Header Ads

ງານບຸນມະໂຫລານກາເຟລາວຄັ້ງທີ 2 ຈະຈັດຂຶ້ນທີ່ນະຄອນຫຼວງວຽງຈັນ ໃນທ້າຍປີນີ້ .



ໃນຕອນເຊົ້າ ວັນທີ 29 ຕຸລາ 2017 ນີ້, ຢູ່ທີ່ສະຄົມກາເຟລາວ ບ້ານຫຼັກເມືອງ ເມືອງປາກເຊ ຄະນະບໍລິຫານງານສະມາຄົມກາເຟລາວໄດ້ຈັດງານຖະແຫຼງຂ່າວກ່ຽວກັບການກະກຽມຈັດງານບຸນມະໂຫລານກາເຟລາວຂຶ້ນຢ່າງເປັນທາງການ. ໂດຍເຂົ້າຖະແຫຼງຂອງທ່ານ ນາງ ບຸນເຮືອງ ລິດດັງ ປະທານສະມາຄົມກາເຟລາວ ພ້ອມດ້ວຍຄະນະ,ທ່ານ ຄຳເປີ ໄຕໄຊຍະວົງ ຮອງປະທານສະພາການຄ້າ ແລະອຸດສະຫະກຳແຂວງຈຳປາສັກ,ມີບັນດາບໍລິສັດທີ່ເຮັດທຸລະກິດກາເຟ,ຜູ້ຕາງໜ້າກຸ່ມຜູ້ຜະລິດກາເຟ ແລະສື່ມວນຊົນເຂົ້າຮ່ວມ.



ທ່ານ ນາງ ບຸນເຮືອງ ລິດດັງ ປະທານສະມາຄົມກາເຟລາວ ໄດ້ຖະແຫຼງຂ່າວຕໍ່ສື່ມວນຊົນວ່າ: ສະມາຄົມກາເຟລາວຈະຈັດງານບຸນມະໂຫລານກາເຟລາວຄັ້ງທີ 2 ຂຶ້ນທີ່ໂຮງແຮມແລນມາກ ນະຄອນຫຼວງວຽງຈັນ ໃນວັນທີ 10 - 12 ທັນວາ 2017 (ທ້າຍປີນີ້ ) ງານບຸນມະໂຫລານກາເເຟລາວຄັ້ງທີ 2 ນີ້, ມີຈຸດປະສົງເປົ້າໝາຍ ເພື່ອເພີ່ມປະສິດທິພາບໃນການແຂ່ງຂັນດ້ານຄຸນະພາບ ແລະ ການຄ້າກາເຟລາວ ທັງເປັນການເອກອ້າງຄຸນລັກສະນະພິເສດຂອງກາເຟລາວ ທີ່ມີຣົດຊາດຫອມຫວນເປັນເອກະລັກທີ່ມີແຫຼ່ງກຳເນີດຈາກພໄຟເກົ່າ ພູພຽງບໍລະເວນ ແລະເປັນການເພີ່ມມູນຄ່າການສົ່ງອອກໄປສູ່ຜູ້ບໍລິໂພກໃນທົ່ວໂລກ; ພ້ອມທັງເປັນການຜັນຂະຫຍາຍຍຸດທະສາດການຜະລິດກາເຟລາວ, ນຳລາຍໄດ້ທີ່ເປັນຕອງໂສ້ໃຫ້ແກ່ຊາວສວນ, ຜູ້ຜະລິດ ປຸງແຕ່ງ ແລະຫຼຸດຜ່ອນຄວາມສ່ຽງຈາກການແຂ່ງຂັນທາງດ້ານການຄ້າກາເຟໃນພູມີພາກອາຊຽນ.
ງານບຸນມະໂຫລານກາເຟລາວຄັ້ງທີ 2 ນີ້,ຈະປະກອບມີຫຼາຍກິດຈະກຳຄື: 




1. ການວາງສະແດງຜົນຜະລິດກາເຟລາວຈາກທົ່ວປະເທດ ໂດຍມີຮ້ານຜູ້ປະກອບການກາເຟລາວ ແລະ ອັນດັບສາກົນຈຳນວນ 40 ຮ້ານ.


2. ການແຂ່ງຂັນທັກສະການຊົງກາເຟລະດັບປະເທດ ໃນນັ້ນ: ມີການແຂ່ງຂັນ ປະເພດໜຶ່ງແມ່ນແຂ່ງຂັນສີມືການຊົງກາເຟ ບາຣີສຕ້າ( Barista),ປະເພດສອງ ແຂ່ງຂັນສິລະປະໃນການຊົງກາເຟ (Lette Art) ແລະ ປະເພດສາມສຸດທ້າຍແມ່ນແຂ່ງຂັນສິລະປະຢາດນໍ້າໃນການຊົງກາເຟ ເບຣເວີ້ (Brewer) ຊຶ່ງທັງສາມປະເພດດັ່ງກ່າວນີ້ຈັດຂຶ້ນເປັນຄັ້ງທຳອິດຂອງປະຫວັດສາດໃນວົງການກາເຟລາວ ເພື່ອກຽມຄວາພ້ອມໃຫ້ແກ່ນັກຊົງກາເຟຂອງລາວ ກ້າວສູ່ຄວາມເປັນມືອາຊີບໃນລະດັບພູມີພາກ ແລະ ສາກົນ.


3. ການເຊື່ອມໂຍງກາເຟລາວເຂົ້າສູ່ປະາຄົມເສດຖະກິດອາຊຽນໂດມມີກິດຈະກຳດັ່ງນີ້:
- ກອງປະຊຸມປະຈໍາປີຂອງຄະນະກຳມະການບໍລິຫານຂອງສະຫະພັນກາເຟອາຊຽນ.
- ເປີດສະແດງວິຖີຊີວິດ ແລະ ຄວາມຫຼາກຫຼາຍໃນປະເພນີການຜະລິດກາເຟລາວ.
- ເປີດການຢ້ຽມຢາມຮາກຖານການຜະລິດກາເຟໃຫ້ແກ່ແຂກ ຜູ້ແທນຈາກບັນດາປະເດອາຊຽນ.


4. ເປີດເວທີສຳມະນາຂະບວນການຢັ້ງຢືນຄຸນພາບການຜະລິດກະສິກຳສະອາດ (GAP ) ແລະ ການແປຮູບທີ່ຖືກຫຼັກສຸຂະອະນາໄມ( GMP ) ອີກດ້ວຍ.




ໂດຍ: ເກດສະໜາ ແກ້ວສຸວັນະແສງ (ວິທະຍຸກະຈາຍສຽວແຂວງຈໍາປາສັກ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.