Header Ads

ສສຊ ສະເໜີຕໍ່ສະພາ ບັນຫາຜົນກະທົບ ຈາກການຂຸດຄົ້ນບໍ່ແຮ່ ບໍລິສັດພູເບ້ຍມາຍນິງ



ໃນ​ກອງ​ປະຊຸມ​ ສະ​ໄໝສາມັນ​ເທື່ອທີ 4 ຂອ​ງສະພາ​ແຫ່ງ​ຊາດ ​ຊຸດ​ທີ VIII ​​ໃນ​ວັນ​ທີ 27 ຕຸລາ 2017 ​ໂດຍ​ການ​ເປັນ​ທານ​ ຂອງທ່ານ ນາງ ​ປານີ ຢາທໍ່​ຕູ້ ປະ​ທານ​ສະພາ​ແຫ່ງ​ຊາດ, ​ໂດຍ​ຜ່ານ​ການ​ລາຍ​ງານ​ວຽກງານ​ ສະພາ​ແຫ່ງ​ຊາດ​ ໄລຍະ​ຜ່າ​ນມາ ​ແລະ ​ແຜນ​ງານ​ປີ 2017, ​ໂດຍ​ມີ​ຕົວ​ແທນ​ສະມາຊິກສະພາ​ ຈາກ​ເຂດ​ເລື​ອກຕັ້ງ ​ແຂວງ​ໄຊ​ຍະ​ບູລີ ​ແລະ ແຂວງ​ໄຊ​ສົມບູນ​ ໄດ້​ສະ​ເໜີຄຳ​ເຫັນ ​ຕໍ່​ວຽກງານ​ດັ່ງກ່າວ ​ໃນ​ບາງ​ຈຸດ​ທີ່​ສຳຄັນ.




ທ່ານ ບຸນສຸກ ຈອມວິສານ ສສຊ ເຂດ 18 ແຂວງໄຊສົມບູນ ໄດ້ສະເໜີຕໍ່ສະພາວ່າ: ການກໍ່ສ້າງໂຄງລ່າງ ເປັນຕົ້ນ ຫ້ອງການສຳນັກງານ ໃນການເຮັດວຽກແມ່ນມີພຽງ 2 ຫ້ອງນ້ອຍເທົ່ານັ້ນ, ເຊິ່ງມີພະນັກງານ ຫລາຍກ່ວາ 40 ທ່ານ. ສະນັ້ນ, ຈຶ່ງຂໍສະເໜີຕໍ່ສະພາໃຫ້ບໍລິມະສິດ ກ່ຽວກັບບັນຫານີ້ ເປັນພິ ເສດໃຫ້ແກ່ແຂວງ, ອີກບັນຫາໜຶ່ງແມ່ນ ດ້ານສິ່ງແວດລ້ອມ ກ່ຽວກັບການຂຸດຄົ້ນບໍ່ແຮ່ຄຳ ຂອງ ບໍລິສັດພູເບ້ຍມາຍນິງ ເຫັນວ່າມີ 4 ບັນຫາໃຫຍ່ທີ່ເກີດຂຶ້ນ ຄື: ອ່າງນ້ຳທີ່ບໍາບັດມີກິ່ນເໝັນ, ເນື້ອທີ່ທຳການຜະລິດຂອງປະຊາຊົນ ແມ່ນຖືກເຂດສຳປະທານ ຂອງບໍລິສັດດັ່ງກ່າວ ກວມເອົາເກືອບທັງໝົດ, ບັນຫາເລື່ອງການສັ່ນສະເທືອນ ໃນການປະຕິບັດວຽກງານ ການຂຸດຈົກແຮ່ຄຳ ໃຫ້ເຮືອນຊານບ້ານຊ່ອງ ຂອງພໍ່ແມ່ປະຊາຊົນ ໄດ້ຮັບຜົນກະທົບແຕກຫັກ, ເປ້ເພ, ທາງບໍລິສັດ ມີການເຈາະເອົາແຮ່ຄຳຢູ່ພື້ນດິນ ມີຄວາມເລິກເຖິງ 100-150 ແມັດ ເຮັດໃຫ້ເກີດຄວາມສ່ຽງດິນເຈື່ອນ ຫລື ຖະຫລົ່ມ ແລະ ຈາກການຕິດຕາມ ກວດກາເຫັນວ່າ ກາຍຂອບເຂດພື້ນທີ່ສຳປະທານ ເມື່ອສະເໜີໄປທາງບໍລິສັດ ແມ່ນບໍ່ມີການຮັບພິຈາລະນາ. ດັ່ງນັ້ນ, ໃນນາມຕົວແທນໃຫ້ ສສຊ ແຂວງໄຊສົມບູນ ຈຶ່ງຢາກສະເໜີໃຫ້ ທ່ານນາຍົກລັດຖະມົນຕີ ເພື່ອຊີ້ນຳກະຊວງທີ່ກ່ຽວຂ້ອງ ເປັນຕົ້ນແມ່ນ ກະຊວງພະລັງງານ ແລະ ບໍ່ແຮ່ ເປັນໃຈກາງເບິ່ງຄືນສັນຍາປັບປຸງໄດ້ບໍ່ ແລະ ຢາກໃຫ້ທາງບໍລິສັດ ເປັນຜູ້ອອກງົບປະມານ ເພື່ອຈັດສັນໃຫ້ 386 ຫລັງຄາເຮືອນ ທີ່ໄດ້ຮັບຜົນກະທົບຈາກ ບັນຫາທີ່ກ່າວມານັ້ນເປັນໄປໄດ້ບໍ, ແຕ່ຖ້າຫາກວ່າເປັນໄປບໍ່ໄດ້ ກໍ່ຢາກໃຫ້ທາງລັດຖະບານ ອອກຮ່ວງງົບປະມານ ຈັດສັນພູມລຳເນົາ ເພາະວ່າບັນດາໝູ່ບ້ານດັ່ງກ່າວ, ແມ່ນນອນຢູ່ໃນຈຸດສຸມຂອງແຂວງ ທີ່ສະເໜີມາໃຫ້ ທາງລັດຖະບານຮັບຮອງ, ເຊິ່ງທ່ານນາຍົກ ກໍໄດ້ຮັບຮອງແລ້ວ, ສ່ວນບ່ອນທີ່ຈະຈັດສັນຢູ່ໃສນັ້ນ ແມ່ນສະພາຈະໄດ້ມີການຊຸກຍູ້ ໃຫ້ອົງການປົກຄອງແຂວງ ເປັນຜູ້ຈັດສັນຕາມເງື່ອນໄຂຕົວຈິງ.

