Header Ads

ປກສ ເມືອງໄຊເສດຖາ ຝັງທຳລາຍອາວຸດລ່າເນື້ອ ປະເພດປືນແກັບ 894 ກະບອກ ແລະ ໝໍ້ຊັອດ 50 ເຄື່ອງ



ອີງຕາມານລາຍງານຂ່າວຂອງ ນສພ ປ້ອງກັນຄວາມສະຫງົບ ວ່າ : ກອງບັນຊາການ ປກສ ເມືອງໄຊເສດຖາ ແຂວງອັດຕະປື ໄດ້ຈັດພີທີຝັງທຳລາຍອາວຸດລ່າເນື້ອ ປະເພດປືນແກັບ 894 ກະບອກ ແລະ ໝໍ້ຊັອດ 50 ເຄື່ອງ ທີ່ເກັບກູ້ມາຈາກປະຊາຊົນຜູ້ທີ່ນຳໃຊ້ບໍ່ຖືກຕ້ອງຕາມລະບຽບກົດໝາຍພາຍໃນເມືອງ.
 

ພິທີດັ່ງກ່າວ ໄດ້ຈັດຂຶ້ນໃນທ້າຍອາທິດຜ່ານມາ ຢູ່ເດີ່ນຫ້ອງວ່າການປົກຄອງເມືອງ ໂດຍການເຂົ້າຮ່ວມຂອງ ທ່ານ ຫວັນຕາ ພົມມະສານ ຮອງເຈົ້າເມືອງໆໄຊເສດຖາ ມີ ພັທ ໂພໄຊ ສຸລິວົງສາ ຮອງຫົວໜ້າກອງບັນຊາການ ປກສ ແຂວງ ຜູ້ຊີ້ນຳວຽກງານຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ, ພ້ອມດ້ວຍຄະນະກອງບັນຊາການ ປກຊ-ປກສ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
 

ພັທ ແກ້ວເຊີນ ຮັກສາພົນ ຫົວໜ້າກອງບັນຊາການ ປກສ ເມືອງໄຊເສດຖາ ກໍໄດ້ລາຍງານສະພາບໂດຍລວມ ສົກປີ 2016–2017 ກ່ຽວກັບການເກັບກຳທ້ອນໂຮມປືນແກັບໃຫ້ຜູ້ເຂົ້າຮ່ວມຊາບ ເຊິ່ງປືນທີ່ນຳມາທຳລາຍຄັ້ງນີ້ ແມ່ນໄດ້ມາຈາກການເກັບກຳທ້ອນໂຮມຈາກຫຼາຍພາກສ່ວນ ເປັນຕົ້ນແມ່ນການເກັບກຳທ້ອນໂຮມຂອງກຳລັງ ປກສ ກຸ່ມບ້ານ ແລະ ບັນດາ ປກສ ແຕ່ລະໝູ່ບ້ານ,

ເຊິ່ງໃນໜຶ່ງປີຜ່ານມາສາມາດເກັບກຳທ້ອນໂຮມໄດ້ 894 ກະບອກ ແລະ ໝໍ້ຊັອດ 50 ເຄື່ອງ ເຊິ່ງເປັນການປະຕິບັດຕາມການຕົກລົງເຫັນດີຂອງຂັ້ນເທິງ ທີ່ມອບໃຫ້ ປກສ ກຸ່ມບ້ານ ແລະ ປກສ ບ້ານ ເປັນຜູ້ເກັບກຳທ້ອນໂຮມອາວຸດດັ່ງກ່າວ ທີ່ປະຊາຊົນນຳໃຊ້ເຂົ້າໃນການທຳມາຫາກິນທີ່ບໍ່ຖືກຕ້ອງຕາມລະບຽບກົດໝາຍ ເປັນຕົ້ນແມ່ນນຳໃຊ້ເຂົ້າໃນການລ່າສັດ. ນອກນີ້, ຍັງມີບາງທ້ອງຖິ່ນ, ບາງກຸ່ມຄົນ ຍັງໄດ້ນຳໃຊ້ອາວຸດດັ່ງກ່າວ ໄປສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ ເຊັ່ນ: ການປຸ້ນຈີ້ຊິງຊັບ, ການກໍ່ອາລະວາດຕີກັນ ແລະ ອື່ນໆ. 


ພາບ ແລະ ຂ່າວ: ນສພ ປ້ອງກັນຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.