະຊວງການເງິນຈະເຂົ້າໄປບໍລິຫານ ທັງນີ້, ກໍ່ເພື່ອພັດທະນາການບໍລິການດ້ານໂທລະຄົມມະນາຄົມໃຫ້ແກ່ປະຊາຊົນບັນດາເຜົ່າຢ່າງເຕັມຮູບແບບ.

ທ່ານພູຂົງຈິດຮູບໂລກຫົວໜ້າກົມແຜນການແລະການຮ່ວມມືກະຊວງໄປສະນີ, ໂທລະຄົມມະນາຄົມແລະການສື່ສານ ກ່າວຕື່ມວ່າ: ໃນໄລຍະຜ່ານມາລັດຖະບານໄດ້ເປີດໂອກາດໃຫ້ນັກລົງທຶນທີ່ບໍລິການທາງດ້ານໂທລະຄົມມະນາຄົມເຂົ້າມາລົງທຶນໃນສປປລາວນັບມື້ນັບເຕີບໃຫຍ່ແລະເຂັ້ມແຂງທາງດ້ານຄຸນນະພາບເຕັກນິກ, ເຕັກໂນໂລຢີແລະດ້ານການບໍລິການເຊິ່ງສາມາດທຽມເທົ່າກັບສາກົນໄດ້ເຊັ່ນ: ການບໍລິການລະບົບໂທລະສັບມືຖືໃນປະຈຸບັນສປປລາວສາມາດໃຫ້ບໍລິການນັບແຕ່ລຸ້ນ 2,5G ຈົນເຖິງ 4G ຂອງບັນດາ 4 ບໍລິສັດຜູ້ໃຫ້ບໍລິການດ້ານໂທລະຄົມມະນາຄົມໃນລາວ, ເຊິ່ງໃນນັ້ນກໍ່ມີບໍລິສັດວິມເປວຄອມລາວຈຳກັດທີ່ສ້າງຂຶ້ນກ່ອນໜ້ານີ້ແລະຮູ້ກັນດີໃນນາມຂອງບໍລິສັດມິລິຄອມລາວ (Tigo) ທີ່ໃຫ້ບໍລິການກ່ຽວກັບການສື່ສານໂທລະສັບມືຖືແລະອິນເຕີເນັດໃນສປປລາວໂດຍລັດຖະບານລາວຖຶຮຸ້ນ 22% ແລະບໍລິສັດວິມເປວຄອມລາວຈຳກັດຖືຮຸ້ນ 78%. ໂດຍແມ່ນນັກລົງທຶນຂອງສະຫະພັນຣັດເຊຍລົງທຶນໃນບໍລິສັດດັ່ງກ່າວເພື່ອມາລົງທຶນໃນລາວ.
ປະຈຸບັນນີ້ບໍລິສັດມີເຄື່ອຂ່າຍໂທລະສັບມືຖືກວມເອົາ 11 ແຂວງທົ່ວປະເທດແລະມີແຜນຂະຫຍາຍເຄື່ອຂ່າຍໃຫ້ຄອບຄຸມພື້ນທີ່ເຂດບໍລິການກວມເອົາທຸກໆແຂວງ ພ້ອມກັບການໃຫ້ບໍລິການອິນເຕີເນັດ ໂດຍອີງໃສ່ເຕັກໂນໂລຊີ GPON ເຊິ່ງມີສູນການຢູ່ນະຄອນຫລວງວຽງຈັນ ແລະ ແຂວງສະຫວັນນະເຂດ, ອີງຕາມສະຖິຕິຮອດທ້າຍເດືອນກັນຍາ 2017 ບໍລິສັດເປັນຜູ້ສະໜອງບໍລິການໃຫ້ແກ່ລຸກຄ້າໂທລະສັບມືຖືຫລາຍກວ່າ 260,000 ໝາຍເລກແລະມີລູກຄ້າທີ່ໃຊ້ອິນເຕີເນັດແບບໃຊ້ສາຍຈຳນວນ 2.200 ຈຸດບໍລິການ.

ປະຫວັດບໍລິສັດວິມເປວຄອມ ລາວ ຈໍາກັດ (VimpelCom) ມີຊື່ເດີມວ່າ ບໍລິສັດ ມີລີຄອມ ລາວ ຈໍາກັດ (Millicom) (ທີໂກ), ໃນວັນທີ 9 ມີນາ 2011 ໄດ້ມີການປະກາດຢ່າງເປັນທາງການວ່າ “ວິມເປວຄອມ ຈໍາກັດ” (“ວິມເປວຄອມ” ຫຼື “ບໍລິສັດ”) (NYSE: VIP), ຜູ້ນໍາດ້ານການໃຫ້ບໍລິການສື່ສານໃນລະດັບສາກົນໄດ້ສໍາເລັດການຊື້ຄືນກິດຈະການຂອງບໍລິສັດ ມີລີຄອມ ປະເທດລາວ ຈໍາກັດ, ເຊິ່ງວ່າໃນປັດຈຸບັນນີ້ VimpelComຖືຮຸ້ນຢູ່ 78% ແລະ ສ່ວນທີ່ເຫຼືອ 22% ແມ່ນຂອງລັດຖະບານແຫ່ງ ສປປ ລາວ.

VimpelComຈໍາກັດປະກອບດ້ວຍຜູ້ດໍາເນີນງານທາງດ້ານການສື່ສານທີ່ໃຫ້ບໍລິການດ້ານສຽງ ແລະ ຂໍ້ມູນ ໂດຍຜ່ານເຕັກໂນໂລຊີອິນເຕີເນັດບໍ່ມີສາຍ, ເຕັກໂນໂລຊີທີ່ຄົງທີ່ ແລະ ເຕັກໂນໂລຊີດ້ານລະບົບການສື່ສານ. ກຸ່ມບໍລິສັດ VimpelComຈໍາກັດ ມີສໍານັກງານໃຫຍ່ຢູ່ທີ່ Amsterdam ແລະ ດໍາເນີນງານໃນ 19 ປະ ເທດ ເຊິ່ງປະກອບມີ ຣັດເຊຍ, ຢູເຄຣນ, ກາຊັກຖານ, ອູເບກິສະຖານ, ທາຈິກສະຖານ, ຈໍເຈຍ, ອາເມເນຍ, ຄຣີຄິສ໌ສະຖານ, ຫວຽດນາມ, ລາວ ແລະ ກໍາປູເຈຍ, ຄອບຄຸມອານາເຂດທີ່ມີປະຊາກອນລວມເຖິງ 868 ລ້ານຄົນ.


ທາງບໍລິສັດໃຫ້ບໍລິການພາຍໃຕ້ຍີ່ຫໍ້ທີ່ມີ 11 ແບບ ເຊິ່ງລວມມີ “Beeline”, “Kyivstar”, “djuice”, “Wind”, “Infostrada”, “Mobilink”, “Leo”, “Banglalink”, “Telecel”, ແລະ ຍີ່ຫໍ້ “Djezzy”. ໃນວັນທີ 31 ມີນາ 2011, VimpelComມີຜູ້ນໍາໃຊ້ເຄືອຂ່າຍເຖິງ 186 ລ້ານຄົນ. VimpelComມີການຊື້ຂາຍຮຸ້ນໃນຕະຫຼາດຫຼັກຊັບຂອງນິວຢອກພາຍໃຕ້ສັນຍາລັກ “VIP”.

ຂ່າວ-ພາບ: ກະຊວງການເງິນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.