ທ່ານ ນາງ ​ອິດ​ມະນີ ຈັນທະ​ຄູນ ສສຊ ​ເຂດ 7 ​​ແຂວງໄຊ​ຍະ​ບູລີ ​ໄດ້​ສະ​ເໜີຄຳ​ເຫັນວ່າ: ການ​ຕີ​ລາຄາ​ຕາມ​ບົດ​ສະຫລຸບ ​ເປັນ​ຕົ້ນ​ ດ້ານ​ເນື້​ອ​ໃນ​ກົດໝາຍ ມີ​ຄວາມ​ຊັກ​ຊ້າ, ​​ເຜີ​ຍ​ແຜ່​ບໍ່​ກ້ວາງ​ຂວາງ, ບໍ່​ຮອດ​ຮາກ​ຖານ, ການ​ຜ່ານ​ກົດໝາຍຮ່າງ​ກົດໝາຍ ຖື​ວ່າ​ໄດ້​ແຕ່​ເປັນ​ພາກ, ​ແຂວງ​ຍັງ​ບໍ່​ໄດ້​ລົງ​ເຖິງ​ເນື້​ອ​ໃນ​ ແມ່ນ​ບໍ່​ມີການ​ສົ່ງ​ ໃຫ້​ຜູ້​ແທນ​ລ່ວງໜ້າ, ລະບ​ອບ​ແບບ​​ແຜນ​ວິທີ​ເຮັດ​ວຽກ ຍັງ​ບໍ່​ເຖິງ​ຖອງ​ຍັງ​ຊັກ​ຊ້າ ​ແຕ່​ການ​ແຈ້​ງການ ​ແມ່ນ​​ເລັ່ງດ່ວນ​ຮີ​ບຮ້ອນ​ ເຮັດ​ໃຫ້ການ​ກະກຽມ ວຽກງານ​ຂອງ​ບັນດາ ສສຊ ບໍ່​ທັນການ. ນອກຈາກ​ນັ້ນ, ກົນ​ໄກ​ການ​ປະສານ​ງານ​ ໂດຍ​ສະ​ເພາະ​ ແມ່ນ​ແຈ້ງ​ການ​ແມ່ນ​ຢາກ​ໃຫ້ມີ​ ການ​ໃຈ້​ແຍກ​ຕື່ມ​ວ່າ ອັນ​ໃດ​ທີ່​ເປັນ​ແຈ້ງ​ການ​ ຂອງ​ສະພາ​ແຫ່ງ​ຊາດ ​ແລະ ອັນ​ໃດ​ທີ່​ເປັນ​ແຈ້ງ​ການ​ຂອງ ສສຊ ຂອງ​ຂົງ​ເຂດວຽກງານ​ໃດ​ໃຫ້​ມີ​ຄວາມ​ຈະ​ແຈ້ງ, ການ​ກຳນົດ​ເວ​ລາ ສະ​ເໜີຄຳ​ເຫັນ ​ແລະ ການ​ຕອບ​ຄຳ​ຖາມ​ຊີ້​ແຈງ ​ຂອງ​ຄະ​ນະ​ລັດຖະບານ ​ແມ່ນ​ຢາກ​ໃຫ້​ເພີ່ມ​ເວລາ ​ໃນ​ກອງ​ປະຊຸມ​ຕື່ມ​ ເນື່ອງຈາກ​ການ​ໃຫ້​ຄຳ​ເຫັນ ​ແລະ ຊີ້​ແຈງ​ຜ່ານ​ມາ​ບາງບັນຫາ​ແມ່ນ​ບໍ່ ລະອຽດ​ເທົ່າ​ທີ່​ຄວນ​ ແລະ ​ບໍ່​ມີ​ເວລາ​ພຽງພໍ,​ ຢາກ​​ໃຫ້​ຊຸກຍູ້​ບັນດາ​ ດ້ານ​ກົດໝາຍ​ເພີ່ມ​ຕື່​ມ​ເຊັ່ນ: ມີ​ການ​ຈັດ​ພີມ​ສົ່ງ​ໃຫ້​ສາຍ​ຕັ້ງ, ດ້ານ​ງົບປະມາ​ນ​ທີ່​ແບ່ງປັນ​​ ໃຫ້ສະພາ​ປະຈຳ​​ແຂວງ​ ແມ່ນ​ບໍ່ພຽງພໍ ​ແລະ ບໍ່​ມີ​ການ​ເພີ່ມ​ຂຶ້ນ ຈຶ່ງ​ສະ​ເໜີ​ໃຫ້​ສະພາ​ທວນຄືນ​ຕື່ມ ກ່ຽວກັບ​ບັນຫາ​ດັ່ງກ່າວ.

ຂ່າວ: ພູ​ທອງ ສີ​ວົງສາ ພາບ: ​ເກດ (ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.